Kosova në rrezik/ Marrëveshjet me Serbinë, Albin Kurti: Janë firmosur pa autorizimin e Qeverisë!
Dy Marrëveshjet me Serbinë për hekurudhë dhe autostradë, që u shpallën me pompozitet dhe për të cilat Presidenti i Kosovës, Hashim Thaçi dha leksione demokracie, na del se u firmosën pa autorizimin e Qeverisë. Këtë e konfirmoi Kryeministri Albin Kurti sot në Munchen. Dhe jo vetëm kaq!
“Këta zyrtarë nuk kanë marrë autorizim nga Qeveria e re as për të negociuar e as për të nënshkruar marrëveshje. Për më tepër as teksti i marrëveshjes nuk është bërë i njohur për publikun e për Qeverinë,” thekson Albin Kurti në reagimin e tij përmes rrjetit social Facebook duke dëshmuar kështu se Hashim Thaçi vazhdon me strukturat e tij të funksionoj me shtetin e Kosovës siç veproi me gylenistët dhe gazin lotsjellës, që i dha pa lejen e kryeministrit Ramush Haradinaj i cili tashmë është e qartë se nuk e kishte nën kontroll qeverinë.
Si do të veproj Kryeministri i riAlbin Kurti mbetet për tu parë por që Kosova është në rrezik kjo nuk vihet në dyshim.
Gjithsesi ja reagimi i plotë i Albin Kurtit:
Sot në Munich janë nënshkruar dy marrëveshje nga zyrtarë të autorizuar nga ish ministri Pal Lekaj dhe i gjithë procesi i negocimit është bërë para fillimit të Qeverisë sonë. Së këndejmi, këta zyrtarë nuk kanë marrë autorizim nga Qeveria e re as për të negociuar e as për të nënshkruar marrëveshje. Për më tepër as teksti i marrëveshjes nuk është bërë i njohur për publikun e për Qeverinë. Kanë qarkulluar drafte të ndryshme jozyrtare.
Sado që të gjitha lidhjet dhe avancimi i standardeve të infrastrukturës janë të domosdoshme për zhvillim të vendeve tona dhe pjesë e vizionit Evropian për bashkëpunim rajonal dhe marrdhënie të fqinjësisë së mirë, megjithatë është shumë me rëndësi që procesi të jetë transparent, rezultat i një negocimi të mirëfilltë dhe në respektim të plotë të sovranitetit dhe ligjeve të vendit, prioriteteve ekonomike dhe në harmoni me obligimet që dalin nga procesi i MSA-së.
Për më tepër, nëse bazohemi te një verzion i marrëveshjes, po qe se analizohet për nga rëndësia ekonomike, hekurudha për në Leshak është më me prioritet dhe më e levërdishme sesa ajo për Merdare.
Në procesin e tranzicionit të qeverisjes, ne jemi duke analizuar të gjithë hapat që janë marrë në të kaluarën dhe ministritë përkatëse janë të angazhuara që këtë ta trajtojnë me prioritet.
