Ju shnosh!
nga Agim Popoci
Ju që keni besuar se Partia Demokratike është e djathtë dhe e pacenueshme, se antikomunizmi është fryma dhe shpirti i PD, se Shkodra nuk bie në duart e komunistëve me asnjë çmim, në 14 Maj e patë para syve se si u shkërmoq në një proces elektoral, si u zhduk pandehur një ëndërr që e konsideruat pasuri kombëtare; Dhe, sot, mund të kërkoni shumë arsye, si dhe pse ndodhi!
Por, rivali politik i Partisë Demokratike ishte dhe është Edi Rama, ai i cili nuk fitoi asnjë garë elektorale me një proces të lirë dhe të ndershëm, madje as brenda partisë së tij!
Bandat kriminale që terrorizuan dhe blenë votën në 14 Maj, ishin dhe janë në krah të Edi Ramës që nga dita e parë kur ai shkeli në ujërat politik!
Dhe, nuk janë rastësisht në PS, pra, në krye të pushtetit, sepse ato i ka drejtuar dhe i drejton Sigurimi i Shtetit! Po ky Sigurim i cili që nga momenti i parë që u shfaq Partia Demokratike dhe fitoi zgjedhjet e para pluraliste, mori botën në sy, për t’u rigrupuar shumë shpejtë sepse Sali Berisha bëri gabimin e parë dhe fatal për PD-në duke deklaruar se nuk janë për hakmarrje!
Me rigrupimin e Sigurimit të Shtetit u humbën dhe zgjedhjet e para lokale për të filluar betejën e madhe me Sali Berishën dhe shkërmoqjen e Partisë Demokratike!
Deri sa doli nga goja e Lulzim Bashës dhe bedelëve të tij, shumë të deleguar të Sigurimit të Shtetit në Partinë Demokratike rrëfyen se Sali Berisha erdhi në PD me urdhër të Ramiz Alisë! U shkrua dhe raportua në të gjitha mediat, por në asnjë nga shtetet ku ra komunizmi, fjala e një krimineli komunist nuk u mor për bazë sikur se në Shqipëri ndonëse kishim të bëjmë me një injorant me të vetmën aftësi të dëshmuar: Vrasës!
Dhe, jo vetëm kaq! Katovica, kjo rrëfenjë e shëmtuar e Ramiz Alisë u bë ligj për të përçarë Partinë Demokratike dhe sot flitet për një dokument që vërtetë ekziston edhe nga ata që nuk e besuan; Dhe, për asnjë moment nuk u bë i dyshimtë nga ajo kastë politike dhe jo vetëm, ndonëse në asnjë shtet nuk ra komunizmi ashtu siç u projektua në kokat shqiptare nga Sigurimi i Shtetit!
Tesera e partisë komuniste e Sali Berishës e përndoqi liderin demokrat që nga dita e parë e kryesimit të kësaj partie, dhe jo nga dita kur filloi të tundet nga llumi demokratë dhe grupimi antishqiptar që thirret në vlerat euroatlantike. Por, shkarja e një detaji e bënë gjithë këtë maskaradë të frikshme edhe për civilizimin dhe jo vetëm për realitetin shqiptar, pse në krye të këtyre lëvizjeve përçarëse për 30 vjet shfaqen persona si Preç Zogaj, i njohur në botën e Sigurimit të Shtetit me pseudonimin Çiftelia!
Si mund të përkthehen synimet e këtij grupi euroatlantik kur në krye të tyre shfaqet një spiun i Sigurimit të Shtetit, viktimat e të cilit janë ende gjallë! Ose si mund të hapen dosjet, të quhen dhe sukses nga ky llum politik që shfaqet si parimor dhe jombështetës i Sali Berishës të shpallur non grata nga Departamenti i Shtetit, kur ky sukses i hapjes së dosjeve shoqërohet me Çiftelinë!
Ligji 7501 si dëmi i madh i pronave që është miratuar nga Sali Berisha nuk është zbulim i euroatlantikëve që sot e rrëfejnë sepse këtë legjendë e ka kuruar me kujdes Sigurimi i Shtetit që nga momenti i parë kur u miratua! Atë ditë, kreu i parlamentit Kastriot Islami nuk drejtoi seancën në mënyrë që të projektohet në mendjen e shqiptarëve imazhi demokrat në ditën e votimit ndonëse mazhorancë ishte Partia kriminale e Punës! Dhe, sot, drejtuesi i seancës ose nënkryetari i parlamentit në atë kohë, Aleksandër Meksi, nuk lakohet as si emër e lëre më si drejtues i një procesi që ishte iniciuar nga komunistët!
