Ilir Meta, spiun i Sigurimit! Ku qëndron problemi këtu?!

nga Agim Popoci

Si e tradhtoi Pandeli Majkon në garë për kryetarin e PS përballë Fatos Nanos dhe lidhi koalicion duke zënë vendin e Majkos si Kryeministër; Si e arrestoi Sali Berishën; Si i shpëtoi revoltës gjatë vizitës në Bajram Curr; Si e preku floririn nga Thesari dhe shpëtoi pa telashe me drejtësinë; Si i bëri gjithë ato koncesione me serbët dhe nuk u pengua nga askush; Si e mbylli Ambasadën e Kosovës në Tiranë; Si lidhi koalicion qeverisës me Sali Berishën; Si u konfirmua gjithë ai korrupsion me zë dhe figurë dhe përveç 21 Janarit asgjë nuk ndodhi, madje protagonisti kryesor i këtij krimi lidhi koalicion me Edi Ramën, u bë Kryetar i Parlamentit dhe më pas edhe President i Republikës; Si e konsumoi mandatin e Presidentit me gjithë ato përplasje vendore dhe ndërkombëtare; Si…

Dhe, pa kaluar as 48 orë që la Presidencën dhe u rikthye në drejtimin e partisë, shqiptarët marrin përgjigje për gjithë ato krime që kanë ndodhur nga viti 1999!

Ilir Meta është spiun i Sigurimit të Shtetit!

Dhe jo vetëm kaq! Ky lajm i lëshuar nga Autoriteti për Informimin mbi Dokumentet e Ish-Sigurimit të Shtetit vret dhe shumë legjenda urbane.

Më shqiptarët nuk mund të dyshojnë dot se ky vend drejtohet nga Sigurimi i Shtetit ndonëse zyrtarisht komunizmi ra në marsin e vitit 1991!

Po, floriri nga Thesari mund të vidhet vetëm kur këtë e urdhëron Sigurimi i Shtetit, por, jo se Ilir Meta do të ndërtoj shtëpi me 11 banjo; Dhe, pse duhet të shkoj dikush prapa hekurave, këtë as shqiptari i mjerë më nuk do të vazhdoj ta mendoj!

Trafiku i njerëzve me gomone ku u vranë me qindra shqiptarë  në vitet 1999-2005, ishte periudhë errët e Shqipërisë postkomuniste në Detin Adriatik, por para togave të zeza nuk doli njeri ndonëse u ndërruan kryeministrat dhe ministrat e brendshëm socialist të implikuar në këto vrasje. Dhe, sot, ata shqiptarë as nuk mund të udhëtonin me gomone dhe as të vriteshin sikur këtë makabritet mos ta lejonte Sigurimi i Shtetit.

Shqipëria pa drita ishte periudhë me kryeministër Ilir Metën; Por, jo, tashmë rezulton Shqipëri me Sigurimin e Shtetit!

Shqipëria që nuk di të bëjë zgjedhje të lira e të ndershme ishte ajo e qeverisur nga kryeministër Ilir Meta, kohë kur lindi edhe “Dushku”; Por, jo, e tillë ishte edhe me Fatos Nanon dhe Edi Ramën, pra, Shqipëri e qeverisur nga Sigurimi i Shtetit!     

21 Janari ishte një ngjarje e trisht që tronditi shumë zemra me gjak shqiptari, por, jo dhe të atyre që e inskenuan. Revolta e organizuar nga Edi Rama dhe PS mund të arsyetoheshin me korrupsionin e Zv/Kryeministrit Ilir Meta që u dëshmua me zë dhe figurë, por, kur ky Ilir iu bashkua qeverisjes së Ramës me ndërhyrjen e Beogradit, gjithçka kundërmonte erë, kundërmim i cili u shua dje me zbulimin e protagonizmit të Ilir Metës në Sigurimin e Shtetit!

