Dita e Pavarësisë, liderët evropian urojnë popullin e Kosovës
Me rastin e 15 vjetorit të shpalljes së Pavarësisë së Kosovës, Presidenten dhe popullin e Kosovës e kanë uruar të gjithë liderët evropian, dhe të parët që uruan ishin pikërisht ata që njohën Kosovën shtet të pavarur dhe sovran.
Steinmeier: Gjermania, partnere e besueshme e Kosovës
Duke uruar Presidenten Vjosa Osmani me rastin e 15-vjetorit të Pavarësisë së Kosovës, Presidenti i Republikës Federale të Gjermanisë, Frank Walter Steinmeier, vlerëson angazhimin e Kosovës për vlera evropiane si dhe partneritetin në raport me luftën e paprovokuar të Rusisë në Ukrainë.
“Jam i lumtur që vitin e kaluar gjatë samitit të Procesit të Berlinit në Berlin me nënshkrimin e tre marrëveshjeve rajonale të mobilitetit mundëm të arrijmë një sukses dhe të hedhim një hap të mirë përpara për krijimin Tregut të Përbashkët Rajonal domethënës për zhvillimin ekonomik të rajonit. Qëllim i përbashkët i Kosovës dhe Gjermanisë mbetet integrimi i vendit tuaj në bashkësinë ndërkombëtare. Gjermania e mbështet perspektivën evropiane të Kosovës,” thekson në urimin e tij Presidenti Steinmeier duke përfunduar:
“Dialogu me Serbinë, i udhëhequr nga BE mbetet një sfidë thelbësore për vendin për normalizimin e marrëdhënieve të të dyja vendeve.”
Mattarella: uron Osmanin në 15-vjetorin e pavarësisë
Duke uruar Presidenten e Kosovës, Vjosa Osmani, me rastin e 15-vjetorit të Pavarësisë së Kosovës, Presidenti i Italisë, Sergio Mattarella, siguron se Italia e mbështet bindshëm perspektivën e Kosovës për integrim evropian.
“Konteksti aktual evropian e bën gjithnjë e më urgjente arritjen e një normalizimi të marrëdhënieve ndërmjet Kosovës dhe Serbisë. Uroj sinqerisht që propozimi evropian për marrëveshje ndërmjet palëve të mund të pranohet,” shprehet Presidenti i Italisë, Sergio Mattarella, duke siguruar Prsidenten dhe popullin e Kosovës për mbështetje:
“Kjo është edhe në dobi të perspektivës së Kosovës për integrim evropian, të cilën Italia e mbështet bindshëm”, thuhet në letrën e urimit të presidentit Mattarella.
Macron: Llogaritni në përkarjen e Francës!
Duke uruar Presidenten e Kosovës, Vjosa Osmani, me rastin e 15 vjetorit të Pavarësisë së Kosovës, Presidenti i Francës, Emmanuel Macron, duke inkurajuar Kosovën që të vazhdojë me vendosmëri përpjekjet e ndërmarra për forcimin e sundimit të ligjit i cili do të lehtësojë integrimin evropian, ku mund të llogarisin në përkrahjen e Francës.
“Situata e re gjeopolitike e krijuar nga lufta e agresionit rus në Ukrainë ka bërë që Bashkimi Evropian të forcojë angazhimin e tij politik, ekonomik dhe të sigurisë në Ballkanin Perëndimor […] Në këtë drejtim, përshëndes solidaritetin e treguar nga Kosova për pritjen e refugjatëve dhe gazetarëve ukrainas,” shprehet Presidenti Macron duke inkurajuar Presidentin dhe popullin e Kosovës:
“Të vazhdoni me vendosmëri përpjekjet e ndërmarra për forcimin e sundimit të ligjit, në mënyrë që ta lehtësojë integrimin evropian, ku mund të llogarisni në përkrahjen e Francës.”
