Apologjia e Kapitenit të Titanikut rilindas!
nga Agim Popoci
Pasi dështoi me projektin më të madh të shkatërrimit të opozitës, SPAK, pasi u përballë me një pakënaqësi të përpjekjes për mashtrimin e pensionistëve me një bonus pas 12 viteve të betejës së tyre me uri, pas kundërshtimit të paimagjinueshëm me mbylljen e rrjetit social TikTok, dhe, së fundi, një irritimi popullor me uljen e çmimit të energjisë për 1 Lekë, Kryeministri Edi Rama bëri gati Titanikun e tij rilindas për t’u nis drejtë Diasporës Shqiptare në mënyrë që të përmbysë shifrat e sondazheve që po i konfirmonin një humbje të qartë më 11 Maj!
Ndërkohë shpalosja e Programit të Partisë Demokratike nga Kryetari i PD, Sali Berisha, vetëm në tre pika, çorientoi grafikun politik të Edi Ramës që e detyroi këtë fundjavë të shfaqet me një Apologji, pasi Titaniku i tij filloi të fuste ujë ende pa u nisur në lundrimin e fitores drejt Diasporës Shqiptare, pasi u përplas me një ajsberg që tashmë është gjigant: Realiteti!
“Ligji nuk është ajo që është e drejtë, por ajo që urdhërohet”, e ka thënë shumë kohë më parë filozofi i parë i shkencave politike, Thomas Hobbes, për të cilin elektorati i Edi Ramës si komunistë që janë, me siguri se nuk kanë dëgjuar, por, po shohin lidershipin e partisë së tyre që më shumë kishte frikë kur Fatos Nano filloi Katarsisin e tij në KPD-në e famshme në fillim të viteve 2000 dhe shumica prej tyre ishin zyrtarë të thjeshtë të Bashkisë Tiranë, se sa sot që janë ministra dhe akuzohen për vjedhje, drejtësia është e reformuar dhe SPAK-un që orë e çast, Kryeministri thotë se e themeloi Partia Socialiste dhe po e lufton pandëshkueshmërinë! Madje, pavarësisht se ministrat dhe kryebashkiakët e Edi Ramës parakalojnë në SPAK, oreksi i tyre për të vjedhur sa shkon e shtohet!
Dhe jo vetëm kaq! Mileti komunistë tashmë po e kupton edhe pse ekziston SPAK, pse arrestohen liderët e opozitës dhe pse parakalojnë ministrat dhe kryetarë te bashkive socialiste dhe nuk u sekuestrohet prona e vjedhur, pavarësisht që nuk e kanë lexuar as Hobbesin dhe as historianin athinas të cilin e ai e përktheu, Tuqididin, dhe i cili thotë: “Drejtësia është vetëm çështje e forcës; të fortët bëjnë atë që munden dhe të dobëtit vuajnë atë që duhet!”
Por 12 vjet janë shumë, dhe Edi Ramën nuk e ndihmon as Apologjia e së dielës që mori si sebep vendimin e SPAK-ut në shërbim të vëllait të tij Olsit, nëse opozita nuk peshkohet në këtë Apologji, me kujtimet e së cilës ai pretendon ta fus Partinë Demokratike në anijen e tij që po mbytet!
Edi Rama tha se nuk ka vjedhur dhe kujtoi akuzat e Partisë Demokratike dhe liderit të saj Sali Berisha, që me ndihmën e drejtësisë komuniste u shndërruan në shpifje, duke përfshirë dhe propagandën e fundit të SPAK për shoferin e prodhuesve të kokainës së Xibrakës!
Çuditërisht, në këtë Apologji nuk kujtoi akuzat që janë bërë nga partia e tij e dashur e që nuk i ka përgënjeshtruar! Hajdut i ikonave u akuzua nga lideri i tij Fatos Nano, 20% që merr për lejet e ndërtimit si Kryetar i Bashkisë Tiranë u akuzua nga Shoqata e Ndërtuesve që është kontrolluar dhe kontrollohet nga Sigurimi i Shtetit, dhe, së fundi, kanabizimi i Shqipërisë me urdhër të tij dhe pronari faktik i Inceneratorit të Tiranës, akuzë të dala nga goja e Zv/Kryeministrit të tij, Arben Ahmetaj!
Ndërsa ish-akuzat e PD që renditi në Apologji, shëndetin mendor si dhe orientimin seksual, pavarësisht se i hodhi si karrem sepse dëshiron një PD që flet për perversitetet e tij dhe jo ofertën për minimum jetik prej 200 eurove, çmimin e naftës pa taksat e çmendura komuniste, energjinë elektrike 7 lekë dhe eksportuesit që nuk do të vuajnë më nga zhvlerësimi i lekut për shkak të ardhurave nga trafiku i drogës, tashmë është e qartë se përveç se nuk i sjellin votë asnjë partie antikomuniste, ato i duhen vetëm Edi Ramës para udhëtimit të tij të fundit me Titanikun rilindas për të kumbuar me zërin e tij që deri më sot nuk lëshoi asnjë fjalë të vetme lidhur me një program që do të qeverisë, përveç se refrenin që pasonte pas lodhjes së duarve mbi tenxhere e dajre: Fajet i ka Saliu!
Apologjinë e dëgjuan shqiptarët, dhe nëse nuk peshkohet rivali i tij që e ka lënë pa gjumë ndërsa Titaniku ka filluar t’i fundoset pa u nisur drejt Oqeanit Atlantik për të takuar Diasporën Shqiptare në SHBA, aty ku Sigurimi i Shtetit ka patronazhistë me shumicë ndërsa operojnë me satelitët e tyre në Greqi, Itali, Belgjikë dhe Angli, Kapitenit të kësaj anije gjigante komuniste, Edi Rama, nuk i duhet ajsbergu sepse anijen e goditi me dorën e vetë në kalatë sapo mori pushtetin në vitin 2013, kur për ekuipazh përzgjodhi krimin!
Për minimumin jetik, çmimin e energjisë elektrike, çmimin e naftës dhe eksportet, si oferta të Partisë Demokratike sot, as Edi Rama dhe as Partia Socilaiste nuk kanë se si t’i premtojnë sepse ishte Rama dhe PS që me ardhjen në pushtet i shkatërruan si faktorë ekonomik dhe që për taksiratin e Kryeministrit Rama ndikojnë direkt tek xhepi i qytetarit!
Në fund, sa i përket qelibarit Edi Rama, për të cilin ai foli në Apologjinë e Kapitenit të Titanikut rilindas, folozofi i njohur gjerman Friedrich Nietzsche e ka sqaruar shumë kohë më parë kur nuk kishte as agjent të FBI që blihen si Charles McGonigal, as Ambasador që lejojnë të përdhosen si Yuri Kim, as Arben Krajë dhe Altin Duman që lejojnë të përdoren nga një piktor që u bë Ministër Kulture sepse me Artin nuk kishte lidhje, u bë i pari i qytetit sepse nuk kishte edukatë qytetare, dhe u bë Kryeministër sepse nuk e bëri dot ministrin dhe ndaloi te bojaxhiu i ministrisë:
“Mos u besoni atyre që flasin shumë për drejtësinë e tyre!”
