Anës SPAK-ut i palarë, anës Censit i paparë!
nga Agim Popoci
Pas hedhjes së lajmit në pazarin mediatik mbi fletëarrestin e firmosur nga SPAK për Kryetarin e Bashkisë Tiranë, Erion Veliaj, gjithçka filloi të bubërroj ndonëse ishin orët e vona të mbrëmjes, si në kabinetin e Lali Erit, atë të Belinda Ballukut, BKH-së, GJKKO-së dhe vetë SPAK-ut që u trondit se si u dekonspirua operacioni!
Gdhiu dita, Lali Eri dëgjoi vringëllimat e prangave por vazhdoi të ishte i lirë, madje u shfaq në Zvicër ndërsa nderi i SPAK-ut u mundua të mbulohet me lajmin se nuk ishte Lali por Likja që do të arrestohej! Por kot, asnjë medie nuk u peshkua, madje as portalet që përveç se copy-paste asgjë në këtë botë nuk dinë të bëjnë!
Dhe, u prek teli i akordit më të ndjeshëm të opinionit publik, jeta, e cila nga viti 2013 vazhdon dhe lëviz në fije të perit të shtetit të Edi Ramës, as i gjallë as i varrosur!
Skandal në Spitalin e Onkologjisë në QSUNT! Lajmi mori dhen, u publikuan përgjimet dhe korri i popullit liridashës filloi të mallkoj ca mjekë kriminelë që pa u skuqur fare bëjnë pazare me jetë njerëzish për tu kredhur në Maldive!
Ca servilë mediatik të Edi Ramës filluan të hapin arkivat që ta mbulojnë me devotshmëri turpin e SPAK-ut, duke bërë histori mbi luftën që e filloi kjo qeveri për mjekët e korruptuar, por, autogoli u bë ende pa dalë para gjyqit dy mjekët e kryqëzuar, Edmond Gashi dhe Alketa Ymeri; Asnjëri prej tyre nuk ishin në listën e kryqtarëve socialistë që u pagëzua Skuadra e Shënimeve!
Nga dolën të korruptuar këta mjekë, pse duhet vënë në dyshim shëndetësia falas, pse nuk u trondit mileti me ilaçe dhe pajisje të blera që u zbuluan, ishin disa nga pyetjet që po i mundonin strategët rilindas të Edi Ramës që kishin filluar të fundosen në baltën shumë të qullosur për 11 vjet, dhe pandehur një dorë të mirë po i jep një mjek ordiner që përveç se hajdut i pakompleksuar, tashmë është infektuar edhe nga harbutëria shumëvjeçare e pushtetit komunist!
Dalja para gjyqit, dhe ikja e një mjeku kriminel prej duarve të policëve drejt lirisë nuk ishte diçka e jashtëzakonshme që po bënin zyrtarët e Edi Ramës edhe pas krijimit të SPAK-ut, por, vëmendja mediatike që kishte krimi në Onkologjik i ra kokës jo vetëm mjekut që nuk respekton “arrestin e shtëpisë” dhe bredh kafeneve edhe në sy të policëve, por edhe Altin Dumanit, i cili të vetmin njeri që e arrestoi deri më sot pa kompromis ishte lideri i opozitës Sali Berisha, me pretekstin se kishte bërë një akt të paparë, kishte shkel masën e arrestit!
Sikur edhe ti mbyllim sytë nga masat e shkelura të arrestit për zyrtarët e shumtë të Partisë Socialiste dhe përmbaruesve që u arrestuan për show mediatik ndërkohë që ata filluan të punojnë në zyrat e tyre pa lindë dita e re, Dr.Edmondi i shkul sytë SPAK-ut i cili u mundua ti heq ca vetulla për ta verbëruar paksa opinionin publik!
Dhe, jo si në rastin e liderit të opozitës, Sali Berisha, mjekut të famshëm të Onkologjikut nuk iu dha as një masë më e ashpër! Apo, harruan shqiptarët se patronazhistët nuk gjobiten!
Kështu, Onkologjiku bëri zhurmë, por, nuk arriti ta vendos në vend nderin e SPAK-ut sepse dolën ca tipa nga sistemi që filluan të mbrojnë edhe mjekët se fajin na e paska sistemi, e ca zhurmues të na tregojnë se ajo që ndodhi në Onkologjik ndodhë në çdo spital, madje edhe në këto spitale ku ministrja e Neverisë këto ditë po i vë drynin; E populli liridashës shqiptarë, si zakonisht, filloi ti besoj përgjithësimit!
