Samiti i Diasporës, Rama: Do ketë edhe zgënjime! Do t’i heqim të tëra në kurriz deri sa të bëhemi pjesë e BE
Megalloman si zakonisht, as në Samitin e Diasporës në Tiranë nuk foli si një lider i përgjegjshëm për sfidat kryesore që janë shfaqur para shtetit shqiptar dhe rolit që mund të luaj faktori shqiptar në rrugën drejt Shqipërisë në BE, dhe foli për të kaluarën kur ai ishte në opozitë, dhe ndonëse nuk ka shënuar asnjë arritje në këtë rrugë tha se në të kaluarën Shqipërisë i mbyllej rregullisht dera e negociatave për anëtarësim në Bashkimi Evropian, ndërsa sot vendi ka hapur të gjithë kapitujt e negociatave në një kohë rekord. Kohë kur gjithçka ka ngecur që nga liberalizimi i vizave dhe anëtarësimi i Shqipërisë në NATO, që tashmë rezultojnë arritje vetëm pse, për fat të mirë Edi Rama ishte në pushtet!
Në ditën e dytë të Samitit të Diasporës në Tiranë, shqiptarët nuk panë vetëm Kryeministrin e Shqipërisë por dhe ëndrrimtarit që flet për paraardhësit dhe amanetet e tyre si Gjergj Kastrioti Skënderbeu, Ismail Qemali, Fan Noli apo Faik Konica, dhe rrugën e vështirë që ka përpara me vuajtje në kurrizin e shqiptarëve, por që nuk zuri në gojë punët e tij të pista, si “Balluku” që nuk është sot sfidë por pengesë në rrugën e integrimit në BE.
“Ajo që Ismail Qemali tha në momentin themelues të shtetit tonë: Shqipëria do të bëhet! Ajo ishte një besim që sot si kurrë ndonjëherë ka marrë trajtën e shtetbërjes së Shqipëri dhe që tani preket me sy dhe shihet më afër se kurrë, për ta ulur Shqipërinë në familjen evropiane si të barabartë mes të barabartëve. Fan Noli na kujtonte dikur se Shqipëria nuk mund të bëhet pa qytetarët shqiptarë, dhe sot kur Shqipëria ndodhet në derën e Evropës kjo fjalë merr peshë të jashtëzakonshme, ashtu sikurse edhe fjala e korifeut tjetër Faik Konica. Këtu qëndron ndryshimi i kësaj dekade ku falë reformave, kemi kaluar nga një Shqipëri që përpiqej të mbijetonte, në një që përpiqet të përmirësohet, nga një Shqipëri e mosbesimit të përgjithshëm te ajo që besohet dhe nderohet,” tha Edi Rama dhe vazhdoj retorikën e tij si ish-fjalimshkrues i Kryeministrave të cilëve u shërbeu me shumë dinakëri:
“Shqipëria ndryshon ndonjëherë ngadalë dhe ndonjëherë më shpejt se çfarë e kemi pritur ne por në mënyrë të pandalshme. Shqipëria në BE është një zgjedhje rrugëtimi, që shumë prej jush e kanë zgjedhur për të rrënjosur vlerat që njohim këtu, në Shqipëri. Ju e dini se çfarë do të thotë të jetosh në një sistem që funksionon, ku sundimi i ligjit nuk është fjalë por mënyrë të jetuari. Kjo rrugë nuk është pa sfida, çfarë hoqët ju në kurriz është mësim i paharrueshëm që vlen për atë që Shqipëria ka hequr dhe do heq në kurriz deri në fund kur Shqipëria të ulet në familjen evropiane,” tha Kryeministri shqiptar duke i përgatitur shqiptarët se edhe do të zhgënjehen.
“Do t’i heqim të tëra në kurriz, do ketë edhe zhgënjime, do ketë momente kur do duket sikur asgjë s’ia vlen dhe progresi do duket i ngadalësuar, por asnjë rrugë suksesi nuk ndërtohet përmes rehatisë dhe as kombet nuk ndërtohen nëpërmjet rehatisë. E bukura sot është ajo që Shqipëria nuk është ëndërr e largët, por rrugë e hapur, e dukshme dhe e prekshme mundësish për të gjithë.”
