Faleminderit Basha! Por, po si vendosëm bashkë, nuk janë tanët!

nga Nebil Çika*

Përshëndes vendimin e Partisë Demokratike dhe kryetarit Lulzim Basha, për përcaktimin e kuotave të përfaqësuesve nga shtresa e të përndjekurve politikë antikomunistë në fushatën e përzgjedhjes së kandidatëve për deputetë, si një risi në zhvillimet politike dhe një kërkesë e vazhdueshme e jona ndaj PD.

Kam refuzuar dhe refuzoj çdo tajitim të të përndjekurve politike antikomunistë si pakicë apo shtresë në nevojë pasi ne jemi themeli i PD dhe shumica e strukturave dhe bazës elektorale të sajë.

Sipas dokumenteve të Sigurimit të Shtetit, në diktaturë ne ishim rreth 35% e popullsisë se vendit sot 35 % e elektoratit shqiptar, dhe sipas të dhënave tona mbi 90 % janë anëtarë, mbështetës e votues të PD, një kolateral politik që nuk besoj ta ketë tjetër parti politike në botë. Me pak fjalë, nëse i motivon të shkojnë të gjithë në votime, PD futet në zgjedhje me rreth 35% të votave kombëtare në kuti për të.

Roli jonë në PD bëhet më i spikatur në opozitë kur individë e grupime të tjera, për arsye nga më të ndryshmet, distancohen për tu rikthyer në periudhën e “hapjes” para zgjedhjeve në kohën e përgatitjes së listave të kandidatëve për deputet.

Ne jemi gjithnjë atje, në ballë të protestave dhe aksionit politik të PD. Kjo është e faktuar botërisht.

Nga statistika jonë, mbi 90% e të arrestuarve nga policia në protestat e opozitës janë nga shtresa e të përndjekurve politike antikomunistë, dhe ky është kampioni më i mirë për të matur kontributin tonë në PD.

Problemi ynë ka qenë e mbetet, përfaqësimi politik në raport të zhdrejtë me kontributin politik e elektoral që i japim PD, gjë që kemi kërkuar të ndryshohet e riparohet nga z.Basha.

Përcaktimi i kuotave 10 apo 20 % do të thotë që të tjerë kandidatë nga radhët e të përndjekjeve politikë që mund të dalin nga procesi i zgjedhjeve në PD, të pengohen në përzgjedhjen e tyre, pasi ne përbëjmë shumicën e anëtarësisë dhe elektoratit të sajë.

Ne kemi kërkuar dhe këmbëngulim që PD ti zgjedhë kandidatet nga shtresa jonë në dakortësi me ne, dhe jo të na i zgjedhin e të na imponojnë në mënyre të njëanshme siç ka ndodhur deri tani.

Në shumë raste ka ndodhur që ata që na i ka caktuar PD si “përfaqësuesit tanë”, nuk kanë qenë tanët. Ndonjëherë, as të PD. Miratimi nga ana jonë i përfaqësuesve tanë, është një kërkesë legjitime dhe një kusht i panegociueshëm.

Në këtë situatë, ju bëjmë thirrje të përndjekurve politikë antikomunistë, të përfshihen në fushatën e përzgjedhjes, një anëtar një votë, të kandidatëve për deputetë të PD, dhe të përzgjedhin e të votojnë kandidatura, përfaqësuesit e shtresës sonë, që pa dyshim janë më të mirët. Degët tona në të gjitha bashkitë e vendit, të identifikojnë kandidatët tanë të spikatur dhe të inkurajojnë angazhonin e tyre në politikë si kandidatë për deputetë, dhe të sigurojnë mbështetje për ta nga e gjithë shtresa e të përndjekurve politikë antikomunistë.

*Kryetar i Shoqatës Antikomuniste e të Përndjekurve Politikë të Shqipërisë