Diplomati kosovar s’ka buxhet për qira, strehohet te familjarët

Konsullata e Përgjithshme e Kosovës në New York të SHBA-së është zhytur në “varfëri”.

Që disa muaj ka mbetur pa para në llogari bankare duke mos arritur ta paguajë as qiranë e banimit për diplomatët dhe familjarët e tyre, shkruan “Koha Ditore” duke shtuar se për situatën e rëndë me financat është njoftuar edhe ministri Behgjet Pacolli përmes një komunikimi elektronik, të cilin ka arritur ta sigurojë gazeta.

Aty shefja e Konsullatës, Teuta Sahatçiu, tregon për vështirësitë me të cilat është përballur diplomati Lulzim Krasniqi, me të zbarkuar në New York. Ai është detyruar të strehohet tek familjarët e tij, pasi në mungesë të mjeteve financiare është dashur të largohej nga hoteli ku ishte vendosur përkohësisht.

Sahatçiu në letër fillimisht e njofton kreun e MPJ-së se diplomati i ri, i caktuar të shërbejë në Konsullatën në New  York, tashmë ka arritur dhe po përgatitet të marrë përsipër detyrat që e presin.