Eurobond 500-700 mln euro, Ibrahimaj: Në interesin tonë të marrim borxh të madh! Tabaku: Shumë i rrezikshëm!

Ministrja e Ekonomisë dhe Financave, Delina Ibrahimaj, duke folur në Komisionin e Ekonomisë për marrjen e një eurobondi me vlerë deri në 700 milionë euro, tha se është në interes të vendit të merret një borxh më i madh këtë vit. Eurobondi me afat maturimi 7 deri në 10 vite, tha ajo, do të shërbejë për plotësimin e nevojave të buxhetit.

“Emetimi i një eurobondi ka rëndësi të veçantë sidomos për vendet me një ekonomi të vogël. Eurobondi jo vetëm na ndihmon për plotësimin normal të nevojave të buxhetit të shtetit, por përfaqëson një mundësi për të përmirësuar perspektivat e investitorëve, duke prezantuar më tej perspektivat optimiste afatmesme. Në daljet e mëparshme kemi pasur norma interesi në rënie. Eurobondi do të jetë nga 500-700 milionë euro dhe një afat maturimi nga 7 deri në 10 vite në bazë të tregjeve të huave. Jemi në përfundim të plotësimit të dokumenteve. Financimi do të përdoret për mbështetje buxhetore dhe do të përdoret arsimi, shëndetësia, bujqësia apo infrastruktura dhe mbështetje e investimeve publike. Një pjesë i investimit do të mbetet në thesar për vitin 2022”.

Ibrahimaj tha se duke qenë se bankat qendrore kanë njoftuar se do të ketë shtrëngim të politikës monetare dhe norma më të larta interesi, është më mirë të merret një borxh më i madh kë vit.

“Është në interesin tonë që të marrim një borxh më të madh këtë vit nëse ka norma të ulta interesi dhe të mos dalim vitin e ardhshëm pasi bankat qendrore kanë njoftuar se do të ketë shtrëngim të politikës monetare dhe norma më të larta interesi. Po ashtu edhe kriza energjetike po jep efektet e saj. Prandaj është në interesin tonë të marrim eurobond në vlerë më të madhe këtë vit dhe të mos dalim vitin e kaluar. Po punojmë për të përmbushur parametrat për të dalë nga lista gri për pastrimin e parave”, tha Ibrahimaj.

Tabaku: Borxhi, nuk e dimë si do përdoret, është shumë i rrezikshëm

Marrja e një eurobondi 500-700 milionë euro shumë i rrezikshëm, deklaroi deputetja e Partisë Demokratike Jorida Tabaku, pasi ekonomia shqiptare nuk ka pasur ndonjë përfitim nga rritja e borxhit.

“Borxhi publik është në rreth 80%, jemi në listën gri për pastrimin e parave. Ministria nuk i ka marrë parasysh këto problematika dhe janë shqetësim për mua. Ne po marrim borxh por pa e ditur se për çfarë po e marrim, borxhi i marrë nuk është përdorur vetëm për investime por është përdorur edhe për shpenzime operative dhe është përdorur edhe për paga.

Në 2013, borxhi ishte 6.3 miliardë euro ndërsa tani është mbi 10.2 miliardë euro dhe nuk e dimë sesi është përdorur dhe a ka pasur efektivtivitet. Borxhi na bën mirë kur përdoret për investime të rëndësishme. Nuk e dimë si do përdoret ky borxh dhe për mua është shumë i rrezikshëm. Shqetësimi i dytë është për deklaratën e FMN, që pati kritikë kryesore sesi është menaxhuar borxhi publik. FMN kërkoi rishikim të prioriteteve, nuk mund të marrim borxh për PPP”.