Amerika foli, radhën e ka opozita!
nga Agim Popoci
Shpura mediatike e Kryeministrit Edi Rama nxitoi të minimizoi prezencën e Kryeministrit të Kosovës, Albin Kurti, në Konventën Kombëtare Demokratike në Chicago, dhe ta zhvlerësoi këtë Konventë, aty ku nuk ishte i Plotëfuqishmi i tyre!
Por, Amerika foli! Ftoi Kryeministrin e Kosovës, Albin Kurti, në Konventë dhe e uli në panelin e diskutimit “Konventa Kombëtare Demokratike dhe Roli i Partive Politike”, organizuar nga NDI, si pjesë e Forumit Ndërkombëtar të Liderëve 2024.
Askush nuk mund ta hapte gojën pse Edi Rama nuk ishte në Konventën Kombëtare Republikane edhe pse Kryeministri i Himarës, Shkodrës dhe gjithë Shqipërisë i fali Sazanin dhëndrit të kandidatit republikan për President të SHBA, Donald Trump, sepse, Edi Rama nuk e kishte dhe kurrë nuk do ta ketë vendin ndër republikanë; Por, mungesa e Edi Ramës ndër demokratë është një mesazh i qartë për Kryeministrin e Shqipërisë, patronazhistët e tij dhe gjithë shqiptarët!
Demokratët që pa të drejtë dhe të indoktrinuar nga propaganda e Partisë Socialiste, filluan të besojnë se në vitin 2025, meqë mori të gjitha pushtetet ndërsa opozitën e përçau, PD e ka të sigurt humbjen dhe sërish do jetë Edi Rama – Kryeministër, tashmë një portë shprese e kanë nëse duan t’a hapin! Mungesa e ftesës nga Presidenti Biden nuk tregon se Kryeministri i Shqipërisë nuk kishte mundësi të bëhej sërish gruaja e një taksisti amerikan dhe të futet në këtë Konventë, por, se Amerika nuk ja falë Kryeministrit të Shqipërisë si degjenerimin që i bëri Ambasadores së SHBA në Tiranë, Yuri Kim, duke e emërtuar edhe në publik si Sekretare e Partisë së Punës, njollosjen e imazhit të Agjencisë më të rëndësishme të sigurisë nën kujdesin e Presidentit të SHBA, FBI, me korruptimin e zyrtarit të saj Charles McGonigal, përvetësimin e autorësisë për “Saliun Non Grata” dhe ngritjen e SPAK-ut.
Ndërsa ulja në panelin ku u diskutua për Konventën Kombëtare Demokratike dhe Rolin e Partive Politike, nuk është ulje në një debat që thjeshtë e ka organizuar NDI, ajo NDI që ky llumi që për 11 vjet e shiste veten si Kryetar i Partisë Demokratike e reklamonte si një organizatë e miqve të tij dhe Kunatit!
Paneli nuk ishte i madh vetëm pse u shqetësua aq shumë Serbia dhe reagoi përmes Ministrisë së Jashtme ndaj NDI “pse i jepet mundësia Kryeministrit të Kosovës, Albin Kurti, për të promovuar politikën e tij të rrezikshme dhe agjendën etno-nacionaliste”! Nuk e bëri të madh panelin as shqetësimi serb për përdorimin e Konventës Kombëtare Demokratike nga Albin Kurti ndonëse “vazhdimisht minon politikën amerikane në Ballkanin Perëndimor dhe e tregon veten si një partner jo i besueshëm i SHBA-së”.
Paneli nuk ishte as i vogël, por, vend nuk kishte për Kryeministrin e Himarës, Shkodrës dhe gjithë Shqipërisë, Edi Rama, sepse për rolin e partive politike nuk mund të flas kundërshtari i zgjedhjeve të lira dhe të ndershme, promovuesi i mohimit të lirisë së shprehjes, lëvizjes biznesit dhe konsumatorëve, si dhe promovuesi i mirëqenies më të mirë duke kultivuar dhe trafikuar drogë, siç e pranoi projektin e Kryeministrit Rama, Ish-Zv/Kryeministri i kësaj qeverie kriminale!
