Kursi i Euros bie përsëri, prek minimum të ri historik në 95.73 lekë

Kursi i këmbimit Euro-Lek e ka nisur javën me një rënie të mëtejshme dhe ka shënuar një rekord të ri historik. Sipas kursit zyrtar të këmbimit të Bankës së Shqipërisë, monedha europiane u këmbye sot me 95.73 lekë, niveli më i ulët i regjistruar ndonjëherë.

Euro është zhvlerësuar me 1.1% që nga fillimi i këtij viti dhe me 3.8% krahasuar me të njëjtën periudhë të një viti më parë.

Sipas agjentëve të këmbimit valutor, kjo periudhë është karakterizuar nga një ofertë e lartë e Euros dhe shtim të subjekteve që shesin monedhën europiane për ta konvertuar atë në Lekë. Ndërkohë, kërkesa për Euro paraqitet sporadike dhe e përqendruar kryesisht në mbyllje të muajve kalendarikë.

Me hyrjen e tremujorit të dytë, agjentët mendojnë se është e pritshme një rritje e mëtejshme e ofertës valutore, e shkaktuar kryesisht nga shtimi i turizmit. Të dhënat e deritanishme për hyrjet e shtetasve të huaj tregojnë një ecuri në stanjacion për periudhën janar-shkurt, por, pavarësisht kësaj, edhe në tremujorin e parë presionet zhvlerësuese kanë vijuar.

Sipas burimeve nga tregu, Banka e Shqipërisë ka vazhduar ndërhyrjet në tregun valutor, që e kanë ngadalësuar rënien e kursi të Euros, por pa e ndalur dot plotësisht.

Sipas statistikave zyrtare, gjatë vitit 2025 Banka Qendrore bleu 1 miliard e 27 milionë euro, për objektivit të rritjes së rezervës valutore, por në pjesën më të madhe në funksion të qëllimit për të frenuar forcimin e kursit të këmbimit të Lekut. Sasia e valutës së blerë është rritur me 10% krahasuar me një vit më parë.

Kjo jep një tablo më të qartë të ndikimit të bankës qendrore në kursin e këmbimit. Në mungesë të këtyre ndërhyrjeve, rënia e Euros në kursin e këmbimit me Lekun do të kishte qenë edhe më e madhe.

Këtë vit, Banka e Shqipërisë parashikon të rrisë më tej blerjet e planifikuara të valutës në tregun e brendshëm. Ajo synon të blejë përmes ankandeve 330 – 450 milionë euro, me objektiv rritjen e rezervës valutore. Objektivi i blerjeve është rritur ndjeshëm krahasuar me projeksionet në intervalin 270-350 milionë euro të parashikuar për vitin 2025.

Rreziqet inflacioniste, për momentin, nuk po japin ndonjë efekt në kursin e këmbimit.

Ndërkohë, duket se politika fiskale e qeverisë vazhdon të ushtrojë një ndikim shtesë në favor të forcimit të Lekut. Për dy muajt e parë të vitit, suficiti buxhetor arriti një vlerë rekord prej 130 miliardë lekësh, në rritje me 11.5% krahasuar me një vit më parë./Monitor/