Aktakuzë ndaj tetë personave për krime lufte në Gjakovë

Prokuroria Speciale e Kosovës ka ngritur aktakuzë ndaj tetë personave për veprën penale “Krime lufte kundër popullsisë civile” në Gjakovë.

Sipas aktakuzës, të pandehurit M.K, V.M., D.R., Z.D., C.B.,M.I.,S.S. dhe S.K, nga 24.03.1999 deri më 31.03. 1999, gjatë një operacioni të gjerë në qytetin e Gjakovës, duke vepruar në bashkëkryerje dhe në koordinim me struktura policore, ushtarake dhe paramilitare, kanë kryer vrasje, dëbim të popullsisë civile, shkatërrim dhe plaçkitje të pronës së tyre.

Ekziston dyshimi i bazuar, thekson Prokuroria Speciale e Kosovës, se gjatë këtij operacioni të forcave policore, paramilitare dhe ushtarake serbe janë vrarë 65 civilë dhe janë zhdukur 12 të tjerë.

Prokuroria i ka propozuar Gjykatës Themelore në Prishtinë mbajtjen e gjykimit në mungesë, meqenëse të pandehurit thuhet se janë të paarritshëm për organet e drejtësisë.

Prokuroria Speciale thekson se mbetet e përkushtuar në ndjekjen e rasteve të krimeve të luftës, me qëllim të sigurimit të drejtësisë për viktimat dhe forcim të sundimit të ligjit.