Kadri Veseli merr ftesë nga Gjykata Speciale

Kryetari i PDK-së, Kadri Veseli, është ftuar për intervistim nga Prokuroria Speciale për krime të luftës në Kosovë, me seli në Hagë.

“Gjithë jetën kam qenë i angazhuar për të mirën e Kosovës dhe këtë e kam bërë tërësisht në baza vullnetare dhe me përkushtimin më të lartë. Kam qenë i bekuar që isha një ndër ideatorët dhe themeluesit e saj, luftëtar i lirisë deri në çlirimin e vendit,” tha Kadri Veseli duke bërë publike dhe ftesën e marrë nga Gjykata Speciale:

“Si një nga udhëheqësit e Ushtrisë Çlirimtare të Kosovës, unë sot kam pranuar ftesë nga Dhomat e Specializuara, për t’u intervistuar më 4 dhjetor në Hagë,” tha Ish-Kryetari i Parlamentit të Kosovës duke përfunduar:

“Ky proces duhet të ketë epilog, duke u bazuar në të vërtetën, faktet e drejtësinë, dhe që nuk e dëmton shtetin e Kosovës në pafundësi. Jam i bindur se edhe kjo Gjykatë do ta vërtetojë luftën e drejtë të Ushtrisë Çlirimtare të Kosovës, por edhe që do t’i ndalë goditjet ndaj të vërtetës së popullit tonë dhe Ushtrisë Çlirimtare të Kosovës. Unë do t’i përgjigjem kësaj ftese, më 4 dhjetor”

Ndryshe, Prokuroria Speciale deri më tani ka ftuar për intervistim rreth 100 persona, disa prej të cilëve ish-figurat e larta të Ushtrisë Çlirimtare të Kosovës, që aktualisht janë pjesë e skenës politike të Kosovës. Në mesin e tyre: Rrustem Mustafa, Sami Lushtaku, Shukri Buja dhe Ramush Haradinaj.