Dita e shtatë, përballja më e madhe në EURO 2024

Sot është dita e shtatë në EURO 2024 dhe dashamirësit e futbollit do të kenë rastin të shohin në orën 21:00, përballjen më të madhe të këtij Kampionati Evropian, Spanjë-Itali

Në orën 15:00 kemi përballjen ballkanike në Munich në mes të Serbisë dhe Sllovenisë, ndërsa në orën 18:00 në Frankfurt pretendenti për trofeun e EURO 2024, Anglia, do të luajë me Danimarkën, si dy ekipet që në sfidat e para treguan vetëm në pjesën e parë pse ishin trajtuar si favorite të grupit, dhe, që të dyja në pjesën e dytë përballë Serbisë përkatësisht Sllovenisë, u tërhoqën plotësisht.

Duhet të kujtojmë se përballja e tyre e fundit ishte në gjysmëfinalen e Kampionatit të kaluar Evropian.

Ndërkohë në Gelsenkirchen, dita e shtatë përmbyllet me përballjen e rivalitetit më të madh në historinë e kampionateve evropiane. Ekipi i ri i Spanjës tregoi një përgatitje shumë të mirë në sfidën e parë kundër Kroacisë, lojë të cilën edhe tifozët shqiptarë e presin sot në mënyrë që me një fitore kundër Italisë, Kombëtarja Shqiptare do ta ketë një kombëtare spanjolle më të relaksuar, pa domosdoshmëri për fitore në përballjen e fundit të grupit.