Ja kur do të largohet Donald Lu nga Shqipëria dhe cilat do të jenë prioritetet e SHBA…

Ambasadori amerikan Donald Lu do të largohet nga Shqipëria këtë verë. Kjo të paktën raportohet nga një prej mediave në Shqipëri, por që është deklaruar edhe më parë nga vetë kryediplomati amerikan në Tiranë.

Zv. Ndihmës Sekretari amerikan i Shtetit në detyrë, Matheë Palmer, thotë se ambasadori aktual amerikan, Donald Lu, do të largohet nga Shqipëria në verë, shkruan Mapo.

I pyetur mbi ndryshimin e mundshëm të politikës së SHBA ndaj Shqipërisë, Palmer përgjigjet se përparësitë e politikës së Uashington-it do të jenë të njëjta.

Si të tilla ai liston mbështetjen e reformës së gjyqësorit, luftën kundër korrupsionit dhe krimit të organizuar dhe ndaj ekstremizmit të dhunshëm.

Zyrtari i Departamentit të Shtetit thotë se për emrin e ambasadorit të ri duhet pyetur në Shtëpinë e Bardhë.

Me shumë gjasa ambasadori Lu do të largohet në muajin gusht.

Referuar asaj çka ka thënë Palmer duket se politika amerikane në raport me Shqipërinë nuk do të ketë ndonjë ndryshim kursi refereuar prioriteteve. Janë të njëjtat çështje për të cilat Donald Lu gjatë mandatit të tij si ambassador u investua në Tiranë.

Lu mbështeti proçesin e dekriminalizimit, të inicuar nga Partia Demokratike, sikundër i dha një shtysë të fortë hartimit dhe miratimit të reformës në drejtësi. Madje për këtë të fundit pati një angazhim të plotë dhe për muaj me rradhë ishte në krye të axhendës së SHBA në Shqipëri.