Apologjia e Edi Ramës
nga Agim Popoci
“Rruga drejt 25 prillit, drejtësia që duam”, spektakli i sotëm i Kryeministrit Edi Rama i organizuar me qëllim për të kërkuar mandatin e tretë, vetëm pak minuta pasi filloi, i ngjante në detaje Apologjisë së Sokratit. Pse nuk është viti 399 para erës sonë, Edi Rama nuk ka faj!
Tirana është në krizë si pasojë, kryesisht, e qeverisjes 12 vjeçare nga Edi Rama, pandemisë dhe protestave që bëhen për shkak të keqqeverisjes së tij.
Meqë fajtori nuk duhet kërkuar sepse është në krye të qeverisë, Edi Rama me aftësinë e tij propagandistike doli për të folur pse nuk njeh ligjet që njeh shteti, dhe nëse është fajtor që e ka korruptuar dhe po e korrupton rininë!
Pse Apologjia e Edi Ramës?! Sokrati, duke studiuar shoqërinë athinase, duke vëzhguar jetën e njerëzve dhe dramat e tyre, zbuloi fenomenet negative të kësaj shoqërie dhe jepte mendime se si duhej të rregulloheshin; Por, Edi Rama pasi bëri të gjitha këto me shoqërinë tiranase, e pa se kryetar i Bashkisë Tiranë për herë të dytë nuk bëhet dot nëse e rregullon këtë shoqëri.
“Ja pse kundër meje u ngritën plot shpifje dhe fisnikët e qytetit më urrenin,” thoshte Sokrati ndërkohë Edi Rama vazhdon të thotë edhe sot kur ka konsumuar tre mandate në krye të Tiranës dhe mendon të qëndroj edhe mandatin e tretë në krye të Qeverisë së Shqipërisë, duke propaganduar ekzistencën e shtetit dhe ruajtjen e sistemit të demokracisë, siç theksohet në Apologjinë e Sokratit
“Nuk mund ta jetoni siç duhet këtë jetë nëse nuk luftoni padrejtësinë në qytet,” ngulmonte gjithnjë Sokrati, por Edi Ramën shqiptarët e kujtojnë me sopat në dorë për të prerë shtyllat elektrike që ligji “i nxori” përpara ndërsa po ndërtonte rrugën; Qytetarët e Tiranës e kujtojnë Edi Ramën duke bërë “be-be bon” me altoparlantë ndërsa i kërkohej llogari nga Komisioni Hetimor Parlamentar për punët e dyshimta; Mbronte pallatet e miqve me Policinë Bashkiake edhe pse ishte ndërtim pa leje; Dhe, me lamçe e me shkrel mbronte piramidën e diktatorit kur shteti erdhi për ta shembur!
Por, ai nuk ndaloi vetëm si i pari i Tiranës, gjithnjë ngulmoi në paligjshmëri! Sot e pranoi se në partinë që ai drejton ka pisanjosë dhe batakçinj, por kujt ia tha kur e gjithë opozita me liderin e saj ka 8 vjet që e thotë e Shqipëria vazhdon të varfërohet, zbrazet dhe shitet. Dhe, sërish sot pyeti:
“A duhet të më jepni mua dhe PS një mandat të tretë, apo duhet të rimerrni në drejtimin e vendit ata që kanë qenë me vite aty deri para 42 muajsh. Ky që vjen është mandati i tretë për mua dhe mandati i pestë për Saliun, Lulin dhe PD. Pa harruar se është edhe mandati i 5 për Ilirin dhe Monikën, herë më PS dhe herë me PD, prapë me PS dhe prapë me PD. Gjithnjë me të njëjtin avaz dhe të njëjtin fund. Sa herë fitojnë ata Shqipëria humb,” thotë Edi Rama në Apologjinë e tij i bindur se Shqipëria sot është shumë më e mirë se dje, ashtu si çdo shqiptar meqë ka ngelur një ditë më pak deri tek fundi i sundimit të tij!
Dhe, vazhdon lojën e tij të fjalëve se si ka bërë progres ndërsa u mburrë me turpin dhe dëmin më të madh që i ka shkaktuar këtij vendi, Vettingun!
