A po kërkon Edi Rama sebep të largohet?!
nga Agim Popoci
“Kjo nuk ka për të ndodhur, të paktën jo gjatë qeverisjes sime!” Kjo nuk ishte thjeshtë një përgjigje e Kryeministrit Edi Rama për Presidentin e SHBA, Donald Trump, i cili në planet e tij dhe jo vetëm kishte strehimin e përkohshëm të 120 mijë palestinezëve nga Rripi i Gazës në Shqipëri, por, një paralajmërim për tërheqjen e tij me akt patriotik, pasi sebepi i shumëkërkuar i trokiti në derë!
Për ata që tërheqjen e Edi Ramës nga politika në këtë moment e konsiderojnë çmenduri nuk duan t’ia dinë për arsyen, sepse pas drejtimit 12 vjeçar me qeveri ekstremisht të korruptuar, Babait të këtij korrupsioni që ende nuk është akuzuar zyrtarisht nga SPAK, po i afrohet një moment i artë!
A shqetësohet Edi Rama aq shumë për Shqipërinë dhe nuk do t’a populloj me palestinezë?! Natyrisht që jo! Por, në pyetje është fati i Kryeministrit më të korruptuar në Evropë, dhe fundin e ka të qartë!
Modelin e ka, dhe nuk ka arsye të rrezikoj si Ish-Kryeministri i Maqedonisë Veriut, Nikolla Gruevski që mezi u largua në Hungari; Madje mund ti bashkohet atij sa nuk është vonë, aty ku Edi Rama është shumë më i mirëpritur se çdo shtetar në botë, pas gjithë koncesioneve që i ka bërë homologut hungarez Viktor Orban, si me bankën OTP ashtu dhe kompanisë ONE që sot ka nën kontroll tregun e telekomunikimit dhe vetë komunikimin shqiptar!
Refuzimi i ofertës amerikane për pranimin e 120 mijë palestinezëve dhe lëshimin e gështenjës së ngrohtë amerikane në duart e rivalit të tij Sali Berisha e bënë më bindës këtë akt që mund ta ndërmarr Edi Rama, i cili jo vetëm që do të etiketohet si akt patriotik por do të realizoj dhe qëllimin e tij për hapjen e portës së historisë dhe vazhdimin e komunikimit me shqiptarët edhe nga një botë tjetër që i garanton jetë pa pranga dhe jashtë qelisë!
Këtë e bënë më bindës edhe fakti se kur rreth një muaj më parë pedagogu i Institutit Studimeve Evropiane, ISE, Ermir Gjinishi, e dha si informacion se gjeneralmajori palestinez Gibril Rajub i shoqëruar nga një zyrtar izraelit kishte takuar Edi Ramën dhe Sali Berishën, dhe u ishte bërë një kërkesë për blerjen e 20 mijë apartamenteve bosh vetëm në Tiranë ndërsa është menduar të vendosen mbi 100 mijë palestinezë në zonën Tiranë-Durrës, dhe kërkesa ishte pranuar nga të dytë por që do të konsiderohej pas zgjedhjeve, oferta mund të jetë bërë lehtësisht pjesë e zgjidhjes në kokën e Kryeministrit Rama! Sepse, kjo temë u bë së fundi çështje diskutimi edhe në Konferencën e Sigurisë në Munich!
Por, për ata që nuk i binden faktit se Edi Rama po e mendon largimin nga politika si patriot për shkak të palestinezëve, shpëtimin me më pak lavdi ai mund ta ketë menduar edhe pa fituar fare Donald Trump dhe pa u kujtuar askush për spastrimin etnik të Rripit të Gazës!
Vështirësitë ligjore për realizimin e marrëveshjes Meloni-Rama nuk ishin shqetësim i madh për Edi Ramën, por askush nuk mund të thotë se nuk ishin dhe shkëndija për ta menduar largimin nga politika nëse kjo marrëveshje dështon, pas asaj që ndodhi me Zv/Kryeministrin Arben Ahmetaj!
Jo, Edi Rama, por, nuk ka socialistë as qytetarë në Shqipëri që sot mendon se Tigri nuk është hajdut, por ai nuk u prangos nga SPAK përkundër dëshirës së madhe të opinionit publik, sepse u largua! Dhe, jo vetëm u largua por i dha rrugëzgjidhje edhe hallit të madh që e ka gjet Edi Ramën pas qeverisjes 12 vjeçare, ku çdo krim e korrupsion u zbulua dhe pritet shtimi i akuzave të të gjithë atyre që janë arrestuar ose janë në kërkim, me zyrtarizimin e firmës së Kryeministrit Rama, që deri më sot nuk u trajtua nga drejtësia.
Sot, kur Donald Trump është President i SHBA dhe Kryeministrja italiane Giorgia Meloni është e detyruar ta ndërroj politikën kundër imigracionit jo vetëm për t’ju bindur Kushtetutës së Italisë ose legjislacionit të BE, Kampi në Gjadër mund të shërbej për shumëçka por jo për qëllimin për të cilin është ndërtuar!
Dhe, të mos harrojmë lobimet e Edi Ramës për të drejtuar OSBE-në, NATO-n ose dhe Asamblenë e Përgjithshme të OKB-së! Edhe në këto situata, sondazhet e nxirrnin të parën Partinë Socialiste të Edi Ramës, ndërsa SPAK ende nuk vringëllonte me pranga, por, Kryeministri Rama ishte i interesuar të largohet nga politika shqiptare!
Në fund, për të gjithë ata që nuk duan as ta mendojnë si mundësi se Kryeministri Rama po kërkon një sebep për tu larguar nga politika dhe Shqipëria, pasi që në kokën e tyre vlejnë sondazhet aktuale që e renditin Partinë Socialiste të parën absolute me Kryetar Edi Ramën, dhe, i referohen Kushtetutës që nuk e pengon ta fitoi edhe mandatin e katërt, duhet ta kenë parasysh se po shpërfillin faktin se pushteti socialist 12 vjeçar me këtë Kryeministër ka mbijetuar vetëm falë blerjes së votave pas akteve korruptive që sot po i konfirmon edhe SPAK; E sa vlenë një Pushtet Socialist, shumë kohë më parë e ka sqaruar filozofi gjerman, Friedrich Nietzsche, përkufizim i cili ngjanë si dy pika uji me pushtetin e Edi Ramës:
“Socializmi shpreson të ekzistojë vetëm për një kohë të shkurtër aty-këtu, edhe atëherë me përdorimin e terrorizmit më ekstrem. Për këtë arsye ai përgatitet në mënyrë sekrete për një sundim përmes frikës dhe i ngul si gozhdë fjalën ‘drejtësi’ në kokë masave gjysmë të arsimuara, me qëllim që t’iu grabis arsyen, dhe për të krijuar tek ata një ndërgjegje të qetë për lojën e keqe që do të luajë.”
