Kongresmenët amerikanë në Ballkan, vizitë edhe në Kosovë
Dy kongresmenë amerikanë, republikani Keith Self dhe demokrati Suhas Subramanyam, do të qëndrojnë sot në Serbi, ku do të vizitojnë edhe Luginën e Preshevës, të banuar me shumicë shqiptare.
Ata do të priten nga Kryetarja e Parlamentit të Serbisë, Ana Brnabiç, në Beograd, prej ku nesër do të shkojnë edhe në Preshevë.
Kryetarja e kësaj komune në jug të Serbisë, Ardita Sinani, përmes rrjetit social Facebook u shpreh se “Presheva mirëpret delegacionin e Kongresit amerikan”.
“Një moment historik për Luginën,” tha Ardita Sinani.
Me iniciativën e kongresmenit Self, anëtarët e Komitetit për Politikë të Jashtme të Dhomës së Përfaqësuesve të Kongresit amerikan miratuan në janar të këtij viti një projektligj, që i kërkonte Sekretarit amerikan të Shtetit të përgatiste një raport gjithëpërfshirës për pozitën e pakicave në Serbi, me fokus të veçantë te shqiptarët në Luginën e Preshevës.
Në Serbi jetojnë më shumë se 60.000 shqiptarë, të cilët përbëjnë pakicën e katërt më të madhe atje, sipas regjistrimit të fundit të popullsisë, në vitin 2022.
Në raportet ndërkombëtare, Lugina e Preshevës – që përfshin Preshevën, Medvegjën dhe Bujanocin – konsiderohet tërësisht e izoluar dhe thuhet se merr vëmendje vetëm në kohë zgjedhjesh.
Një ditë më herët, Self dhe Subramanyam qëndruan në Sarajevë, ku takuan përfaqësuesit e Presidencës së Bosnje Hercegovinë.
Atje diskutuan për “mënyrat për të forcuar partneritetin dypalësh dhe për të mbështetur stabilitetin në Ballkanin Perëndimor”.
Përmes një postimi në rrjetin social X, Ambasada amerikane në Sarajevë nënvizoi se Shtetet e Bashkuara janë të përkushtuara ndaj Marrëveshjes së Daytonit për Paqe dhe integritetit territorial të Bosnje Hercegovinës.
.@RepKeithSelf and @RepSuhas met with representatives of the BiH Presidency to discuss ways to strengthen our bilateral partnership and support for stability in the Western Balkans.
— US Embassy Sarajevo (@USEmbassySJJ) May 23, 2026
A stable and secure BiH advances American interests in the region. The United States remains… pic.twitter.com/Usu6Hs146u
Në mesazhin e publikuar nga Zyra e Përfaqësuesit të Lartë Ndërkombëtar, OHR, në Bosnje Hercegovinë me rastin e vizitës së kongresmenëve, u theksua po ashtu rëndësia e angazhimit amerikan ndaj Marrëveshjes së Daytonit.
Dy kongresmenët u takuan me zëvendëspërfaqësuesin e parë të lartë, Louis Crishock, “për të diskutuar situatën politike në Bosnje dhe Hercegovinë”.
PDHR Louis Crishock met with a delegation from the U.S. House of Representatives, Congressman Keith Self and Congressman Suhas Subramanyam, for an exchange on the political situation in Bosnia and Herzegovina.
— OHR BiH (@OHR_BiH) May 23, 2026
Crishock welcomed the visit as a tangible sign of the continued… pic.twitter.com/1tAPRwXWbZ
Delegacioni i kongresmenëve amerikanë pritet të qëndrojë nesër, 26 Maj, në Kosovë.
Javën e kaluar, kryeministri në detyrë i Kosovës, Albin Kurti, njoftoi se ka zhvilluar një takim virtual me një grup kongresmenësh, në mesin e tyre edhe Self.
“Bashkëpunimi dypalësh në mbrojtje midis Kosovës dhe Shteteve të Bashkuara është më i fortë se kurrë. Kjo, kryesisht, për shkak të mbështetjes dërrmuese dypartiake që Kosova gëzon në Kongresin e SHBA-së,” u shpreh Albin Kurti përmes rrjetit social X, pas asaj bisede.
Bilateral defense cooperation between Kosova and the United States is stronger than ever. This is in large part due to the overwhelming bipartisan support that Kosova enjoys in the U.S. Congress.
— Albin Kurti (@albinkurti) May 21, 2026
I had the pleasure to hold a virtual meeting tonight with four of Kosova's most… pic.twitter.com/D2pKQjjxnv
Ndryshe, në fund të prillit, Self, bashkë me kolegët e tij, Ritchie Torres dhe Mike Lawler, propozuan një rezolutë që synon ta shtyjë përpara rrugën e Kosovës drejt NATO-s.
Rezoluta me mbështetje dypartiake thekson, mes tjerash, se “qeverisja demokratike e Kosovës, mbikëqyrja civile e forcave të sigurisë dhe bashkëjetesa shumetnike përbëjnë një argument bindës për anëtarësimin në NATO”./RFE/
