Kompanitë e naftës kërkojnë ndërprerjen e markimit: Kontrata ka përfunduar më 27 shkurt! Doganat: Koncesioni mbyllet më 1 gusht!
Kompanitë importuese të naftës kërkojnë ndërprerjen e pagesave për tarifën koncesionare të markimit të naftës, pasi kontrata ka përfunduar dhe pagesa janë të jashtëligjshme.
Në shkresat drejtuar Ministrisë së Financave dhe Ekonomisë dhe Drejtorisë së Përgjithshme të Doganave operatorët e cilësojnë të jashtëligjshëm vazhdimin e pagesës së markimit, pasi duke iu referuar kontratës afati i përfundimit të koncesionit është përcaktuar data 27 Shkurt 2023. Përfundimi i koncesionit sipas kompanive shprehet qartë edhe në pasqyrat e QKB-së të deklaruara nga kompania GFI Albania.
Drejtoria e Përgjithshme e Doganave pohoi për Monitor se afati i përfundimit të koncesionit është data 1 gusht 2023, sipas vendimit të 2013-s të qeverisë së mëparshme që përcakton si datë efektive të shënjimit të naftës, pra të nisjes së konscensionit, datën 1 gusht 2013.
Ministria e Financave dhe Ekonomisë sipas këtyre përcaktimeve për mbylljen e kontratës në muajin gusht 2023 ngriti që vitin e kaluar një grup pune me ekspertë të saj dhe Doganave të Përgjithshme. Qëllimi i grupit të punës ishte përgatitja e inventarit për pajisjet e instaluara nga subjekti dhe përcaktimi se cila prej tyre do të kalonin në pronësi të shtetit. Por kompania koncesionare GFI Albania bllokoi procesin e grupit të punës për mbylljen e koncesionit me pretendimin që ende nuk është realizuar një element i kontratës ai i markimit të naftës bruto.
Anëtarë të grupit të punës nga DPD të kontaktuar nga Monitor theksuan se tashmë këtë vit kanë përfunduar procedurat për inventarizimin e koncesionit. DPD pohoi se një tjetër grup pune është ngritur për koncesionin, por duke mos sqaruar se cili është objektivi i punës së tij. Ndërsa më herët Ministria e Financave dhe Ekonomisë nuk iu përgjigj kërkesës për informim të Monitor për afatet e përfundimit të koncesionit, dhe si do të vijohet më tej për këtë shërbim.
Ndërsa loja për afatet e përfundimit të koncesionit ngjason si ajo e “maces me miun” për operatorët kontrata e miratuar nga Kuvendi i Shqipërisë prevalon mbi vendimet e qeverisë, dhe se shuma antiligjore e paguar deri tani vetëm nga një operator llogaritet në vlerën e 56 milionë lekëve. Sipas tyre kjo tarifë e antiligjore por ngarkon më shumë në çmim konsumatorin.
“Sipas leximit korrekt të kësaj kontrate, afati i përfundimit të saj është me datë 27.02.2023. Në këtë kuptim, për shkak të përfundimit të afatit të kontratës, ku rrjedhimisht edhe afati dhe detyrimet për shoqëritë e tregtimit të hidrokarbureve kanë përfunduar që me datë 27.02.2023, mbas shumë bisedimeve me autoritetet doganore, jemi të detyruar t’ju drejtohemi me këtë kërkesë pasi na rezulton që në mënyrë të paligjshme të paguajmë detyrimin në vlerën prej 0.614 leke/litër + TVSH, për llogari të shoqërisë koncensionare “GFI ALBANIA” sh,p,k, në zbatim të VKM nr. 498, datë 30.05.2023.
Gjithashtu, përfundimi i kontratës së koncesionit me datë 27 shkurt 2023, pohohet edhe nga vetë shoqëria “GFI ALBANIA” sh.p.k, ku në shënimet shpjeguese të pasqyrave financiare për vitin e mbyllur me 31.12.2021, (bashkëlidhur), shoqëria pohon se: “Kontrata e Koncesionit ka një afat 10 vjeçar nga data efektive e saj e cila përfundon më 27 shkurt 2023”. Çuditërisht, edhe pse ndodhur përpara këtij fakti, nuk kemi asnjë reagim nga autoritet përkatëse.
Për sa më sipër, pa hyrë në detaje të diskutimeve, nëse ky shërbim vlejti për eliminimin e kontrabandës apo për ruajtjen e cilësisë (mendimi jonë është që s’ka pasur asnjë efekt pozitiv), kërkojmë zbatimin e kontratës së koncesionit dhe të ndërpritet menjëherë detyrimi për të vazhduar pagesën në mënyrë të paligjshme, veç të tjerash jep një efekt për rritjen e çmimit për konsumatorin”, citohet në letrën e operatorëve.
Shqetësimit të operatorëve sërish Drejtoria e Përgjithshme e Doganave iu është përgjigjur në kontekstin e vendimit të miratuar në 2013. “Lidhur me sa më sipër, sqarojmë se: bazuar në nenin 4 të “Kontratës së Koncensionit për Shërbimin e Markimit dhe Monitorimit të Karburanteve”, miratuar me VKM nr.200, datë 13.03.2013, kompetencat për ndërmarrjen e të gjitha hapave të nevojshëm ligjorë dhe nënligjorë për zbatimin e Kontratës se Koncesionit e ka Autoriteti Kontraktues”.
Kontrata koncesionare u miratua nga qeveria e mëparshme në vitin 2011 me një ofertë të pakërkuar nga kompania ndërkombëtare Global Fluid International, me justifikimin se GFI ishte e specializuar në prodhimin e kimikateve dhe ka filluar të zbatohet në vitin 2013. Qëllimi i koncesionit ishte të garantonte cilësinë e produktit (mospërzierjen e tij) dhe mosndërrimin e destinacionit të karburantit (p.sh që nafta që përdoret për peshkimin të mos hidhej në treg)./Monitor/