Ndërsa Enveri mos o Zot të preket, ashtu siç ndodhi nga viti 1944! E si të preket, ku ta dinte i shkreti se si po shiteshin ilaçet shtetërore në farmacitë private, si nuk funksiononin pajisjet dhe si drejtoheshin pacientët në klinikat private, në Shtetin Onkologjik, ku Shëndetësia është Falas! Pse nuk e dini ju, po faji është individual dhe jo koncesionar ku përbuzen qindëra miliona euro!
E harruat ju këtë marrëzi veneciane…
Ndërkohë strategët e Edi Ramës për trurin shqiptar u shqetësuan sepse populli me rrahje zemre të përmbytur nga rakia, që javën e ka sa një shekull, duhet të tronditet kohë pas kohe në mënyrë që dështimin e SPAK-ut mos ta çojë nëpër mend; Dhe, kjo nuk po i ndodhte me dështimin e prangosjes së Lali Erit meqë Onkologjiku nuk i la fortë vragë në psikikën e tij të ndryshkur nga komunizmi; Situata u bë serioze, duhet të shpëtoj nderi i SPAK-ut edhe pse e ka BKH-në që vazhdon dhe e thotë me zë të lartë se nuk e pjerdhë që është gjallë!
Për një çast strategët u kujtuan se kanë Censin, i cili ka 9 muaj që po mbllaçitet në Instat dhe nuk po mbyllet dot me rezultatin e zgjedhjeve që kanë sajuar në zgjedhjet e vitit 2021 dhe 2023!
E hodhën në tregun mediatik, publikuan numrin e popullsisë dhe filluan ti mëshojnë idesë se përveç se rezulton sipas Censit 2023 se janë 2.4 milionë, as 50% nuk janë myslimanë ose vetëm 1.1 milionë, 202 mijë janë të besimit katolik, 174 mijë të besimit ortodoks etj. Por, shpërfillën një detaj shumë të rëndësishëm, në pushtet nuk është Sali Berisha; Pra, komunitetet fetare nuk drejtohen nga besimtarët, nuk ka kush të reagoi!
Dhe, kjo përpjekje e Edi Ramës për të zhvendosur vëmendje nga dështimi i SPAK-ut përmes përdorimit të politikës fetare dështoi madje jashtë planifikimit strategjik të propagandës komuniste, buçitja e Censit 2023 u përplas me protestën para Bashkisë Tiranë me kërkesën për arrestimin e Lali Erit!
Kështu, java u përmbyll aty ku u la, te SPAK-u dhe arrestimi i Lali Erit, sepse edhe drejtuesja e Instatit e pranoi atë që e kishte deklaruar edhe Eurostat se në shtetet e BE, pa përfshirë Mbretërinë e Bashkuar, Kanadanë dhe Shtetet e Bashkuara, për 10 vjet kanë kërkuar azil politik 1 milionë shqiptarë, 500 mijë prej të cilëve e kanë fituar dhe të tjerët janë në proces; Argument që rezultatin e Censit 2023 e bënë nul!
Sepse, nuk ka shqiptarë në këtë tokë, për të qenë korrekt duhet të përjashtohet Lulzim Basha, që mund ti bindet matematikës së Edi Ramës, SPAK-ut dhe Yuri Kim, se nga Shqipëria me 2.8 milionë sa ishin në vitin 2011, kur kanë ikur ndërkohë 1 milionë shqiptarë, tashmë kanë ngelur 2.4 milionë!
Në fund, a mund të arrestohet Likja para se të bie gongu për fundin e kësaj fundjave, dhe, të filloj java e re në këtë Shtet Onkologjik?!
Askush nuk mund ti vë duart në zjarr siç i vinte Kryeministri Edi Rama për Lulzim Bashën, por, as kjo nuk do ta kthejë në vend nderin e SPAK-ut; Madje, nderi i Prokurorisë së Posaçme nuk do të kthehet në vend sikur të plotësohet edhe dëshira e Zv/Kryeministres Belinda Balluku!
Gjithsesi, para dhe pas këtij gongu, shqiptarët po lënë këtë javë me një SPAK të pistë, Shëndetësi kriminale ashtu siç ishte, dhe, shifra të Censit që nuk i kopsitë dot as matematika e Arben Ahmetajt, por, që mund të përshkruhet me një perifrazim të vargjeve të kryeministrit të parë bolshevik shqiptar:
Ku e lam’ e ku na mbeti,
Vaj-vatani e mjer mileti,
Anës SPAK-ut i palarë,
Anës Censit i paparë!
