Me Bashën, Ambasadorja e SHBA: Dëgjova Programin zgjedhor të PD!

Ambasadorja e SHBA në Tiranë, Yuri Kim, ka zhvilluar sot një takim me kryetarin e Partisë Demokratike, Lulzim Basha, ku u informua për Programin zgjedhor të PD-së dhe aleatëve ndërsa ritheksoi pritshmërinë amerikane për kandidatë të pastër për zgjedhjet e 25 Prillit; Takim, në të cilin Basha nga ana e tij shprehu nevojën e Partisë Demokratike dhe Shqipërisë për mbështetje dhe bashkëpunim të fortë  amerikan.

“Sot pata një takim të shkëlqyer me Lulzim Bashën. Më erdhi mirë të dëgjoja programin zgjedhor të PD dhe partnerëve. Unë nënvizova pritjet e SHBA për kandidatë të pastër nga të gjitha partitë,” tha Ambasadorja amerikane pas takimit me Lulzim Bashën përmes rrjetit social Twittrer duke përfunduar:

“Ne gjithmonë do të jemi të përkushtuar për marrëdhënie të forta mes SHBA dhe Shqipërisë, me respekt për vendimin e votuesve më 25 Prill.”

Pas zbardhjes së detajeve nga ky takim nga ana e Ambasadores së SHBA në Tiranë, Yuri Kim, vetë kryetari i Partisë Demokratike, Lulzim Basha, përmes rrjetit social Twitter shprehet:

“Kënaqësi e veçantë të takohesha sot me ambasadoren e SHBA-ve, znj Yuri Kim. Ndava me të planin e Partisë Demokratike për Shqipërinë dhe nevojën për mbështetjen dhe bashkëpunimin e fortë  amerikan, për të përshpejtuar zhvillimim ekonomik, tërhequr investimet amerikane dhe fuqizuar luftën kundpr krimit dhe korrupsionit.”