Kryeministri i ka bërë tre mandate përnjëherë, apo…
nga Agim Popoci
Dibrania në Tunelin e Murrizit kot ishte munduar me mangallin e saj në mënyrë që Kryeministri Edi Rama të kuptoj se duhet të ngroh dajren sepse pas tre mandateve nuk po i kumbon mirë!
Qëllimi i mirë i Zonjës nga Dibra as që mund të kontestohet, por, zëri i shpifur sot i dajres së Edi Ramës ka një histori 12 vjeçare që i bënë të gjithë shqiptarët të ndjehen me turp dhe të ulin kokën sepse ishin vetëm disa individ ndër vite që morën guximin ta pyesin në sy Kryeministrin pse nuk ka mbajtur premtimet, edhe pse përballeshin me pyetjen standarde:
-Sa fëmijë i ke?
-Tre (katër, pesë…) përgjigjeshin zonjat dhe zotëritë shqiptarë që po shikonin se nga premtimet e Kryeministrit nuk ka asgjë e Edi Rama me komunikim ordiner vazhdonte:
-I ke bërë përnjëherë apo një nga një…
Sot, kur elitën e tij politike dhe intelektuale me të cilën erdhi në pushtet e ka në burg ose janë në kërkim nga drejtësia, kur Shqipërinë e braktisën mbi 1 milion shqiptarë për shkak të kësaj qeverisje kriminale, dhe, Edi Rama kërkon mandatin e katërt pa e vrarë mendjen nëse duhet ose jo të ngrohet dajrja, shqiptarët kanë gjithë të drejtën e Zotit ta pyesin Kryeministrin Edi Rama:
-Tre mandatet i ke bërë përnjëherë, apo një nga një!
Për fatin e keq të Edi Ramës dhe vetë shqiptarëve që e lejuan, një nga një rezultojnë të jenë tre mandate katastrofike ndërsa shohim në krye të qeverisë njeriun që vetëm mashtroi; Dhe, sot, tund pasaportën evropiane duke premtuar anëtarësimin e Shqipërisë në BE ndërsa demonstron në rrjetet sociale trofeun e tij të vetëm që arriti në politikë, Zotni Lafshën!
Ky Kryeministër i cili e nisi mandatin e tij të parë me rrëfenjën e taksistit dhe kishte dy premtime madhore, ujë 24 orë dhe legalizimin pa lekë meqë luftën kundër korrupsionit askush nuk ia mori seriozisht një hajduti që kishte drejtuar Bashkinë më të korruptuar në glob!
Madje u kapardis si Rama i Madhërishëm në Shtëpinë e Bardhë kur në takim me Presidentin e SHBA mori dy bashkëpunëtorët e tij Samiri Tahirin dhe Arben Ahmetajn, që do të përfundojnë si dy ministrat më të korruptuar nga Drejtësia e re e Edi Ramës!
Por, në këto momente askush nuk dyshoi se Edi Rama thjeshtë po i përdor ndërsa po afrohej fundi i mandatit u pa me një tepsi duke akuzuar për korrupsion partnerin e koalicionit që kishte për katër vjet, thuajse nuk e dinin shqiptarët se kush ishe Likja; Për ujin tha se nuk e dinte mirë situatën ndërsa legalizimi pa lekë përveç se nuk u realizua filloi të shuhet me fadroma edhe kur ai ishte realizuar me shumë lekë djerse shqiptare!
Nga fundi i këtij mandati të dështuar tërësisht, në çastet kur posti i tij po rrezikohej, dhe Kryeministër po projektohej edhe nga ndërkombëtarët Lulzim Basha, Kryetari i Partisë Socialiste dhe Kryeministri në ikje u pa me dajre duke premtuar një ASGJË të madhe sepse fajet i kishte Saliu; Ndërsa nga të gjitha premtimet shqiptarët nuk kishin as dy orë ujë në ditë, larg asaj që kishte premtuar Edi Rama ndërsa korrupsioni arriti kulmin në shtetin që tashmë po e drejtonte krimi dhe droga e kultivuar dhe trafikuar kudo!
Pse Kryeministri i projektuar u shndërrua në Lafshë pak para se të ulej në fron këtë e dinë vetëm Edi Rama, dhe, si i fitoi zgjedhjet tashmë të gjithë e dinë, me përjashtim të SPAK-ut që dosjet e krimit elektoral edhe sot vazhdon dhe i shetitë nëpër furgonat e Prokurorisë!
Katër vjetët e mandatit të dytë filluan të bukosin zërin e dajres së Edi Ramës ndërsa po dëshmohej se aftësia për të vjedhur më shumë se Likja ishte sofistikuar në çdo pikëpamje, sa nuk ka Reformë e Drejtësisë që e parandalon sikur të gjithë shqiptarët e kësaj bote të hanë barë, ashtu siç kërcënonte denoncuesit e Kryeministrit Rama, Ambasadorja e Sorosit në Tiranë, Yuri Kim!