Pse nuk përfunduan në burg gjyqtarët që u cilësuan të korruptuar dhe u larguan nga sistemi i Drejtësisë, Edi Rama e arsyeton me faktin se nuk është një gjykatë speciale partizane si ato të vitit 1945, është vetëm hallka e parë e zinxhirit të drejtësisë, është fshesa e pastrimit të Pallatit të Drejtësisë nga llumi i shtresëzuar 30 vjet me radhë!
Po, Kryeministri e tha në Apologjinë e tij por harroi se gjyqet speciale të vitit 1945 u bënë pa ligj e Kushtetutë ndërsa spastrimin, që Rama e cilëson, të llumit të shtresëzuar 30 vjet, është bërë me ligj dhe Kushtetutë, dhe që të dyja janë shkelur nga Drejtësia që i është nënshtruar Reformës. Edi Rama mund ta kundërshtonte si keqkuptim këtë paragraf të Apologjisë së tij por ishte ministrja e Drejtësisë, Etilda Gjonaj, që e konfirmoi duke theksuar se nga kjo Reformë e cila lufton korrupsionin dhe krimin, ka frikë Opozita.
Pse nuk ka frikë mazhoranca nga Reforma në Drejtësi?! Ky ishte detaji që i mungonte sot Apologjisë së Edi Ramës ndërsa zuri vend kërcënimi i radhës me Ilir Metën dhe Sali Berishën!
Koalicionin nga i cili do pësoi humbjen e radhës, PD-LSI, sot Edi Rama në Apologjinë e tij e vlerësoi “të imponuar nga Saliu dhe Iliri për ta lidhur Lulin me zinxhirin e Monikës që mos ikë duke i lënë vetëm përballë Reformës në Drejtësi”. Në politikën shqiptare gjithçka është e mundur, ashtu siç është e mundur që kjo ti ketë ndodhur vetë Edi Ramës kur u ul për të firmosur Marrëveshjen me LSI-në pasi Iliri iku nga koalicioni me Saliun! Me urdhër të kujt e bëri këtë veprim Iliri, vetëm mund të paramendohet, por me zinxhir të kujt u lidhë Ilir Meta për 4 vjet përplotë vjedhje, skandale dhe mbjellje droge në gjithë Shqipërinë, tashmë është e qartë!
Dhe, meqë nuk ka program as këtë vit dhe oferta e tij e vetme janë kërcënimet, ai i ndërseu rilindasit e tij me fjalët e Ilirit, i cili si zakonisht, dhe në prag të zgjedhjeve të 25 Prillit tha se nëse fiton Edi Rama, ai do udhëheq opozitën. Interpretimi i këtij togfjalëshi nga Edi Rama në Apologjinë e tij se Ilir Meta do ngre barrikadën me PD-LSI dhe KÇK brenda në parlament për ta bllokuar Reformën në Drejtësi, është më i pakuptimtë se fjalët boshe të Presidentit aktual të Republikës.
Se si do të bëhet lider i opozitës, Ilir Meta, kur nuk arriti dot të bëjë as parti këtë nuk do të mund ta sqaronte as Platoni, as Sokrati e lërë më Edi Rama i cili u rritë nën hijen e Metës duke bërtitë: O Doktoooooorrr!
Në fund, pas Apologjisë së Edi Ramës, që mund të ketë ekzaltuar mjaft shqiptarë në këtë Shqipëri të mbushur me komunistë dhe rini të korruptuar, Kryeministrit i ka ikur edhe një detaj:
Para Sokratit ishin 501 gjyqtarë, të një gjyqi popullor, para Ramës janë shumica e shqiptarëve të cilët për shumë gjëra deri më sot kanë hamendësuar me shpresën te Reforma në Drejtësi. Por, pas Apologjisë së Edi Ramës, shqiptarët e kuptuan se Reforma në Drejtësi sot është një ngrehinë, dje ishte një ëndërr, por jemi ende larg. Dhe, larg, nuk është 25 Prilli!
