Ali Ahmeti dëshmon para Gjykatës Speciale në Kosovë

Kryetari i BDI-së, Ali Ahmeti, sot dëshmon para Gjykatës Speciale në Kosovë. Ahmeti është thirrur nga kjo gjykatë në cilësinë e dëshmitarit lidhur me luftën e Ushtrisë Çlirimtare të Kosovës gjatë viteve 1998-1999.

Pasi ka pranuar ftesën e prokurorëve që po hetojnë krimet e kohës së luftës dhe pasluftës nga luftëtarët e Ushtrisë Çlirimtare të Kosovës, AlSat raporton se Kryetari BDI-së ka shprehur dhe vullnetin e tij për ta dëshmuar çiltërsinë e luftës çlirimtare të popullit shqiptar përballë gjenocidit të regjimit serb.

“Gjithmonë kam qenë ithtar i drejtësisë joselektive dhe jam në dispozicion të tërësishëm të organeve të drejtësisë për ta dëshmuar çiltërsinë e luftës çlirimtare të popullit shqiptar përballë gjenocidit të regjimit serb të Millosheviçit,” ishte shprehur kohë më parë Ali Ahmeti.