40 ditë!
nga Agim Popoci
Kryeministri Edi Rama nuk është se po folë pa lidhje, fyen dhe kërcënon vetëm tani që është futur në zonën e zisë së pushtetit të humbur, por 40 ditët e pritjes deri sa pushteti i tij të shkon në qiell, kanë filluar të mbushen me mesazhe dhe veprime të rrezikshme komuniste si për popullin shqiptarë ashtu dhe Shqipërinë në tërësi.
Rastësisht ose jo, besohet se bebin nuk duhet nxjerrë nga shtëpia 40 ditë pas lindjes, dhe shpirti i të ndjerit shkon në atë botë për 40 ditë pas vdekjes. Por, shkencërisht është konfirmuar se për 40 ditë krijohet qeliza te njeriu dhe për po aq ditë zbërthehet.
Studimet shkencore gjithashtu kanë dëshmuar se procesi i trishtimit zgjatë rreth 40 ditë. Gjatë kësaj periudhe njeriut i vijnë kujtimet për personin e humbur, i kujtohen çastet e përjetuara me atë person, që përcillet edhe me vajtim, trishtim, lot dhe ndjenjën e këputjes fizike. Këtu është dhe përgjigja e sjelljes së Kryeministrit Edi Rama pasi sondazhet e porositura nga ai dhe ato të brendshme, i konfirmojnë vdekjen e sundimit të tij 8 vjeçar më 25 Prill!
Duke mos u futur tek 40 ditët e librave fetar meqë kemi Kryeministrin të pafe, bazuar në shkencë, ca gjëra mund ti falen këtij njeriu që kërcënon me mbylljen e vendit nëse kryetari i PD, Lulzim Basha, vazhdon me tubimet elektorale, reagim ky që kuptohet se vjen nga entuziazmi që reflektohet në këto shfaqje madhështore, por jo edhe të mos përfillen sulmet që i organizoi me banda në Elbasan.
Edi Rama me shpurën e tij mund të vazhdoj i ndihmuar nga banditët që të paralajmëroj dhunë për të gjithë ata që i shkojnë mbrapa Lulzim Bashës, por opozita duhet ta dijë se ky 40 ditësh duhet të jetë i artë për përgatitjen jo vetëm të Kryeministrit që po ikën pas 8 vjet shkatërrimi, por edhe atyre që do të gëzojnë rikthimin e lirisë në tokën shqiptare.
Duhet lënë këtë njeri të dështuar që të çirret sepse nuk e ka të lehtë kur fillon e mendon se pas 40 ditësh Qet Kastrati do të filloj të ruaj pasurinë e vetë dhe jo të Kryetarit të PS, Samir Mane nuk do ti hap telefonin meqë do të jetë i zanun duke sodit rrethrrotullimin te TEG-u, Klodian Allajbeu i Spitalit që blen Spitale do ti rikthehet miqësisë me aksionerët e vjetër, dhe në fund, vetëm përmes konferencave të shtypit do të ketë shansin ti bëjë të fala Sandër Frangajt të Klanit!
Ndërkohë bashkëvuajtësit e këtij 8-vjeçari të tmerrshëm pikërisht nga këta njerëz dhe Edi Rama, nuk duhet të harrojnë se edhe fiqët, me përjashtim të atyre që i shet Lali Eri, bëhen ilaç por vetëm pasi të qëndrojnë 40 ditë në vaj ulliri; Madje edhe arra bëhet ilaç, vetëm pasi të ketë qëndruar 40 ditë në raki kumbulle!
Pra, 40 ditë!
Kjo periudhë duhet ti shërbej demokratëve që të përmbahen nga provokimet e Edi Ramës i cili program qeverisës nuk ka për asgjë ama gjuhë të gjatë dhe mashtrime ka jo vetëm për Shqipërinë.
Nëse kriminelët e partisë që drejton Edi Rama kanë rrëzuar kisha e xhami qysh në vitin 1967, të tjerët nuk kanë arsye të dyshojnë pse sipas librave fetar, numri 40 është simbol i tundimit dhe perfeksionizmit, kohë e pritjes dhe përgatitjes!
Kur Edi Rama fton të gjithë shqiptarët të mos jenë tolerantë në opinionin e tyre në raport me këto shfaqje që atij dhe sorollopit komunist të ngjashëm me Kryeministrin, i kujtojnë mitingjet pa shije të viteve ’90, hip mbi makina, mblidh njerëz me dy gishta, grumbullohu me flamuj deri dhe në një festë si ajo në Elbasan, vër ulërimën, krijo kot ndotje akustike në mes të qytetit, madje në mes të një feste dhe pastaj bëj dhe viktimën sikur u sulmove, ndërkohë që qëndron aty si një provokator i njerëzve pa dallim dhe me montazhe skuthash, kjo ftesë nuk vlen për njerëzit normal!
Po, ftesa është e paligjshme, është vepër penale, por të gjithë shqiptarët normal duhet ti thirrin mendjes dhe të mendojnë për pak edhe tek librat e frymëzimit shpirtëror që i kujtojnë tundimin ama i bëjnë me dije se 40 ditë janë dhe kohë të përgatitjes, dhe se për një horr nuk mund ti vihet flaka atdheut!
Dhe, për fund, pse 40 ditë dhe pse kujdes! Shumë janë gënjyer nga përdhosja e një statuje të kriminelit Enver Hoxha por komunizmi vazhdon të jetë në mes nesh! E Edi Rama, me këtë virus të kuq, vazhdon dhe provokon, vazhdon dhe ndërsen shqiptarët ndër vete si dhe vazhdon e kërkon gjakderdhje!
Kjo është dhe arsyeja pse duhet kujdesi i shtuar! Ne themi, 100 herë të kam thënë, por rusët thonë 40 herë të kam thënë; para 100 viteve, e themi shpesh, por rusët thonë para 40 viteve! Edhe mund ta thonë deri më 25 Prill në Tiranë, por jo dhe pas 40-ditëshit të mbetur sepse nuk do ta kenë Kryeministër të Shqipërisë, bolshevikun serbofil i cili u shërbeu edhe më shumë se sa kërkuan Putini dhe Vuçiç!
Pra, kujdes, nuk është thjeshtë Bibël, Kuran ose Shkencë, jemi brenda 40 ditëshit të vdekjes së pushtetit të Edi Ramës, dhe gjithçka mund të ndodhë deri më 25 Prill! Por, e sigurt se jo edhe më 26 Prill, kur, ashtu siç e thonë dhe studimet shkencore dhe bazuar në sondazhet e kontrolluara nga Kryeministri, Edi Ramës nuk do ti ngelet asgjë tjetër përveç se vajtimi, trishtimi, lotët dhe këputja e fizike sepse dhe ai vetë e ka parasysh se nuk ka parë gjë akoma!
