Diaspora në rrezik!
nga Agim Popoci
Dhjetori shkeli në javën e tij të dytë me vendimet e fundit të Kryesisë së Partisë Socialiste që u propozuan nga Kryetari i saj dhe Kryeministri Edi Rama, dhe me murrlanin politik i cili filloi t’i akullonte veshët shqiptarë sapo u dha kumti se strukturat e kësaj partie do të nisin me një angazhim serioz regjistrimin e shqiptarëve në Diasporë!
I dolën sondazhet keq Edi Ramës në Shqipëri, u cenua froni i Ramës pas 12 vjetësh, ja që fitorja e PS nuk është e sigurt, i doli boja dhe organizimit të mitingjeve të PS në Greqi, Itali, Britani e Amerikë, ishin disa nga arsyet që u lakuan në murrlanin që nxiti dhe debatin politik mbi racën e re që tashmë po lindë për të përçarë edhe shqiptarët në Diasporë, patronazhistin, ditë këto kur ka filluar numërimi mbrapsht për zgjedhjet parlamentare të vitit 2025!
Duke pasur parasysh situatën politike dhe të sigurisë në vend, varfërinë që ka pushtuar çdo qelizë shqiptare, shpresën e cila është në grahmat e saj të fundit, dhe sistemin zgjedhor së bashku me ndarjen territoriale që është krijuar për të sunduar vetëm komunizmi në Shqipëri, përveç Atdheut që sipas censusit të fundit të vitit 2023 rezulton me vetëm 2.402.113 banorë, me patronazhistët nëpër këmbë, sot, Diaspora është në rrezik!
Nuk po flasim për Diasporën për të cilën bolsheviku Fan Noli siguronte “Mbahu nënë mos ki frikë, se ke djemtë në Amerikë”, as atë që shiti dhe rrobat e trupit për çlirimin e Kosovës dhe pavarësinë e saj, por për një Diasporë që pasi me shekuj u përça në ballist e partizan, sigurims e zogist, demokrat e socialist, berishist e nanoist, sot, rrezikon të shpërbëhet përfundimisht nga raca më e rrezikshme shqiptare, Patronazhistët!
Fatkeqësisht nuk po flasim as për një Atdhe normal që interesohet për Diasporën dhe organizohet ta realizoj edhe regjistrimin e saktë të saj, por, këtë detyrë ia beson partisë në pushtet, Partisë Socialiste, e cila nuk angazhon thjeshtë patronazhistë por të rinj që, sipas Kryeministrit, sot punojnë nën traditën e prindërve; Traditë kriminale e cila buron që nga viti errët 1944, dhe sot bijtë e tyre që drejtojnë pushtetin kanë vetëm një qëllim, Edi Rama ti fitoj zgjedhjet në vitin 2025!
Po ç’thot’ ajo e ve e gjorë?!
Sikur të ishte fjala për një Diasporë si ajo izraelite e cila iu bindë thirrjes së Atdheut, dhe nga viti 1948 deri në vitin 1951 u kthye dhe dyfishoi popullsinë në Izrael, ashtu si dhe nga viti 1951 deri më 1970, dhe përfundimisht u tetëfishua popullsia nga viti 1948 deri në vitin 1988, patronazhistët e Edi Ramës sikur të arrijnë t’i fusin duart edhe në kapilarët e thellë të Diasporës nuk do të kishin ndonjë ndikim serioz, dhe nuk kishte se pse të shqetësohej njeri ndonëse ky Atdhe i shqiptarëve nuk ka një ligj si ai i izraelitëve që jo vetëm e përcakton si “shtëpi kombëtare të popullit hebre” por i garanton “siguri pjesëtarëve të popullit hebre që janë në rrezik ose janë ndaluar për shkak të përkatësisë së tyre hebreje ose nënshtetësisë”!
Dhe jo vetëm kaq! Ligji për Izraelin si shtet kombëtare i popullit hebre, i cili u miratua në vitin 2018 kërkon “forcimin e lidhjes” në mes të Izraelit dhe Diasporës si dhe ruajtjen e trashëgimisë kulturore dhe historike të popullit hebre brenda Diasporës; “Bashkësitë hebreje” i konsideron “vlera kombëtare” dhe Shteti obligohet “të nxis dhe zhvillon themelimin dhe stabilizimin e tyre”.
Por, jo vetëm që nuk i ka, por asgjë nga këto nuk i ka as nëpër mend Shteti i Edi Ramës! Madje nuk mendon asgjë as nga ai kujdes që kanë shtetet si Greqia, Italia e Serbia me Diasporë të jashtëzakonshme, e largqoftë Kroacia ndonëse presidenti i saj aktual ishte dhe Këshilltari i Kryeministrit Edi Rama, kur mori pushtetin!
Ndryshe, nuk do të mendonte të manipulonte Diasporën meqë askush nuk e voton më në Shqipërinë e plaçkitur nga kjo kastë që sot qeverisë nën traditën e prindërve!
Edi Rama mund të mos e ketë dëgjuar Këshilltarin e tij Zoran Milanoviç, por asnjë kroat e lëre me Kryeministri i Kroacisë nuk mendon të zgjidhet në krye të qeverisë me votën e Diasporës ndonëse sipas censusit të fundit të vitit 2023 është konfirmuar se Kroacia ka 3.859.686 banorë, ndërsa sipas të dhënave nga muaji Mars i këtij viti, bazuar në të dhënat e misioneve diplomatike kroate dhe zyrave konsullore, misioneve katolike kroate, dhe regjistrimit të popullsisë në shtetet ku jetojnë, jashtë Kroacisë jetojnë rreth 3.2 milionë kroatë!
Kujdes, jo të regjistruar nga partia në pushtet HDZ, as në bazë të regjistrimit të patronazhistëve për tre javë, siç pretendon Edi Rama me Partinë Socialiste; Dhe, ajo që është më e rëndësishmja, këta kroatë që jetojnë jashtë Kroacisë mund të marrin pjesë në zgjedhje, por jo të vendosin për përbërjen e Parlamentit të Kroacisë!
Kështu, përkundër këtij raporti të popullsisë, 3.8 milionë në Kroaci dhe 3.2 milionë në Diasporë, në parlamentin me 151 ulëse, Diaspora si njësi e posaçme zgjedhore, zgjedhë vetëm 3 deputetë!
Ndërsa, Edi Rama, me qëllimin gjithmonë djallëzor dhe jo vetëm në momentin kritik për fatin e tij në të cilin ndodhet, Diasporën e ka si burim i sigurt i manipulimit të votës dhe korrjes së fitores edhe në zgjedhjet parlamentare të vitit 2025, me shpresën e madhe, Amerikën, ku pretendon se Sigurimi i Shtetit e ka nën kontroll votën shqiptare!
Këtë e konfirmon më së miri rasti i Kroacisë, ku askush nuk u tundua për të sajuar manipulimet e Edi Ramës me Kod Zgjedhor, votën e Diasporës dhe Celibashin, ndonëse vetëm në Amerikë jetojnë 1.2 milionë kroatë!
Në këtë situatë, Diaspora vetëm nëse ka fat mund ti shpëtoi bëmave që do i vinë nga pushteti i Edi Ramës deri në zgjedhjet e 11 Majit të vitit 2025, ndërsa Atdheu i shqiptarëve, deri atëherë do jetë, ashtu siç e la Noli në vitin 1917:
Qan e lutet Nën’ e mjerë,
Kërkon vatrën edhe nderë…
