Edi Rama merr pafajësinë në Gjykatë, ja reagimi i ish-ministrit …

Gjykata e Beratit ka rrëzuar kërkesën e LSI-së për vazhdimin e hetimeve nga prokuroria ndaj kryeministrit Edi Rama, lidhur me thirrjen e tij gjatë fushatës së zgjedhjeve parlamentare të 25 qershorit, ku i kërkoi punonjësve të Policisë së Shtetit të linin kapelet dhe të mblidhnin vota për Partinë Socialiste.

Pasi prokuroria mbylli hetimet, gjykata e Tiranës kishte shpallur moskompetencën pasi deklaratat e Edi Ramës ishin bërë në një vend tjetër.

Ishte kjo arsyeja që LSI vendosi të bëjë padinë në Gjykatën e Beratit.

Kjo gjykatë sot ka rrëzuar kërkesën e LSI-së, duke e shpallur Edi Ramën të pafajshëm.

Pas këtij vendimi ka reaguar Ylli Manjani.

‘Drejtësia kokëulur para kryeministrit. Ky kryeministër përbën rrezik për zgjedhjet e lira dhe të ndershme në Shqipëri’, është shprehur Manjani pas vendimit të gjykatës.