Arkivi Qendror Shtetëror me vendruajtje të re në Shkozë

Arkivi Qendror Shtetëror tashmë ka një vendruajtje të re në Shkozë, e ndërtuar sipas të gjitha standardeve bashkëkohore të ruajtjes dhe sigurisë së dokumenteve. Dhe jo vetëm kaq!

Drejtoria e Përgjithshme e Arkivave, DPA, thotë se kjo vendruajtje përmbush të gjitha kërkesat specifike për një konservim dhe akses të dokumentacionit në lidhje me historinë, kujtesën dhe të drejtat e të gjithë qytetarëve.

Para Kryeministrit Edi Rama, i pranishën në përfundimin e këtij investimi strategjik, Drejtori i Përgjithshëm i DPA, Ardit Bido, tha se në këtë vendruajtje të re janë disa parametra që bëjnë diferencën: 

“Sistemi i cili mundëson që ne të ruajmë në kushte optimale gjithccka, që të mos kemi rrezikun ndaj zjarrit, të mos kemi probleme me lagështirën, se lagështira është më e tmerrshme për dokumentin se vet zjarri. Në aspektin afatgjatë dhe degraduese, e shkatarron dokumentin në mënyrë pa kthim, tashmë kemi sensor lagështie automatike, kemi gjithashtu sistemet e fundit ndaj shuarjes së zjarrit,” tha Drejtori i Përgjithshëm i Arkivave, Ardit Bido, duke shtuar se do të shohim si ndryshon nata me ditën mënyra se si do të ruhet dokumentacioni arkivor.

Ndryshe, vendruajtja e re e Arkivit Qendror Shtetëror ka sipërfaqe rreth 1850 metër katrorë, me dy kate, e ndarë në 8 hapësira (depo) të krijuara posaçërisht për konservimin dhe ruajtjen e dokumentacionit. Kapaciteti është rreth 75 mijë kuti me dokumentacion historik, gjë që e sigurojnë raftet lëvizëse me parametra optimalë.

Ato janë depozitat e magazinimit të dokumentacionit që ruhet në fondet e DPA-së. Gjithashtu në katin e parë ka hapësirë për sektorë të ndryshëm të brendshëm të punës për stafin e institucionit.  

Pas këtij investimi, kjo godinë zgjidh përfundimisht një nga problemet që institucioni ka hasur për më shumë se 30 vjet, mungesën e hapësirës dhe kushtet optimale për ruajtjen dhe sigurinë maksimale të dokumentacionin.