Dyfishohet pritja në aeroporte, O’Leary: Vetëm evropianët mund të shpikin kësi lloj mutsihane!

Koha e pritjes në disa nga aeroportet më të mëdha të Evropës është dyfishuar këtë verë pas futjes së sistemit të ri elektronik të kontrollit kufitar të Bashkimit Evopian, EES, tregojnë të dhënat e publikuara nga Financial Times.

Në aeroportin e Frankfurtit, koha maksimale e pritjes në korrik arriti në 120 minuta, nga 60 minutat e një viti më parë, sipas të dhënave nga firma analitike Qsensor.

Në Munich, pritja më e gjatë u rrit nga 31 në 60 minuta, dhe në Amsterdam nga 80 në 120 minuta.

Sistemi i ri filloi të zbatohet në prill

Në muajin prill, BE filloi zbatimin e një sistem hyrje-daljeje, të njohur si EES, sipas të cilit pasagjerët nga Mbretëria e Bashkuar dhe vendet e tjera jo-anëtare të BE-së, në hyrjen e tyre të parë duhet të regjistrohen duke marrë gjurmët e gishtërinjve, duke bërë një foto dhe duke futur të dhëna personale.

Sektorët e udhëtimit dhe aviacionit kanë paralajmëruar më parë se sistemi i ri mund të shkaktojë vonesa të mëdha sepse aeroportet nuk do të jenë në gjendje të përpunojnë pasagjerët mjaftueshëm shpejt.

Nga Aeroporti i Frankfurtit thanë se kontrollet e reja kufitare kanë shkaktuar vonesa dhe ndërprerje të tjera.

“Me rritjen e kohës së pritjes, po shohim një rritje të fortë të shqetësimeve midis turistëve britanikë dhe të Amerikës së Veriut në lidhje me sa kohë do të duhet të presin në radhë,” tha themeluesi i Qsensor, Oliver Maxfield.

O’Leary: Vetëm evropianët mund të shpikin kësi lloj mutsihane

Drejtori ekzekutiv i Ryanair, Michael O’Leary, e ka kritikuar ashpër EES-në dhe tha se regjistrimi duhet të bëhet përmes internetit.

“Vetëm evropianët mund të shpikin kësi lloj mutsihane,” u tha ai investitorëve muajin e kaluar duke shtuar se Ryanair kishte parë mbingarkesë serioze në rreth 15 aeroporte.

EES synon të rrisë sigurinë në kufijtë e jashtëm të BE-së duke monitoruar hyrjet dhe daljet, duke zbuluar ata që kanë tejkaluar afatin e qëndrimit dhe duke ndihmuar në gjetjen e personave të kërkuar nga autoritetet.

Megjithatë, zbatimi i tij ka shënuar vonesa, probleme teknike dhe problemet me pajisjet.

Disa aeroporte pezullojnë përkohësisht disa kontrolle

Të dhënat nga Munichu tregojnë se pritjet më të gjata ndodhën kryesisht për pasagjerët që i nënshtroheshin kontrolleve manuale. Korsitë e automatizuara përdoren kryesisht nga qytetarët e BE-së, të cilët nuk kanë nevojë të regjistrohen në EES.

Prandaj, shumë aeroporte kanë çaktivizuar përkohësisht disa kontrolle, siç është marrja e gjurmëve të gishtërinjve, gjatë orarit të pikut.

Ky opsion pritet të përfundojë në shtator, por tetë shtete anëtare të BE-së dhe Zvicra i kanë kërkuar Komisionit Evropian ta zgjasë atë.

Komisioni aktualisht po diskuton me shtetet anëtare mundësinë e vazhdimit të këtyre përjashtimeve.

“Sa i përket periudhës pas verës, ne jemi në kontakt të ngushtë dhe konstruktiv me disa shtete anëtare ku ka probleme në kalimet kufitare individuale,” tha një zëdhënës i Komisionit.

Komisioni: Koha mesatare e regjistrimit 70 sekonda

Komisioni Evropian thotë se regjistrimi mesatar në sistemin EES zgjat rreth 70 sekonda dhe pretendon se në shumicën e rasteve ndikimi tek pasagjerët jo-BE është i kufizuar.

Ai gjithashtu thekson përfitimet e sigurisë së sistemit, i cili ka regjistruar 160 milionë hyrje dhe dalje që nga lançimi i tij.

Drejtori ekzekutiv i British Airways, Sean Doyle, tha se sistemi kishte shkaktuar probleme në disa aeroporte, por nuk kishte pasur një ndikim të rëndësishëm në biznesin e përgjithshëm të kompanisë.

Drejtori ekzekutiv i EasyJet, Kenton Jarvis, u bëri thirrje aeroporteve që nuk po i përdornin përjashtimet e lejuara të tregonin “logjikë të shëndoshë”.

“Mos i lini njerëzit të qëndrojnë aty për tre orë,” tha Jarvis.