Berisha publikon biletën e avionit të Erion Veliajt! Rama: I cenohet jeta familjare nga gjyqi publik!

Duke e konsideruar si problem të ditës sot Kryetari i Partisë Demokratike, Sali Berisha, ka publikuar edhe biletën e e avionit të Kryetarit të Bashkisë Tiranë, që konfirmon se Erion Veliaj ka ikur drejt Washingtonit më 28 dhjetor dhe do të kthehet më 18 Janar; Por, si me publikimin e njoftimit nga SPAK mbi hetimet dhe akuzat ndaj tij ashtu dhe publikimet tjera, Kryeministri Edi Rama i konsideron linçim publik që rrezikon jetën familjare.

“Natyrisht nuk mund të mos ndalemi tek problemi i ditës. Unë kam këtu, u kam sjellë këtu, është bileta e Erion Veliajt, i cili thotë se është nisur me datën 28 dhe e ka kthimin me datën 18 janar.
Skema e përdorur, cilido që ka ABC-në e kodeve dhe ligjeve, ishte mbathja se të arrestuam.
Prokuroria në mënyrë bizare, deklaron se i kemi të vërtetuara, unë e di që kanë të vërtetuara, se kanë dokumentet dhe llogaritë bankare të fshehta të tij, i kanë pasuritë, i kanë mashtrimet, se ai thotë më tradhtuan, keni bërë deklarata nën presion, aludon për vjehrrën, Velicën, nuk e di për kë aludon, e vërteta është se në seancën 5-orëshe në prokurori ka rrëzuar çdo gjë që ka mashtruar në seancën 8-orëshe para disa muajsh.

Dhe tani kërkon të fajësojë Velicën dhe vjehrrën, ky i ka bërë vetë, sepse del që kanë renditur aty, thuhet se kanë renditur të paktën minimumi 60 mashtrime, duke krahasuar dëshminë e parë me dëshminë e dytë të tij. Mohimet e dëshmisë së parë dhe faktimet e dëshmisë së dytë.
Pastaj thotë ma bënë me hile, më thanë je person për dijeni dhe nuk më thanë se je person në hetim. Ku ka hile kur shkon e mashtron aty, thua nuk kam llogari bankare, nuk kam këtë, nuk kam atë, çfarë hile ka aty.
Ligësia e tij ekstreme është se ai po mbush komunitetin ndërkombëtar se po persekutohem nga Sali Berisha, e tëra kjo vetëm e vetëm që të marrë statusin e azilantit politik.
E ka kërkuar apo nuk e ka kërkuar, këtë nuk mund ta them, biletën ja ku e keni.
Në deklaratë tha se do kthehet sot, për dy ditë. Si do shkonte për uikend ai? A ka marrë ai kontakte me vendet e Amerikës Latine apo vendet nordike, ato nuk i di se nuk merrem me gjërat që qarkullojnë,” tha Sali Berisha ndërsa kishte një thirrje për organet ligjzbatuese të SHBA, që të marrin çdo masë për rikthimin e Erion Veliajt në Shqipëri.

“Por merrem se nuk më ka pëlqyer fare skema që ka përdorur, ik, mbathja i thonë, kurse Ilir Metën e merr dhe e zvarrit në mes të rrugës pa asnjë akuzë konkrete.
Kurse këtij me 4 akuza që rëndojnë nga 25 gjer 40 vjet burg, gjersa ti nuk përcakton masë sigurie dhe nuk e di sepse thonë se nuk janë lejuar, por një gjë është e sigurt se ky është pas Edi Ramës, hajduti më i madh i Shqipërisë, Ballkanit dhe më gjerë.
Tani ka deklaruar se për dy ditë jam në Tiranë, sikundër iu bëj thirrje organeve ligjzbatuese në SHBA të bëjnë gjithçka për rikthimin e tij në Tiranë në qoftë se ai tenton të kërkojë në këtë vend apo në atë vend azil politik. Nuk mund të përdorë SHBA për akte të tilla fugjitive.
Kë do takojë ai atje?
Këtu në bashki ka deklaruar se unë po shkoj se këtu nuk e zgjidha dot, ta zgjidh atje. Çfarë do zgjidh ai atje? Duke kompromentuar kështu edhe mbrojtës.
Departamenti i Shtetit kishte këtu një zëvendësndihmëssekretar, erdhi kastile për çështje të korrupsionit. Çfarë don ky që shkon atje?
Ndaj dhe thirrja ime është për organet ligjzbatuese të SHBA, të marrin çdo masë për rikthimin e tij në Shqipëri nëse ai tenton të devijojë fluturimin apo të zgjasë kohën e qëndrimit,” tha Kryetari i Partisë Demokratike duke fol në Konferencën e fundvitit ndërsa shtoi se SPAK gjeti një çështje që s’ka lidhje me Ramën dhe e kllaposi Veliaj.

