Edi Rama vret!
nga Agim Popoci
“…Ursula dua të të garantoj se ky është një investim i mirë, sepse për miq ne shkojmë përtej së mundurës, mund edhe të vrasim…” ishte kjo gatishmëria që shprehu Kryeministri Edi Rama për Presidenten e Komisionit Europian Ursula von der Leyen, me rastin e inaugurimit të Kolegjit Europian në Tiranë që u shoqërua me ilaritet nga banda e zyrtarëve evropianë të Von der Leyen, ndërsa tek shqiptarët kjo deklaratë makabër ngeli e papërtypur fal mediave që ka nën kontroll Kryeministri, dhe, përfundoi në koshin e broçkullave që Kryeministri i Shqipërisë flet orë e çast!
Që Edi Rama është i gatshëm të vras kjo është vërtetë një risi në strategjinë e politikës së tij të dështuar të integrimit në BE, qoftë dhe për Presidenten e KE, por, që jep përgjigje si në konstatimin e Ursula von der Leyen që shteti i Edi Ramës ka shënuar përparim të madh ashtu dhe në arsyen pse shefja e ekzekutivit të Bashkimin Evropian e pret me buzëqeshje gatishmërinë për të vrarë, të Kryeministrit të këtij vendi që ka përparuar aq shumë në sytë e Von der Leyen!
Kur shqiptarët krijuan idenë se Komunizmi ka rënë në 20 shkurt me rënien e bustit të diktatorit Enver Hoxha, ai u bë i gjallë pa kaluar dy muaj, duke goditur mbi popull në Shkodër në 2 Prillin e vitit 1991!
Dhe, nuk ndaloi! Për ti bindur ata që e donin Shqipërinë si gjithë Evropa, Komunizmi goditi për ta vrarë heroin e demokracisë Azem Hajdari në tempullin e ligjeve. Por, ndryshe nga idealistët që nuk po kuptonin se ku vajtën komunistët, kush e bëri revolucionin e vitit 1997, dhe, ku po vazhdon të vras, Azemi ishte i qartë: Komunizmi deri sa të jeton, vret!
Fatkeqësisht, kështu ndodhi, Azemin e vranë, ashtu dhe si shumë të tjerë, dhe shqiptarët pa e vërejtur ndryshimin edhe kur nga atdheu i tyre u larguan mbi 1 milionë bashkëqytetarë të tyre dhe në vend po sundon varfëria, vjen Presidentja e Komisionit Evropian për t’ju thënë se Shqipëria ka shënuar përparim të madh; Ndërsa Kryeministri Edi Rama u kujdes për shtjellimin e këtij konstatimi!
Duke rrëzuar thënien lapidare të heroit të demokracisë, Azem Hajdari, Kryeministri sqaroi të gjithë ata shqiptarë që nuk po kuptojnë se si jetohet me patronazhistë nëpër këmbë, pse mediat mbyllën sytë dhe veshët ndaj deklaratës makabre të Kryeministrit, sa shumë ka përparuar Shqipëria siç thotë Presidentja e KE, dhe, pse Komunizmi më nuk vret, pas 32 viteve me pasardhësit e kësaj kaste kriminale në pushtet, Edi Rama mori vetë autorësinë!
Ndërsa ilariteti evropian ndaj kësaj gatishmërie makabre, “mund edhe të vrasim”, në veçanti i Presidentes së KE, Ursula von der Leyen, është i habitshëm por nuk është i paparë; Si në rastin kur populli i pafajshëm evropian vritej dhe të tjerët gajaseshin me Hiterin; Dhe, së fundi, kur vetëm 35% e evropianëve e miratojnë përqeshjen e këtij diktatori ndërsa ai vriste!
Për koincidencë ishte muaji tetor, viti 1940, kur në New York u dha premiera e komedisë “The Great Dictator”/ Lexo shqip: “Diktatori i madh”/ i Charlie Chaplin, i cili nisi realizimin vetëm një javë pasi shpërtheu lufta e dytë botërore dhe ishte gati për shfaqje vetëm për gjashtë muaj!
Ndonëse Chaplini ishte bindur se këtë komedi për Adol Hitlerin duhet ta realizoi pasi pa filmin propagandistik “Triumph of Will” /lexo shqip: “Triumfi i vullnetit”/ të Leni Rifenshtal, kushtuar Kongresit të Partisë Nacional-Socialiste të Gjermanisë në Nirnberg më 1934, filmi i Chaplinit nuk u lejua të transmetohej përveç se në tokën gjermane edhe në Spanjë, Japoni dhe disa shtete latinoamerikane; Dhe, përveç se u ndalua nga Stalini në Bashkimin Sovjetik, ai para këtij publiku arriti të shfaqej vetëm në vitin 1989!
“Fatet e tyre ishin sikur gjinitë e kundërta. Njëra ka bërë për të qarë miliona njerëz, e tjetra e ka bërë për të qesh gjithë botën. Babai im kurrë nuk ka mundur të mendoj për Hitlerin pa u dridhur, një pjesë për shkak të tmerrit, dhe pjesën tjetër për shkak të habisë,” shkruan Charls Spenser Chaplini i Tretë në librin “Babai im Charlie” duke cituar të atin:
“Paramendo vetëm, ai është i çmendur, e unë komedian!”
Kështu mendonte Charlie Chaplin edhe kur filmi i tij ishte më i shikuari në kinematë amerikane ndërsa ky i çmendur po vriste pa ndaluar në Evropë, ndërsa Ursula von der Leyen as kaq pak nuk mendonte kur një i tillë po zotohej në sytë e saj, se do vriste për te!
Pse nuk e lejoi Stalini shfaqjen e filmit “Diktatori i madh” në Bashkimin Sovjetik dhe pse ai u lejua vetëm në vitin 1989, këtë le ta gjykon Presidentja e Komisionit Evropian, Ursula von der Leyen, dhe, nëse as atëherë nuk e kupton është regjisori zvicerian Dani Levi i filmit të vitit 2007 “Lideri im – realisht e vërteta më e vërtetë për Adolf Hitlerin” i cili e sqaron me deklaratën e tij, pasi filmi ngjalli shumë debate jo vetëm për mënyrën se si përqeshet diktatori.
“Adolf Hitleri është i mjerë, qesharak. Ashtu siç ishte qesharak i gjithë nacional-socializmi. Nëse mendohet se si i gjithë kombi i brohoriste Heil Hitler, atëherë fjala është për kabarenë më të keqe të mundshme. Njeriu mund të qeshë me të gjitha këto, po të mos ishin pasojat që la pas vetes nacional-socializmi, nëse nuk do të kishte shkatërrime dhe krimi më i madh që ka ekzistuar ndonjëherë,” tha Dani Levi, autor i komedisë mbi javën e fundit të ditëve të diktaturës së Hitlerit, të cilin 56% e gjermanëve e kundërshtojnë dhe janë vetëm 35% që e vlerësojnë pozitiv!
A është Ursula von der Leyen pjesë e kësaj pakice që ja ka ngenë të qeshë me njerëz edhe kur vrasin, ky është problem i Bashkimit Evropian që i la në dorë drejtimin e ekzekutivit ndërsa shqiptarëve të pashqetësuar me deklaratën e Kryeministrit Edi Rama u mbetet të gjykojnë përparimin që konstaton kjo Evropë për Shqipërinë, nga “Komunizmi vret” në “Edi Rama vret”!