U krijuan legjenda të tëra urbane mbi kontrollin e gjyqtarëve dhe sistemit të drejtësisë por Reforma në Drejtësi me miratimin e saj nga Gjykata Kushteteuse dëshmoi se, po, sistemi i drejtësisë ishte nën kontroll, por as nga Sala dhe as nga Likja, por, nga Sigurimi i Shtetit, dhe këtë e demonstruan me vettingun dhe si u formësua ky sistem i ri i drejtësisë deri në ditët e sotme!

Edhe kultivimi i drogës u prezantua si një hata e madhe që e solli regjimi i Edi Ramës, por, nuk ka më legjendë urbane, meqë konfirmohet se oligarkët aktual të Edi Ramës me biznesin e sigurimeve, oligarkë edhe në kohën e Ilir Metës Zëvendës dhe Kryeministër, kishin filluar kultivimin e drogës që në vitin 1994, pa i hyrë gjemb në këmbë dhe pa pas lidhje me Lazaratin e famshëm nga legjendat!

Dhe, çuditërisht, ashtu si 40 vjet diktaturë të Enver Hoxhës u harruan dhe katër vjetët e diktaturës së Edi Ramës me Ilir Metën! Kjo marrëzi e Lulzim Bashës ishte aq e madhe sa prodhoi dhe 2 Marsin. Të marrët e këtij 2 Marsi vazhduan të jenë të tillë edhe në momentin kur Autoriteti i Dosjeve zbuloi Ilir spiunin, ku ishin  më të zëshmit në promovimin e këtij lajmi, thuajse me çfarë zbulimi kemi të bëjmë ndërsa harruan se vetëm ata e konsideruan burrë të mirë e të fortë me Kushtetutë e shqiponjë në duar, që mund të shpërndajë edhe Parlamentin; U harruan dhe bëmat e Likes që nga momenti i parë kur shkeli në politikë dhe deri në momentet kur bashistët në zë deklaronin se nuk e marrin dot pushtetin nga Edi Rama, pa Ilir Metën.

Tani që Ilir Meta u shfaq në krah të Sali Berishës, në sy të bashistëve ai u bë shumë më spiunë se sa kur ishte në krah të Edi Ramës, dhe ata në heshtje e kërkonin t’i dalë në krah të Lulzim Bashës për të korrur fitore. Gjithsesi, Ilir Meta tashmë nuk është fatamorganë por krijesë e Sigurimit të Shtetit pavarësisht CV-në që i bënë Lulzim Basha dhe Kuanti i tij!   

Në fund, të gjithë ata që duan ta ndërlidhin publikimin e Ilir Metës spiun i Sigurimit me kërcënimin e pushtetit të Edi Ramës, janë shumë më qesharak se sa mënyra se si u lançua lajmi nga Autoriteti i Dosjeve mbi Ilir spiunin; Përveç kësaj, hataja nuk ndodhi pse u zbulua Ilir spiuni nga Autoriteti i Dosjeve, dhe pse u konfirmua që anëtarët në këtë institucion të Edi Ramës dhe Lulzim Bashës krijuan aleancë, por që kësaj Aleance iu bashkua edhe kandidati që ishte propozuar nga LSI përkatësisht nga Ilir Meta. Ndryshe Sigurimi i Shtetit nuk mund ta bënte shumicën në Autoritet për t’iu drejtuar Parlamentit, pra, për ta ekspozuar mediatikisht Ilir spiunin!

Sot, Ilir Meta mund të mbrohet nga mëngjesi në darkë duke tundur dëshmitë e komisioneve Mezini-Bezhani dhe ta kundërshtoj Autoritetin e Dosjeve, por, është vonë, shumë vonë, tani alarmi kombëtar është dhënë sepse u kuptua pavarësisht se ishte përfolur si institucion, që dosjet, kontrollohen, grisen ose korrigjohen, dhe shërbehen nga ata që i hartuan, Sigurimi i Shtetit!