Drejtor Artistik në Teatrin e Operës zgjidhet një italian! Kush është Jacopo Sipari di Pescasseroli
Drejtor i ri Artistik i Drejtorisë së Operës dhe Filarmonisë, DOF, në Teatrin Kombëtar të Operës dhe Baletit, është zgjedhur Jacopo Sipari di Pescasseroli.
Pas mbylljes së konkursit, Maestro Siparin e ka prezantuar para trupës artistike dhe stafit administrativ, Drejtorja e Përgjithshme e TKOB, Abigeila Voshtina.
“Drejtori Artistik i një Opere është emblema e institucionit tonë sepse punon me orkestrën, që është baza dhe motori i operave, baletit dhe koncerteve simfonike,” u shpreh Voshtina duke shtuar.
“Ndaj jam shumë e lumtur që pas një konkursi përzgjedhës të prezantoj para jush maestron, Jacopo Sipari di Pescasseroli, si drejtor Artistik pranë DOF-it, ” tha Voshtina duke sqaruar se ndonëse statuti ia lejonte të emëroj një Drejtor Artistik, zgjodhi të hapte një konkurs ndërkombëtarë për të mos i kufizuar standardet e përzgjedhjes dhe për të vënë në sfidë me vete këdo që mendonte se mund t’i plotësonte kriteret”.
I lumtur për këtë përzgjedhje është shprehur dhe maestro Sipari, i cili para trupës dhe stafit të TKOB-së o zotua:
“Bashkë me Drejtoren e Përgjithshme kemi të njëjtin synim: Ta transformojmë TKOB-në në një nga teatrot më prestigjioze në Evropë. Kjo është e mundur pasi TKOB ka një strukturë të mahnitshme, orkestër profesionale, si dhe trupë artistike që punon me profesionalizëm,” tha i bindur Jacopo Sipari di Pescasseroli duke përfunduar:
“Jam i sigurt se falë të gjitha kapaciteteve të TKOB-së dhe vizionit të drejtoreshës Voshtina do ta rrisim Teatrin tonë në nivelin më të lartë artistik.”
Kush është maestro Sipari?
I diplomuar në Juridik dhe Dirigjim, Sipari zotëron 2 doktoratura në të Drejtën Penale dhe atë Kononike, të shkruara në gjuhën latine. Prej nëntë vitesh shërben si Docent i të Drejtës Penalen, në Universitetin “Roma Tre” me Prof. Mario Trapani, por edhe më parë njihej si avokati më i ri i Gjykatës Apostolike Romake “Rota”, në Vatikan.
Studimet nuk i ka ndalur me kaq. Ai është i diplomuar me rezultate tw larta në Drejtimin Orkestral, nën kujdesin e maestros Marco Angius. Po ashtu edhe për kompozim dhe dirigjim koral në Konservatorin “Tartini” të Triestes.
Sipari ka studiuar edhe për Kompozicion Eksperimental me Mauro Cardi dhe Kanto me Maria Chiara Pavone, duke u diplomuar në Konservatorin e Muzikës “Casella” në L’Aquila.
Jacopo Sipari di Pescasseroli është i njohur si fitues i çmimit “GOLDEN OPERA SPECIAL PRIZE” në janar të 2020-s, për gjeneratën e re nga “OSCARS OF OPERA”, si një nga dirigjentët më premtues për operat në Itali.
Në karrierën e tij ai numëron një sërë suksesesh, si: Dirigjent kryesor në Shtëpinë e Operës dhe Baletit të Varnës, në Fondacionin e Festivalit Puccini të Torre Del Lago, Drejtor Artistik i Festivalit Ndërkombëtar të Midsummerit të Italisë, Drejtor Artistik i “Sacrum International Festival” në Vatikan, etj.