“Erion Veliaj e paraqiti veten kudo si pasardhësin e Edi Ramës, gjë e cila tmerroi Ramën dhe Linda Ramën, që ti themi gjërat siç janë. Dhe kjo nuk mund të pranohej. Në raste se kujtoheni ju, dy vjet më parë, Edi Rama dërgoi Belindën si të deleguar të PS-së për Tiranën, por çfarë ndodhi? E tërhoqi, po, po.
Tani për të mos e zgjatur shumë, lexo pak çfarë i tha Rama Zërit të Amerikës. Zërit të Amerikës i tha se, çdo njeri mund të hetohet. E bëri si çdo njeri atë, e shumëzoi me afër zero. E bëri me gjysëm hiçi. Por jo çdo njeri që hetohet, fajësohet. E lëshoi komplet.
Tani, Rama i bëri. Është i rrezikshëm ai. Rama e mbrojti atë. Tani të themi atë që është, gjëja më e tmerrshme është djegësi që nuk ekziston, dhe që ai nuk ka një akuzë. Nuk guxuan ti bëjnë një akuzë të vetme. Ka 13 akuza, 13 herë citohet Arben Ahmetaj, për djegësin, përgjegjësi të gjitha të Erion Veliajt dhe ja veshën atij.
Po kështu ‘5D’. Pra kësaj i thonë, ‘bukën e kripën e kemi bashkë, duhanin ndamas’. I gjetën një çështje që s’ka lidhje me Ramën dhe e kllaposën, ik tani. Pra nuk ka asnjë kundërshti këtu,” tha Kryetari i Partisë Demokratike, Sali Berisha. duke përfunduar:

“Rama me çështjet që i ka ngritur së fundmi, nuk ka lidhje, se i ka pasur të fshehta ky. Se unë nuk mund të them se, dinte Rama se blinte Velica, 800 mijë apo 1 mln euro fustane. Mos shkojmë gjer në gjëra të tilla. Nuk i dinte Rama këto. Ka kohë gjithmonë, për votën e lirë ka kohë gjithmonë.”

Por, vetëm pak çaste pas përfundimit të konferencës së fundvitit të liderit të opozitës, temë e pashmangshme edhe në konferencën e fundvitit të Kryeministrit Edi Rama ishte akuza ndaj Kryetarit të Bashkisë Tiranë, Erion Veliaj, por që u trajtua ndryshe nga shefi i Lali Erit të arratisur.

Fillimisht Kryeministri Rama u pyet për personin misterioz Nesti Angoni, i cili sipas Lali Erit ka kallëzuar Kryetarin e Bashkisë Tiranë në Prokurorinë e Posaçme.

“Mos më shtyni në këtë ngasje. Është shumë specifik ky rast për shumë arsye. Nuk kam asnjë koment. Nuk kam parë asnjë akuzë konkrete për persona konkretë, kam ndjekur por s’kam parë. Unë personalisht nuk dua të bëj asnjë koment dhe natyrisht asnjë përfaqësues i PS nuk është i lejuar të bëjë asnjë koment. Do shikojmë procesin që siç po e ndiqni ju me vëmendje dhe uri të madhe, ne pa uri, por me vëmendje po e ndjekim me shumë kujdes,” tha Edi Rama duke folur për një linçim publik të neveritshëm të Erion Veliajt:

“Përkohësisht di që Veliajt i cenohet jeta e tij familjare nga gjyqi publik i bërë nga të gjithë ata që janë angazhuar në të. I cenohet dinjiteti nga prokurorë e gjykatës të ulur nëpër klube mediatike apo të fshehur pas ekraneve të portaleve. Këtë e di me siguri! Linçimi publik është i neveritshëm, kërkimi i gijotinës për të është skandaloz!”

Ndryshe, aktualisht nuk dihet se kur do të kthehet në atdhe Kryetari i Bashkisë, Erion Veliaj, ashtu siç tha ai vetë pas dy ditësh dhe nuk u kthye, ashtu siç tha lideri i opozitës më 18 Janar apo kur të marrë lejen për paprekshmëri, por shmangien nga linçimi publik dhe cenimin e jetës e kishte në dorë vetë Lali Eri: Të mos ngatërrohej me korrupsionin dhe aq më pak me krimin!