“Gërdeci”, shtyhet seanca për Fatmir Mediun, gjobiten avokatët

Seanca në ngarkim të ish-ministrit të Mbrojtjes, Fatmir Mediut, për çështjen “Gërdeci”, është shtyrë për shkak të mungesës së dy avokatëve, Ardian Visha dhe Henrik Ligori.

Gjykata i gjobiti të dy avokatët me 5 mijë lekë të reja, për shkak se mbrojtësit ligjorë të Fatmir Mediut kërkuan ekspertët ushtarakë në seancën e sotme.

Njëri nga ekspertët, 72 vjeçari Fatmir Bozdo u paraqit ditën e sotme ndërsa i tha gjykatës se nuk mund të paraqitet një here tjetër për shkak të gjendjes shëndetësore. Me këtë rast, ai deklaroi para togave të zeza, se i qëndron akt ekspertimit të bërë pas shpërthimit në Gërdec.

Seanca e radhës u caktua në datë 18 dhjetor ora 09.00.

Ndryshe, për çështjen “Gërdeci” ish-ministri i Mbrojtjes, Fatmir Mediu, është marrë i pandehur për “shpërdorim detyre” të kryer në bashkëpunim. 

Fatmir Mediu ka kërkuar riekspertim të shpërtimit të ndodhur në Gërdec më 15 mars 2008, ku mbetën të vrarë 26 persona dhe u plagosën 300 të tjerë, duke siguruar se të vërtetës do i shkoj deri në fund, sepse sipas tij, ai ka kryer detyrën dhe nuk ka pasur asnjë mendim ushtarak që nuk e ka vlerësuar.