Ja struktura e re e Policisë së Shtetit, drejtuesit që rrezikojnë postet…

Policia e Shtetit nga dita e sotme do të ketë strukturën e saj të re, e cila është firmosur nga Drejtori i Përgjithshëm i Policisë së Shtetit. Kjo strukturë përgjysmon numrin e shefave në piramidën drejtuese të policisë, duke shkrirë një pjesë të konsiderueshme të sektorëve të ngritur 5 vite më parë, gjatë kohës që Ministria e Brendshme drejtohej nga Sajmir Tahiri.

Struktura e policisë në qarqe

Përgjysmohet numri i sektorëve. Aktualisht janë 8 sektorë, do të përmblidhen në 4 sektorë. Gjithashtu do të shtohet një sektor tjetër i veçantë: Sektori i shërbimeve Policore të Specializuara.

– Sektori për krimet dhe sektori për rendin publik do të shkrihen në një të vetëm të emëruar Sektori i Sigurisë Publike.

– Sektori për krimin Ekonomik + Sektori për Krimet e Rënda + Sektori për trafiqet dhe drogën do të shkrihen në një të vetëm të emëruar Sektori për Hetimin e Krimit të Organizuar.

-Antidroga dhe trafiqet e paligjshme bashkohen së bashku në nivel seksioni.

-Po ashtu dhe seksionet e mëparshme të fragmentuara të Krimit ekonomik do të mblidhen në një të vetëm. Të gjitha këto nën varësinë e Sektorit për Hetimin e Organizuar.

-Shtohet Sektori i shërbimeve Policore të Specializuara me 4 seksione nën varësi ai i agjentëve, përgjimeve, policisë shkencore dhe shqiponjat.

-Ndërsa Sektori i Policisë Rrugore qëndron si strukturë por rikonfigurohen seksionet nën varësinë e tij me heqjen e një seksioni dhe me decentralizimin e trafikut urban dhe interurban (modeli i Tiranës).

Me anë të kësaj strukture synohet të forcohet Patrulla e Përgjithshme dhe aplikimi i nocionit të Zonës Policore.

-Unifikim i zonës policore në një zonë gjeografike në të cilën caktohen në mënyrë permanente për të përmbushur detyrat të gjitha shërbimet, patrullë e përgjithshme, SPZ (specialist i policisë së Zonës), ndihmës specialisti për krimet dhe specialist për krimet.

– Riformatim i rolit të SPZ;

-Ulje e kompetencave dhe fokusim në detyra;

-Krijimi i funksionit edukuese për oficerin e Policisë Kriminale;

-Rritja e kapaciteteve analitike për komisariatin. E më konkretisht Zv shefi i komisariatit do të ketë në dispozicion 2-4 specialistë për planifikim, analizim, monitorim dhe vlerësim.

Modeli i ri propozon uljen me 50% të numrit të shefave të sektorit dhe krijimit të një strukture në nivel baze. Rritje të rolit të Sallës së Komandimit dhe dhënia e kompetencave drejtuese operacionale.

Përqendrim i strukturave të krimit të organizuar në një sektor. Krijimi i sektorit të analizës pranë zv.drejtorit duke rritur rolin e këtij të fundit në planifikimin, monitorimin dhe vlerësimin e situatës.

Përqendrim të strukturave të sigurisë publike në një sektor. Rritja e rendimentin të ndihmës specialistëve për krimet duke i përqendruar në një seksion të veçantë në Drejtorinë Vendore të Policisë. Përqendrim i kapaciteteve profesionale dhe teknike të policisë rrugore në nivel sektori.