Me këtë rast foli për Paketën e Maleve, si moment që Rama e gjykoi se mund të ftoi të gjithë shqiptarët që jetojnë dhe punojnë jashtë vendit që të investojnë në trashëgimitë e të parëve të tyre, edhe pasi u shembi investimet në majat e këtyre maleve.
“Sot zgjodha të sjell një gjest, akt, vendim të qeverisë shqiptare, që ka në brendësinë e saj një simbolikë, Paketën e Maleve për të gjithë ata që kanë lënë tokën e tyre në mal për të kërkuar një mundësi më të mirë jashtë vendit. Malet kanë qenë gjithnjë për shqiptarë për t’u mbrojtur dhe për t’u fshehur nga ata që donin t’i merrnin rob për t’i asimiluar, por sot ka ardhur dita që malet janë si burime të mirëqenies. Sot kemi gjëra që s’i kishim më parë, Shqipërinë e parë nga Bota dhe shqiptarët për Shqipërinë.
Kemi shqiptarët e botës që tani e shohin se Shqipëria nuk është më e bukur edhe tërheqëse vetëm për ta, por edhe për ata rrotull qyteteve ku ata jetojnë. Ndaj i them shqiptarëve që kanë një copë tokë në mal apo kodër, që kanë shtëpi të braktisur të gjyshit a stërgjyshit, që ta marrin në dorë paketën e maleve dhe ta kthejnë atë tokë e shtëpi në burim fitimi. Shqipëria e 12 milionë turistëve është në gjendje të bëjë për ta, që nga ai burim mirëqenie ata të fitojnë më shumë çdo muaj sesa fitojnë për ata ku punojnë jashtë vendit,” tha Edi Rama ndërsa foli edhe për lidhjen e ngushtë me shqiptarët që jetojnë, sipas tij, në vendet fqinje, Kosovë, Maqedoni e Veriut dhe Mali i Zi.
“Sot nuk kanë vetëm çfarë të bëjnë për Shqipërinë, por edhe se çfarë të fitojnë me Shqipërinë. Po ushqejmë sot marrëdhënien tonë për të ushqyer sa më mirë Shqipërinë, nga ndjenjat në strategji. E ardhmja e Shqipërisë nuk shkruhet vetëm në Tiranë, por edhe në Romë, Athinë, Londër, Berlin, Zyrih dhe kudo. Por edhe kudo ku shqiptarët jetojnë, rreth e rrotull Shqipërisë, duke filluar nga shteti tjetër i pavarur shqiptar, Kosova, e pastaj duke vazhduar me shqiptarët e Maqedonisë së Veriut që s’duhet ta harrojë askush se janë një popull shtetformues i Maqedonisë fqinje dhe mike të Shqipërisë dhe shqiptarët e Malit të Zi. Falenderoj këtu miqtë e mi, Glauk Konjufcën, Afrin Gashin, Ali Ahmeti dhe Dritan Abazin që janë prezent këtu.”
Në fund, përveç amanetit të të parëve, Kryeministri Edi Rama hodhi edhe pak doza patriotizmi në Samitin e Disaporës duke përfunduar:
“Të rilidhemi jo vetëm emocionalisht, por edhe në mënyrë aktive. Jo vetëm i vend që diaspora e la pas, por edhe vend që po bëhet shtet evropian, si për shqiptarët brenda ashtu edhe ata jashtë. Një ftesë për të qenë pjesë e këtij projekti kombëtar që është më i madh se çdo cikël politik, se është një amanet i madh se amaneti i Gjergj Kastrioti Skënderbeut, që e kërkon Shqipërinë pjesë e tryezës së familjes së madhe Evropiane, pjesë e BE-së, ku ne po bëhemi gati të jemi pjesë e pandarë.
Një popull dhe një komb nuk është Shqipëria, por bartësi i amanetit për ta çuar atë para dhe për të mos harruar kurrë borxhin e atyre në të shkuarën që dhanë për ne që sot të jemi e të ndjemi krenarë. Rroftë Shqipëria, rroftë Kosova, rrofshin shqiptarët kudo që janë”, përfundoi kryeministri.”
