Kryeministri Albin Kurti në Dublin: Kosova synon anëtarësimin në BE dhe NATO
Kosova synon anëtarësimin në Bashkimin Evropian dhe NATO, tha Kryeministri i Kosovës, Albin Kurti, pas takimit në Dublin me Kryeministrin e Irlandës, Micheál Martin, në kuadër të takimit të Komunitetit Politik Evropian, EPC.
Kosova synon anëtarësimin në Bashkimin Evropian dhe NATO, tha Kurti pas takimit, dhe hapi i parë drejt këtij synimi është marrja e statusit të vendit kandidat dhe hapja e negociatave për anëtarësim.
Me këtë rast, Albin Kurti e tha qartë se Kosova llogarit në mbështetjen e presidencës irlandeze për avancimin e procesit të integrimit evropian.
“Republika e Kosovës gjithashtu dëshiron të anëtarësohet në Bashkimin Evropian dhe në NATO, por për të arritur aty së pari duhet të marrim statusin e vendit kandidat dhe të hapim negociatat për anëtarësim. Ne llogarisim në presidencën irlandeze.”
Kryeministri Kurti ka falënderuar në Dublin popullin e Irlandës për strehimin e më shumë se një mijë refugjatëve shqiptarë të Kosovës gjatë vitit 1999, kur ata u dëbuan nga vendi si pasojë e gjenocidit të forcave serbe, ndërsa shprehu mirënjohje për ushtarët dhe oficerët irlandezë që kanë shërbyer në kuadër të KFOR-it për më shumë se dy dekada e gjysmë, duke kontribuar në sigurinë dhe paqen në Kosovë.
Duke folur për rëndësinë e takimit të Komunitetit Politik Evropian, Kryeministri i Kosovës ka theksuar se bashkëpunimi dhe koordinimi mes liderëve evropianë janë të rëndësishëm në kohën kur vazhdon agresioni rus në Ukrainë.
Në fund, duke fol për sulmet ndaj infrastrukturës kritike dhe luftën hibride, Kryeministri i Kosovës, Albin Kurti, vlerësoi se takimet e tilla ndihmojnë në bashkërendimin e qëndrimeve dhe bashkimin e forcave të vendeve pjesëmarrëse.
