Bindja jocivile!
nga Agim Popoci
Partia Demokratike hoqi nga priza Mosbindjen Civile! Marrëveshja e PD me partinë e Edi Ramës u përshëndet nga Ambasada e SHBA dhe BE, dhe u kundërshtua zëshëm nga deputetët e Lulzim Bashës që deri në këtë moment ishin zyrtarisht opozita e këtij vendi që trumbetonte bashkëpunim pakushte me përfaqësuesit e Washingtonit dhe Brukselit në Tiranë!
Një pjesë tjetër e botës opozitare ndonëse nuk i jepet zëri të flas, sapo e kuptoi se Mosbindja Civile ishte veprim i duhur politik që u finalizua me gjunjëzimin e Edi Ramës, dhe kishte rastin të dëgjoj se çdo marrëveshje me PS-në që bënë Lulzim Basha është marrëveshje por çdo marrëveshje që bëjnë ata të Sali Berishës qenka Pazar, u përballën dhe me një Bindje Jocivile të deputetëve demokratë që arritën Marrëveshjen, se ajo është një sukses shumë i madh.
Për ata që mendojnë se është i mjaftueshëm reagimi amerikan se “SHBA nxisin deputetët të vazhdojnë të tregojnë përkushtim ndaj demokracisë në dobi të popullit shqiptar,” dhe ai evropian se “BE vlerësojnë lidershipin dhe përgjegjësinë e treguar nga palët në arritjen e marrëveshjes”, që Marrëveshja PD-PS të quhet arritje, janë shumë të gabuar, si dhe për ata që mendojnë se ajo nuk ka kurrfarë vlere!
Me vrasjen e opozitës në jetën parlamentare shqiptare nga Edi Rama, Mosbindja Civile ishte mekanizmi i vetëm që kishte në dorë Partia Demokratike për të vazhduar të qenurit prezent në Parlamentin e Shqipërisë, ndonëse nuk ishte aq bindës për opinionin opozitar!
Nisma nuk ishte aq e lehtë për realitetin e krijuar politik, ku nga njëra anë nuk ishte e sigurt nëse të gjithë deputetët opozitar do ti qëndronin deri në fund aksionit të bllokimit të jetës parlamentare, dhe, nëse Kryeministri Edi Rama do ti përulet kësaj lloj proteste që ishte me shumë pikëpyetje, dhe askush nuk ishte i sigurt se si do të pritet nga ndërkombëtarët që e kishin pranuar opozitën e Lulzim Bashës, e zyrtarizuar nga po kjo mazhorancë!
Por, ja që kjo Mosbindje Civile detyroi Edi Ramën të tërhiqet dhe të ulet me këtë grupim që nuk e konsideronte as opozitë dhe e përmbyti me dënime si shkelëse e Rregullores që e kishte miratuar për qejfin e vetë! Dhe, pas Mosbindjes Civile të Grupit Parlamentar të PD që mbështet Sali Berishën, ishte Edi Rama qëu detyrua që në po këtë marrëveshje ta konsiderojë si “dakordësim mes mazhorancës dhe opozitës” duke e fshirë nga faqja e dheut aleatin e tij besnik që deri në atë moment e konsideronte opozitë, Lulzim Bashën!
Ndërkohë, Lulzim Basha që i shërbeu kësaj mazhorance, në mënyrën po aq të paturpshme ngriti kokën dhe kundërshtoi këtë mënyrë të të bindurit të Edi Ramës nga, ai që ky llum parlamentar e ka si refren politik “non gratës”, duke ju referuar Sali Berishës!
Këtu kapaku nuk mund t’i vihet gjithë këtij turpi politik shqiptar, pasi Marrëveshja nuk është se u finalizua si produkt i Mosbindjes Civile, por, si produkt i cili e ka të domosdoshme vijimësinë me një Bindje Jocivile nga palët që e firmosën!
Nuk ka opozitar shqiptarë mbi këtë tokë që e ka menduar se Mosbindja Civile e deputetëve demokratë në parlament do të përfundoj me pranimin e tetë Komisioneve Hetimore, por askush nuk mund të bindet, aq më pak në mënyrë jocivile se Komisioni Hetimor për Koncesionet e Sterilizimit dhe Chack-upit, dhe Komisioni Hetimor për trajtimin e të dhënave të sistemit TIMS, janë tetë Komisione Hetimore!
