Itali-Shqipëri, firmoset marrëveshja për Sigurimet Shoqërore, ç’përfitojnë shqiptarët

Shqipëria dhe Italia firmosën sot marrëveshjen për njohjen reciproke të Sigurimeve Shoqërore.

Nga marrëveshja e cila u firmos nga ministri i Punëve të Jashtme të Italisë, Antonio Tajani, dhe ai shqiptar shqiptar Igli Hasani, do të përfitojnë shqiptarët që jetojnë dhe punojnë në Itali.

“Moment shumë i rëndësishëm për shqiptarët që punojnë në Itali. 15 vite përpjekje, mirënjohje të gjithë atyre që kanë kontribuuar për këtë moment. Mirënjohje ministrit Tajani për kontributin personal,” u shpreh Igli Hasani.

“Kjo marrëveshje garanton të drejtat e punonjësve italianë në Shqipëri dhe atyre shqiptarë në Itali. Ky vendim i përbashkët ofron për shumë persona një siguri dhe perspektivë pozitive për të ardhmen,” tha shefi i diplomacisë italiane Antonio Tajani pas firmosjes së marrëveshjes.

Me firmosjen e marrëveshjes reagoi dhe Kryeministri Edi Rama:

“Nënshkrimi i Marrëveshjes për Sigurimet Shoqërore mes Shqipërisë dhe Italisë, një arritje e shumëpritur për mbi 500 mijë shqiptarë në vendin e dashur fqinj, falë një përpjekjeje këmbëngulëse prej thuajse një dekade, në kërkim të këtij rezultati që dukej i pamundur për vetë peshën financiare të një marrëveshjeje të tillë,” shprehet Edi Rama përmes rrjetit social Facebook.

Kështu, në sajë të kësaj marrëveshjeje, shqiptarët do të përfitojnë ofrimin e përfitimeve në sigurimet shoqërore, trajtim i barabartë të personave të punësuar dhe për të vetë punësuarit.

Marrëveshja do të zbatohet për legjislacionet që lidhen me:

– Sigurimin për pleqërinë, invaliditetin, pensionin familjar (pasjetuesit);

– Sigurimin për përfitimin për sëmundjet dhe barrëlindjen;

– Sigurimin e papunësisë.

Ndryshe, pas firmosjes marrëveshja pritet të ratifikohet nga të dyja shtetet dhe në ditën e parë të muajit të dytë pas shkëmbimit të dokumenteve të ratifikimit, marrëveshja do të hyjë në fuqi.

Aktualisht, Shqipëria ka marrëveshje për njohjen e pensioneve me 15 shtete, me 17 shtete është në proces negocimi dhe me tre shtete është në proces vlerësimi.