Ndoshta miratimi i Ligjit 7501 sot mund të quhej edhe shqetësim, pavarësisht se nuk ishte realisht produkt i Sali Berishës, sikur pronat dhe pasuria tjetër e luajtshme që u plaçkit nga komunistët do të përfundonte në duart e pronarëve! Por, nuk mjafton fakti se lufta që bëjnë kundërshtarët që dolën nga “gjiri i PD” kundër Sali Berishës luftohet nga zengjinët aktual, kur asnjëri prej tyre nuk ka të bëjë me ata që komunistët i plaçkitën pasurinë në vitin 1945! Përderisa këta zengjin janë nipër dhe mbesa të nomenklaturës komuniste ose drejtues të Sigurimit që luftuan kontrabandën gjatë regjimit, sot mund të jetë në shikim të parë shqetësim i euroatlantikëve dhe duhet të ishte kauzë e pakompromis e Partisë Demokratike, por nuk është dhe nuk do të jetë kundërshti e zengjinëve të tranzicionit sikur goja e euroatlantikëve të mos mbyllet kurrë!
Të përndjekurit politik ishin dhe janë bërthama e Partisë Demokratike, fryma dhe shpirti i saj, por, kjo nuk do të thotë se është e djathtë! Lëmoshën nuk e njehë asnjë e djathtë në botë sado që akuzohet sot Sali Berisha se nuk e paguar vuajtjen, dhe e vetmja gjë për të cilën mund të akuzohet ky njeri që drejtoi Partinë Demokratike dhe ka të bëjë me të përndjekurit politik është amnistia e kriminelëve komunist dhe mos integrimi i kësaj kategorie të prodhuar nga komunizmi, në jetën e përditshme!
As rikthimi i PD për herë të dytë në pushtet nuk i shërbeu forcimit të kauzave të djathta gjë që i dha terren Sigurimit të Shtetit që ishte larguar për pak ditë nga faqja e dheut për t’u rigrupuar shumë shpejtë! Kjo bëri që të përndjekurit politik jo të favorizohen, por me raste të ndjehen dhe fajtor kur në postet kyçe përballeshin me pjellat e komunizmit!
Por, kjo nuk e kënaqi Sigurimin e Shtetit e cila vazhdoi punën me njerëzit e infiltruar në Partinë Demokratike, për ta çuar përpara synimin primar, marrjen e pushtetit! Pse u shfaq Sigurimi me po të njëjtit protagonist si Çiftelia edhe në krah të opozitarit Edi Rama, nuk ishte rastësi, por, mesazh!
Ashut siç nuk ishte rikthimi i Edi Ramës, pra, Sigurimit të Shtetit në pushtet, as rastësiu dhe as që më pak risi!
Ju që keni besuar te Partia Demokratike u goditët!
Sërish e patë me sytë tuaj se si po flakeni në rrugë nga ata që nuk e dinin se çfarë është hakmarrja, por, terrorin e kishin në gjak; Dhe, në fund iu rrëmbyen edhe antikomunizmin, frymën dhe shpirtin e PD, ata që Ju mendonit se i kishit kolegë por papritmas u zgjuan si bedelë të Edi Ramës për t’ju mbyllur derën pse respektoni liderin historik të Partisë Demokratike kur Departamenti Amerikan i Shtetit e shpall non grata!
Dhe, dera nuk iu hap as pas 6 Marsit kur ky llum politik u mendua se kishte ndryshuar mendje dhe po bashkëpunonte me Tom Doshin, gjithashtu non grata!
Por, jo, demokrat nuk mund të quhesh, sipas Sigurimit të Shtetit, nëse nuk urren Sali Berishën!
Postulat i cili ngeli në fuqi edhe në Gjykatën e Apelit, KQZ dhe KAS, sepse zgjedhjet duhet ti humbet çdo demokrat që për lider e njehë Sali Berishën!
E këtu përfshihet edhe Shkodra, ajo loce që Ju e kishit bindje se nuk bie në duart e komunistëve me asnjë çmim!
Ja që ra, dhe Ju 14 Majin e mendoni se ishte fundi i botës!
Edi Rama kur u ul në fronin e Kryeministrit tha se nuk keni parë gjë akoma, dhe për shpirtin që ka edhe pas rezultatit të zgjedhjeve të 14 Majit, këtë gjë do ta përsëritë pa dyshim!
Ju që keni besuar se Partia Demokratike është e djathtë dhe e pacenueshme, se antikomunizmi është fryma dhe shpirti i kësaj partie, nuk mjafton që skandalizoheni duke parë se si PD po shkërmoqet nga një proces elektoral që nuk plotëson asnjë standard kombëtar ose ndërkombëtar!
Ju shnosh!
Sot, duhet të jeni krenar që tumorin e PD të cilin e përdori Edi Rama kundër jush, u largua vetë! Por edhe të kujdesshëm nëse po ky Edi Rama u rikthen partinë në Gjykatën e Lartë!
Sot, PD ka nevojë për një ndërhyrje të thellë dhe jo plastike, për rindërtim dhe jo bashkim, për analizë dhe jo falje! Ndryshe më mirë të mos jetë fare se sa të lejohet që një proces të mundshëm pajtimi ta merr në menaxhim sërish Sigurimit i Shtetit!
Sot, vetëmohimin dhe sakrificën politike nuk e njohin vetëm shqiptarët, rënien dhe ringritjen e kanë kaluar të gjitha partitë e djathta në vendet ish-komuniste edhe pse nuk kishin Ramiz Alinë dhe nuk shkuan të negociojnë në Katovicë!
Kishin vetëm një qëllim: Atdheun e lirë!
