Lex AP, emergjencë për SPAK-un!
nga Agim Popoci
Pas gjashtë viteve pune të SPAK-ut me shumë bujë, të pistë, gri, dhe në shumë raste edhe të zezë, dëgjuam nga kreu i saj Altin Dumani se nga data e krijimit të SPAK deri sot ka sekuestruar një total asetesh prej 150 milionë euro ndërsa fliste në takim me Komisionin e Monitorimit të Këshillit të Evropës për sukseset e kësaj strukture në luftën kundër krimit të organizuar, lidhjet e evidentuara me zyrtarë të niveleve të ndryshme që janë korruptuar apo janë bërë pjesë e grupeve të krimit të organizuar, nevojën për bashkëpunimin e institucioneve të tjera në luftën kundër korrupsionit, dhe konstatimin se korrupsioni nuk mund të luftohet i vetëm nga SPAK.
Sikur të ndalonte këtu ky drejtues i 20 prokurorëve, 60 hetuesve të Byrosë Kombëtare të Hetimit, 12 hetuesve financiarë, laboratoreve moderne të ekspertizës kriminalistike dhe përgjimit ndoshta do të ishte më mirë, por magjinë e heshtjes mbretërore rugoviane, nga Samir Mane e deri te Bajram Begaj nuk e kupton njeri ndër shqiptarë, e pse duhet ta kuptoj kreu i SPAK-ut, Altin Dumani!
Ndryshe, po ta kuptonte, në momentin që do të shkelte në një takim të këtij lloji do të ishte shumë më i përgatitur për atë që do të nxjerr nga goja, jo për ndërkombëtarët që ishin prezent, por, për faktin se të gjitha kamerat do ti drejtohen atij dhe vetëm atij në situatën politike dhe të sigurisë në të cilën ndodhet vendi; Dhe, nuk do të dëgjonim se mund të quhet shqetësim për SPAK-un mandati 9 vjeçar i prokurorit sepse pas 9 viteve ai kthehet në vendin ku ka qenë më parë, pa mundësi rikandidimi!
Për ata që e kanë merakun te ndërkombëtarët, se ç’u panë sytë, duhet të pashqetësuar ta hanë bukën e vetë pa e bërë davanë e të huajve sepse ata janë mësuar me këtë lloj race; Edhe në vitin 2001 ishte gjithashtu ICITAPI që ndihmonte, dhe, kur të gjitha shtetet e Ballkanit kërkonin ndihmë për procesin e liberalizimit të vizave që filloi përgatitjet, për internet satelitor ose radar termik për vendkalimet kufitare, shqiptarët kërkonin tavolina dhe karrige!
E çfarë do të kërkoj Dumani i shkretë, mendojnë shqipet e malit, për njeriun që drejton një strukturë që pothuajse çdo aksion i dekonspirohet ende pa filluar, çdo dosje i del në media ende pa shkuar në gjykatë, çdo veprim hetimor më parë shkon te grupet kriminale në hetim se në postë për ta çuar në GJKKO, çdo dëshmi mbërrinë në gjykatë kur është shndërruar në dëshmi të gjyqit popullor, e me këshilltarë injorant që ka do ta konsiderojë siklet të madh edhe prokurorin me mbi 2000 ditë në SPAK pa asnjë arrestim ministri ose drejtori në detyrë të qeverisë më të korruptuar në Evropë, që nuk mund të rikandidohet pas 9 vjetëve të kaluara në Prokurorinë e Posaçme!
Një strukturë që edhe kur nuk përndjek zyrtarët e lartë që janë në detyrë, i jep në dorë një prokurori që nuk i mjafton mandati 9 vjeçar por e bënë qerpaze për plotë 11 muaj Ish-Kryeministrin me mandat 8 vjeçar, ose e prangos si qenin Ish-Presidentin me mandat 5 vjeçar, si dhe denigron duke i nxjerrë në shesh vibratorin e gruas Zv/Kryeministrit që nuk e kishte konsumuar as mandatin 4 vjeçar; Hall i madh na qenka pamundësia e rikandidimit në luftën kundër krimit dhe korrupsionit ndonëse asnjëri nga zyrtarët që ka hetuar, nuk gëzon mandat 9 vjeçar!
