Kandilat e detit fikin tre reaktorë të centralit bërthamor francez
Tre reaktorë në një central bërthamor në Francën veriore u fikën pasi një tufë kandilash të detit bllokuan pompat e ftohjes. Kompania e energjisë EDF ka bërë të ditur sot për incidentin, raporton France24.
Vetëm një reaktor në funksion të plotë
EDF sqaroi përmes një deklarate se tre reaktorë u fikën dje, dhe fuqia e të katërtit u përgjysmua. Reaktori i pestë është i vetmi që vazhdon të funksionojë me kapacitet të plotë, ndërsa i gjashti u fikë më herët për shkak të mirëmbajtjes së rregullt.
“Kjo situatë nuk ndikon në sigurinë e centralit, sigurinë e stafit apo mjedisin,” sqaroi EDF
Prodhimi i energjisë bërthamore në Francë është ndërprerë disa herë këtë vit për shkak të valëve të nxehtësisë dhe thatësirës, kështu që EDF duhej të ndalonte funksionimin e disa reaktorëve gjatë qershorit dhe korrikut për shkak të temperaturave të larta.
Të dielën, para këtij incidenti me kandilat e detit, prodhimi francez i energjisë bërthamore ra me 15.6 për qind. Këto janë përllogaritjet e Agjencisë franceze të lajmeve AFP bazuar në të dhënat e publikuara nga EDF që nga viti 2015.
Një problem i përsëritur
Fjala është për termocentralin bërthamor Gravelines pranë Dunkirkut, më i madhi në Evropën Perëndimore, i cili ka gjashtë reaktorë me një fuqi prej 900 megavatësh. I njëjti problem me bllokimin e stacioneve të pompimit të ujit të detit nga kandili i detit ndodhi një vit më parë, kur termocentrali u mbyll gjithashtu përkohësisht.
Bllokime të tilla nuk janë të rralla edhe në pjesë të tjera të botës. Në Suedi në vitin 2013, një termocentral u fikë për tre ditë, dhe një incident në Japoni në vitin 1999 çoi në një rënie të ndjeshme të prodhimit të energjisë.
Ekspertët shpjegojnë se peshkimi i tepërt, ndotja nga plastika dhe rritja e temperaturave të detit për shkak të ndryshimeve klimatike krijojnë kushte të favorshme për riprodhimin e shpejtë të kandilit të detit.
