Takimi Ernst-Ulutash, SHBA rikonfirmojnë mbështetjen për KFOR-in
Anëtarja e Komitetit të Senatit për Shërbimet e Armatosura, SASC, senatorja amerikane Joni Ernst, në takim me komandantin e misionit të NATO-s në Kosovës, gjeneralmajorin Ozkan Ulutaş, ka rikonfirmuar mbështetjen e Shtetet e Bashkuara për misionin e KFOR-it.
Gjatë takimit në selinë e KFOR-it në “Camp Film City” në Prishtinë është diskutuar për situatën e sigurisë në Kosovë dhe rajon, ndërsa Ulutash ka theksuar përkushtimin e KFOR-it për të garantuar një mjedis të sigurt dhe të qëndrueshëm për të gjithë njerëzit që jetojnë në Kosovë.
“Gjeneralmajor Ulutash shprehu mirënjohjen e tij për kontributin e kahershëm dhe të çmuar të Shteteve të Bashkuara në misionin e KFOR-it të udhëhequr nga NATO,” thuhet në njoftimin e KFOR-it.
Ndryshe, anëtarja e Komitetit të Senatit për Shërbimet e Armatosura, SASC, senatorja amerikane Joni Ernst, gjatë qëndrimit në Prishtinë ka zhvilluar takime edhe me krerët e institucioneve të Kosovës.
Në takim me Kryeministrin në detyrë, Albin Kurti ritheksoi qëndrimin e Qeverisë, që Kampi Bondsteel duhet të shndërrohet në prezencë të përhershme ushtarake në Republikën e Kosovës.
“Një prezencë e tillë do të shërbente si garantuese për paqe dhe siguri në Kosovë dhe rajon, si dhe një bazë strategjike për operacionet e NATO-s në Evropën Juglindore,” tha Albin Kurti në takimin në të cilin me senatoren Ernst biseduan edhe për situatën politike në Kosovë dhe për rëndësinë e vazhdimit të diskutimeve mes partive politike parlamentare për të arritur një marrëveshje për formimin e institucioneve.