Nëse kësaj i shtohet dhe fakti se këto Komisione Hetimore do të funksionojnë në përputhje me Ligjin i cili u miratua në kohën kur deputetët demokratë ishin duke protestuar, kjo e bënë Bindjen Jocivile më të komplikuar për deputetët demokratë që sot proklamohen edhe të bashkuar!
Qershia mbi tortë e kësaj Marrëveshje për ata që e proklamojnë si sukses dhe llumi i deputetëve të Lulzim Bashës që e konsiderojnë si arsye pse u braktisën nga Edi Rama dhe u bë Marrëveshja me Sali Berishën, është Reforma Zgjedhore!
Kur Komisioni i Reformës Zgjedhore kishte orët e numëruara dhe mendimet e Partisë Socialiste dhe Edi Ramës rreth kësaj çështje ishin të qarta, Partia Demokratike duke konfirmuar arritjen e Marrëveshjes nisi Bindjen Jocivile duke argumentuar para demokratëve se është Nënkomisioni i Ligjeve ai cili do të përmbushë qëllimet e kësaj partie përkundër mospranisë së tyre gjatë punimeve të këtij Komisioni ku deputetët e Lulzim Bashës kishin Bashkëryetarin!
Partia Socialiste që u detyrua të ulet me Partinë Demokratike në negociata, nxitoi të sqaronte se në Komisionin e Ligjeve do të krijohet një mekanizëm dialogu për ligjet me 3/5 dhe ato që kanë lidhje me çështjet e integrimit europian!
Dhe, në mënyrë jocivile, edhe llumi i deputetëve të Lulzim Bashës vazhdon përpjekjet për të bind opinionin opozitar se ishin vetëm ata të denjë që do të bënin Reformën Zgjedhore dhe do të garantonin Shqipërinë në një zonë zgjedhore, listat e hapura dhe votën e diasporës!
Janë shumë subjekte parlamentare dhe joparlamentare që mund të premtojnë këto reforma, por, kur këtë e bënë grupimi me në krye Lulzim Bashën kjo nuk është më bindje jocivile, aq më shumë kur ky llum politik i referohet edhe moralit!
Njëra ndër arsyet pse u ngrit çadra në vitin 2017 kur Partia Demokratike drejtohej nga Lulzim Basha ishte Reforma Territoriale, dhe sot me një zonë zgjedhore ky llum mundohet në mënyrë civile të na bindë se një zonë zgjedhore është zgjidhja; Dhe, ndonëse Edi Rama në vitin 2021 në mënyrë të njëanshme rrëzoi çelësin e fitores së PD me Kodin e miratuar Zgjedhor në sy të Amabsadores së SHBA, duke anuluar koalicionet parazgjedhore, sot thotë se është garant i Reformës Zgjedhore!
Në fund, Bindjes Jocivile i shtohet dhe anomalia politike që fitimtarët demokratë mendojnë se është çelësi i zgjedhjeve të lira dhe ndershme që pritet të zhvillohen në vitin 2025, Qeveria Teknike!
Viti 2017 dëshmoi se Qeveria Teknike është kallauzi i vetëm i Edi Ramës për ti quajtur zgjedhjet të lira dhe të ndershme, ndërsa zgjedhjet e vitit 2021 konfirmuan se me strukturën shtetërore që ka ngritë Sigurimi i Shtetit, pavarësisht Kodit Zgjedhor, votës së diasporës, listave të hapura, dhe broçkullave që dalin nga goja e Lulzim Bashës dhe Gazment Bardhit dhe janë thjeshtë Bindje Jocivile, fitoren Edi Ramës e garanton vetëm ndarja territoriale aktuale dhe sistemi i numërimit të votës!
Ndryshe, Partia Demokratike duke heq nga priza Mosbindjen Civile me kushtet që pranoi, ideoi një dramë shumë më komike se ajo e dramaturgut të njohur anglez, Eric Idle, “Hiqe ministrin nga priza”!