Por, paneli i NDI ishte si gjithmonë në Kuvendin Kombëtar Demokrat epiqendra prej nga jepet mesazhi në sy të botës për Aleatët që kanë jo vetëm Demokratët, Shtetet e Bashkuara dhe Presidenti i SHBA, por, dhe Presidenti i ardhshëm i SHBA.
Pasi Amerika foli, dhe është e qartë se nuk e do Edi Ramën, radhën e ka opozita!
Demokratët që rrahin gjoksin mbi përkatësinë e tyre të djathtë dhe ca prej tyre edhe konservatore që shpesh i referohen zonjës së hekurt Margaret Thatcher, ndërsa nga ana tjetër ofendojnë Ambasadorin e SHBA në Tiranë, duke pretenduar sikur injoranti Edi Rama se sot si pjesë e politikës globale një Ambasador amerikan mund të trajtohet edhe si kinez ose Sekretar Partie, duhet ta dinë se “hekuri Thatcher” filloi të kalitet vetëm pasi vizitoi Shtetet e Bashkuara në vitin 1967 kur Ambasada e SHBA në Londër e përzgjodhi si pjesëmarrëse në International Visitor Leadership Program, program ky i cili jo vetëm i mundësoi që të shkëmbej përvoja dhe të njihet me personalitetet më të njohura të jetës politike amerikane; Dhe, jo vetëm kaq! Ndonëse nuk ishte as pjesë e Kabinetit Hije, përshkrimi që i bëri Ambasada amerikane Departamentit të Shtetit si Kryeministre e ardhshme, e ndihmoi Margaret Thatcher të takoi njerëzit më të rëndësishëm të çështjeve ekonomike.
Pas kësaj vizite në SHBA, Kryeministri në hije, Edward Heath, e angazhoi menjëherë në Kabinetin e tij në hije si zëdhënëse për karburante dhe energji elektrike; Dhe para zgjedhjeve të përgjithshme të vitit 1970 e emëroi zëdhënëse për transport, më pas për arsim, për ta emëruar shumë shpejtë edhe si ministre e Transportit në hije!
Çfarë ndodhi me Zonjën e Hekurt pasi fituan Konservatorët, nga Sekretarja për Arsim deri sa u zgjodh Kryeministre, nuk është histori por është një shkollë që patjetër duhet ndjekur kjo opozitë shqiptare e atrofizuar nga terrori i Edi Ramës!
Jo vetëm për të kuptuar se Edi Rama nuk do të rizgjidhet Kryeministër në vitin 2025, por, për të kuptuar se PD nuk ka pse i fiton zgjedhjet nëse nuk e ka mbështetjen e Amerikës!
Kohë për të humbur nuk ka, dhe aty ku Margaret Thatcher u këshillua në hapat e parë të qeverisjes, Institute of Economic Affairs, IEA, sot vërtetë nuk është Antony Fisher me bashkëpunëtorët e tij që kanë ndërruar jetë, por, sot, për fatin e mirë të Shqipërisë ka dhe eksperte shqiptare, që këtë ekonomi të shkatërruar nga Edi Rama mund ta ngritin në këmbë!
Në fund, Demokratët duhet të pushojnë së diskutuari dëshpërimisht për humbjen e vitit 2025 dhe të fillojnë një orë e më parë fushatën e motivimit të të gjithë atyre që për shumë arsye nuk dalin fare për të votuar, dhe, nuk janë pak, më shumë se gjysma e elektoratit!
Ndërkohë Kabineti hije të krijohet dhe filloi hartimin e Planit Qeverisës që ngjallë shpresë, dhe, pa humbur kohë nis me kolaudimin e Qeverisë e cila me fitoren e zgjedhjeve të vitit 2025 do të jetësoi projeksionin e pakundërshtueshëm të IEA: Qeveri të vogël, tatime të ulëta, dhe, më shumë liri për biznesin dhe konsumatorët!
