Italia i mbyll kufijtë për Kosovën, Serbinë dhe Malin e Zi

Italia bëri të ditur sot se ka mbyll kufijtë për Kosovën, Serbinë dhe Malin e Zi, si masë për frenimin e përhapjes së koronavirusit. Ministri i Shëndetësisë i Italisë, Roberto Speranza, tha se Serbia, Mali i Zi dhe Kosova janë futur në listën e vendeve në rrezik.

“Atyre që kanë qenë atje në 14 ditët e kaluara, u ndalohet hyrja dhe kalimi tranzit në Itali. Në botë, epidemia është në fazën më të vështirë. Kujdesi maksimal është i nevojshëm për të ruajtur përparimin e bërë deri më tani,” tha ministri Speranza përmes rrjetit social Twitter.

Në kulmin e pandemisë së koronavirusit në mars dhe prill, raporton RFE, Italia ka qenë epiqendër e infeksionit.

Mbi 243.000 njerëz janë infektuar atje, ndërsa rreth 35.000 kanë vdekur.

Numri i të infektuarve ka qenë në rënie në javët e fundit dhe ekonomia italiane është në rihapje e sipër.

Këtë javë, edhe Austria ka ndaluar fluturimet për dhe nga vendet e Ballkanit Perëndimor, përfshirë Shqipërinë dhe Kosovën.

Vendet e këtij rajoni kanë parë rritje të madhe të numrit të rasteve me koronavirus, në javët e fundit.

Aktualisht, në Shqipëri janë konfirmuar 3.851 raste pozitive 104 prej të cilëve kanë vdekur ndërsa në Kosovë janë konfirmuar 5.237 raste pozitive, 112 prej të cilëve kanë vdekur.

Nga vendet e Ballkanit Perëndimor, Serbia është më e goditura, me gati 20.000 raste pozitive dhe 429 viktima.