Gjakovari Bujar Brovina, Fisnikëria Tiranase
Në Ditën e Çlirimit të Kosovës, në vlerësim të kontributit të shquar qytetar, shoqëror dhe patriotik, për përkushtimin dhe kontributin e dhënë ndaj shqiptarëve të Kosovës gjatë viteve të luftës 1998-1999, Shoqata Tirana vendosi të dekoroj me çmimin e lartë “Fisnikëria Tiranase”, tironsin e respektuar me prejardhje nga Gjakova, Bujar Brovinën.
“Me figurën e tij të pastër publike, sjelljen fisnike dhe qëndrimin korrekt në shërbim të interesit komunitetit tiranas, ai përfaqëson me dinjitet vlerat më të mira qytetare të Tiranës, duke qenë shembull frymëzyes për brezat e ardhshëm,” thuhet në motivacionin e dhënies së titullit “Fisnikëria Tiranase” për Bujar Brovinën, nga Shoqata Tirana.
Duke kujtuar ditët e vështira që po kalonte kombi shqiptar gjatë viteve 1998-1999, me refuzimin që i bëri dhe i bënë të quhen “refugjatë” vëllezërit e Kosovës që u dëbuan nga shtëpitë e tyre nga regjimi kriminal serb i Slobodan Milosheviçit dhe gjetën konak me bukë e kripë e zemër, siç e do zakoni shqiptar, në Tiranë dhe gjithë Shqipërinë, Bujar Brovina me modestinë e tij flet për 72 qytetarë 33 prej të cilëve fëmijë, që i mirëpriti në shtëpinë e tij, ndryshe nga ata që e përjetuan këtë ngrohtësi familjare dhe në shenjë respekti vazhdojnë ta vizitojnë rregullisht familjen tironse, Brovina!
“Fisnikëria Tiranase”, titullin të cilin me shumë respekt do ta mbajë Bujar Brovina, thotë se mbartë vlera të padiskutueshme nga prejardhja e tij Gjakova, pra, Kosova, me traditat familjare të të cilave u pasurua dhe kryeqyteti i kombit shqiptar, Tirana!