Por, SPAK nuk duhet të krenohet pse miletit me mendët e një piktori i shet mandatin dhe rikandidimin e prokurorit si problem, ose nevojën për bashkëpunim me institucionet tjera që të luftohet korrupsioni, sepse edhe kur janë konstatuar ose denoncuar vepra të tilla, nga korrupsioni deri te arrestimi, SPAK-un me një ministër ose drejtor madje edhe bashkie të Lali Erit, i ka nda një det i tërë, nga publikimi i dosjes, arratisja e ministrit e deri te zv/kryeministri dhe nisja e kërkimit të atij personi me një fletëarrest formal pasi ai ka siguruar edhe azilin politik!
E meqenëse SPAK-u është bazuar shumë te përvoja kroate e Prokurorisë së Posaçme, dhe është e qartë se diçka nuk po shkon në mjedisin shqiptar që mungojnë sukseset, pse kreu i kësaj strukture nuk ndërmerr masa për ruajtjen nga rrjedhja e informacionit për urdhër arreste, veprim hetimor ose dëshmi, siç bëri Kroacia me Lex AP, për t’ju hequr njëherë e mirë shqiptarëve nga mendja dhe politikës nga dora, manipulimin me gjyqet!
Kur Lex AP u votua në mars të këtij viti në Parlamentin e Kroacisë ngjalli shumë debate mbi këtë ndryshim në Kodin Penal që sanksionon zbulimin e paautorizuar të përmbajtjes së një veprimi hetimor apo dëshmive, pra, rrjedhje të informacionit nga hetimet gjyqësore nëse është kryer për hir të interesit publik!
Opozita e kundërshtoi duke akuzuar pushtetin se do të frikësoj mediat, por partia në pushtet sqaroi se ligji është parashikuar vetëm për zyrtarë gjyqësor, nëpunës civil në organin gjyqësor, punonjës policie ose zyrtar, të pandehurit, avokatët, dëshmitarët, ekspertët ose përkthyesit, dhe konkretisht thuhet se gazetarët nuk mund të jenë autorë, ndihmës apo nxitës të kësaj vepre penale.
Dhe, rasti i fundit i arrestimit të ministrit të Shëndetësisë së Kroacisë bëri që të aplikohet si Ligj pasi edhe atje dokumentet dolën sheshit!
Ky, po që është shqetësim madje që nga koha ku shkeli komunizmi në Shqipëri, zyrtarisht 29 Nëntor 1944, edhe pa SPAK e GJKKO, dhe pa Krajë e Duman!
Dhe, vetëm me një Lex AP, edhe ne kemi mundësi të mënjanojmë nga truri shqipeve të malit, dëshmitë dhe manipulimet mediatike të qëllimshme apo jo, në mënyrë që policia kur të niset në aksion të arrestoj atë që synon pavarësisht se i cilës bandë është dhe cilin gazetar paguan, ta dënon Ish-Kryeministrin, Ish-Presidentin, Ish-Ministrat dhe ata në detyrë për shpërdorim detyre, duke vlerësuar gjykata dhe jo mileti, vjedhjen e parave publike edhe kur ato kanë shkuar për qëllime shëndetësore të fëmijëve dhe prindërve!
Nëse këto i konsideron broçkulla perëndimore Altin Dumani ashtu siç vepronte hetuesi komunist Arben Kraja, dhe, shqiptarëve u duhet bërë truri dhallë, dhe nga dëshmitë e truprojave të Mehmetit dhe Enverit u duhet trazuar jetën me përrallat e Taos dhe SPAK-ut, atëherë: Punë të mbarë Altin Dumani!
Uroj të mos preket Kushtetuta për t’i vazhduar mandatin prokurorëve të këtij institucioni ekstremisht bolshevik jo vetëm pse u themelua nga Partia Socialiste, siç thotë Kryeministri Edi Rama, dhe, deri në miratimin e një Lex AP në Shqipëri, është mirë që SPAK të heq dorë nga fjala e urtë ruse që po zbaton në vepër që nga themelimi:
Ligjet kapin mizat, por lirojnë grerëzat!