Dhe, Edi Rama, përveç kanabizimit bëri dhe diçka tjetër që nuk premtoi, përdhosi FBI-në në sy të Shoqes Yuri që e mbante, siç tha Kryeministri Rama, Sekretare të Partisë, duke korruptuar njërin nga Zyrtarët e lartë të Byros Federale amerikane të Hetimit!
Ndërkohë shqiptarët po kërcënoheshin nga një epokë e re ku sërish Shoqja Yuri do ta uroi, Zotni Lafsha do të hesht ndërsa shqiptarët do të vazhdojnë ta kenë për Kryeministër njeriun që blenë vota, mbjellë drogë dhe nuk bënë më as premtime, Edi Ramën.
Me ndjesinë superiore dhe pa e ngroh dajren fare për mandatin e tretë, ku për Shoqen Yuri nuk i kishte mbetur pikë pështyme në gojë, për premtime më nuk e qante kokën Kryeministri më i dështuar në historinë e shtetit shqiptarë ndonëse ishte pranë humbjes, me shitjen e ajrit, ujit dhe tokës shqiptare, drogës dhe krim gjithandej; Sepse, Edi Rama kishte një shpresë për të fituar mandatin e tretë, Zotni Lafshën!
Asgjëkundi nuk shihej dajrja edhe ashtu e shurdhuar por vetëm zëri kumbues i Edi Ramës, “Ta hongsha zemrën!” Se kujt i dedikohej kjo këngë nuk u kuptua, por ndryshimi i Kodit Zgjedhor shoqëruar me heshtjen e Zotni Lafshës i cili kishte filluar festën e fitores sqaroi shumë gjëra, jo vetëm me mandatin e tretë që fitoi Rama i Madhërishëm!
Me premtimin e vetëm “Ja re le le le le” që e këndonte me shumë ëndje edhe Tao i EncroChatit, Edi Rama pa u skuqur fare me dhjetëra zyrtarë të prangosur që kishte sepse kishin vjedhur edhe fondet e Bashkimit Evropian, mori mandatin e tretë duke festuar dhe me Tigrin e Lali Erin që për pak muaj do të jenë viktimë e rrjetës së SPAK-ut, ndonëse ishin dy bashkëpunëtorët më të ngushtë të Edi Ramës!
Sot, kur dajren nuk pranon ta ngrohë, kur më shumë deputetë e zyrtarë ka në burg se në Parti, Edi Rama kërkon mandatin e katërt me premtimin se do të anëtarësoj Shqipërinë në BE dhe sërish tërhoqi zvarrë Zotni Lafshën duke e fut në fushatën e tij folklorike!
Ndoshta ky premtim do të zinte vend sikur nuk do të ishte ky Edi Ramë që organizoi 21 Janarin vetëm dy muaj pasi Ministrat e Brendshёm tё vendeve tё BE-sё vendosёn nё Nëntorin e vitit 2010 në Bruksel tё heqin vizat për shtetasit e Shqipёrisё, dhe rreth një vit pasi nuk ishte pranuar liberalizimi i vizave vetëm për shkak të politikës opozitare të Ramës që e bënte Maqedoninё, Malin e Zi dhe Serbinё, shtete më ideale për Zonën Schengen!
Ishin dhe veprimet politike antishqiptare nga Edi Rama që nuk erdhën përnjëherë, por një nga një! Ndoshta do të harrohej propaganda e mediave nën kontrollin e Edi Ramës se me liberalizmin e vizave shqiptarët do të përmbytnin vendet e BE-së, sikur Rama të mos bllokonte dhe pranimin e Shqipërisë për vendin kandidat në Bashkimin Evropian me bllokimin e Këshillit Bashkiak të Fier, që u bë dhe kushti kryesor!
Sot, në prag të zgjedhjeve të 11 Majit për mandatin e tij të katërt ku sërish nuk ka Program, Edi Rama mund të vazhdoj me qyfyret e tij në rrjetet sociale me Zotni Lafshën, por, nëse refuzon të ngroh dajren nuk bënë keq ta ngroh kokën të cilën uk rezulton se e ka mirë, ndryshe nuk do të ironizonte njerëzit duke ngrënë bukë!
Është e vërtetë se Edi Rama ka bërë shumë para por kjo nuk e bënë detyrimisht të mençur dhe fisnik nëse deri në dy ditë rri pa ngrënë, siç e ka pohuar.
Pikërisht për këtë çështje, shkrimtarja e njohur angleze që lindi në një familje të pasur në South Kensington, Adeline Virginia Woolf, duke dhënë përgjigje sqaron pse populli shqiptar është fatkeq me Kryeministrin që ngrënien e konsideron turp: “Një njeri nuk mund të mendojë mirë, të dojë mirë dhe të flejë mirë nëse nuk ka ngrënë mirë.”
