Libri i Kuq, Berisha: Akuza më e rëndë ndaj Edi Ramës, brigjet po shpopullohen, tokat po ua marrin kriminelët!

Libri i Kuq është akuza më e rëndë ndaj Edi Ramës, brigjet po shpopullohen pasi tokat po ua marrin kriminelët, tha sot Kryetari i Partisë Demokratike, Sali Berisha, ndërsa përshëndeti dërgimin e Librit të Kuq në SPAK nga protestuesit paralajmëroi se edhe PD do bëjë gati aktpadinë.

“Libri i kuq, ‘Albanian Files’, me parathënie të Edi Ramës, është libri me të cilin Edi Rama fakton shqiptarëve dhe botës se konsideron Shqipërinë një çiflig të tij, e para.
E dyta, se këtë çiflig ia ka dhënë për zhvillim karteleve të drogës, baronëve të drogës, organizatëve kriminale shqiptare dhe ndërkombëtare.
Libri i kuq ‘Dosja shqiptare’ është akuza më e rëndë ndaj një kryeministri apo presidenti republike, ndaj një diktatori të çdo lloj diktature qoftë ai, që dëshmon se ky njeri nuk njeh Kushtetutë, nuk njeh ligjet kombëtare dhe as ndërkombëtare.
Se për këtë njeri, njëlloj si për sulltanët e shekujve më parë, që kishin ligj themelor të perandorisë së tyre toka, ajri dhe uji janë pronë e perandorit, ato u jepen me leasing qytetarëve për mirëqenie.
Edhe për Edi Ramën, zonat më panoramike të brigjeve të detërave dhe liqeneve të Shqipërisë, të kodrave dhe maleve të vendit, janë pronë e tij, që u jepen për zhvillim trafikantëve kriminelë të urryer.
Dëshmitë janë flagrante.
Ju i keni parë se si në jug, banorët në brigjet e vendit po shpërngulen pothuaj manum militari, po emigrojnë dhe po largohen nga kriminelë trafikantë të egër, që u shkojnë me strajca, me thasë me para, ua blejnë tokat dhe i nisin nga trojet e tyre.
Një qëndrim të tillë ndaj shqiptarëve nuk ka mbajtur asnjë pushtues në histori.
Tentakulat e mafies së rrezikshme që po rrafshon kodra dhe po zhbin çdo gjë në jug, de facto po shpopullon me forcën e narkoeurove brigjet e Shqipërisë,” tha Sali Berisha duke theksuar se gjatë qeverisjes demokratike, britanikët bënë gati projektin që nuk do lejonte batërdinë në brigjet e detit.

“Dua t’u rikujtoj këtu ju, përfaqësuesve të medieve dhe gjithë shqiptarëve, cili ka qenë projekti i qeverisë së mëparshme për bregun.
Qeveria e mëparshme tregoi një kujdes shumë të veçantë për bregun dhe zhvillimin e turizmit.
Për këtë qëllim, përveç ndërtimit të infrastrukturës në të gjithë bregun, ajo mori një kompani britanike të famshme, të shquar, e cila studioi bregun në të gjithë gjatësinë e tij.
Dhe kjo kompani, që ta dini ju, përcaktoi me studimin e saj zonat ku nuk mund të ndërtohej.
Nuk përcaktoi zonat ku duhej të ndërtohej.
Kjo kompani, pasi përcaktoi zonat ku nuk duhej të ndërtohej, së bashku me qeverinë shqiptare, zhvillimin e bregut ia besoi autoriteteve lokale të bregut.
Mbi këtë bazë, kryetari i Bashkisë së Himarës, Vasil Bollano, i cili ishte një gardian i pakorruptuar i interesave të banorëve të bregut, mori një kompani greke për të bërë tashmë planet e zhvillimit të komuniteteve nga komunitetet.
Unë u them ju se ajo kompani bëri një punë të shkëlqyer.
Dhe në qoftë se ajo kompani, them edhe njëherë, do zbatohej projekti i saj, shqiptarët do kishin sot një breg krejt tjetër.
Nuk do ishte asnjë nga batërditë dhe krimet e tmerrshme mjedisore të kryera në bregun e detit në Shqipëri.
Çfarë ndodhi?
Edi Rama, me të ardhur në pushtet, e përmbysi si studimin britanik, dhe unë njerëzisht u kërkoj ju të bëni kontroll në arkiva dhe ta gjeni se u kujtohet ju kur falanga të krimit të PS dhe Erion Veliajt arritën me shpifjet e tyre, trillimet e tyre, arritën të publikojnë, të fabrikojnë një raport gjoja të pavarur të një eksperti të pavarur të bankës, në të cilat përpiqeshin të implikonin për korrupsion qeverinë shqiptare.
Në një kohë kur qeveria kishte zbatuar me rigorozitet absolut memorandumin e firmosur me Bankën Botërore.
Por, hapi arkivat, pas një përballje të fortë mes qeverisë dhe Bankës, BB dërgoi këtu zëvendëspresidentin e saj Filip Beiru, i cili kërkoi falje publike qeverisë shqiptare për akuzat të pabaza të lëshuara në atë raport, të fabrikuara të gjitha në kuzhinën e George Sorosit dhe Edi Ramës në Tiranë. Por kjo është midis të tjerash,” tha lideri i opozitës duke saktësuar se Edi Rama përmbysi planin britanik dhe kaloi në planin e masakrimit të bregut nga çdo trafikant shqiptar.

“Çfarë bëri Edi Rama me këto plane? Edi Rama në vitin 2014 i përmbysi këto dhe kaloi në planin e integruar të zhvillimti të bregut, në planin e masakrimit të bregut. Njeriu që kur erdhi në pushtet tha se na ka dalë njëfarë Gjon Gjoni, duke aluduar se ishte ndonjë mirditor apo laçjan, dhe na është bërë me 60 mijë hektarë tokë, duke dëshmuar injorancën e tij të plotë, totale se emri Gjon është sa i përdorur në Mirditë, edhe në Labëri, edhe në Çamëri në pjesën ortodokse.
Dhe ato në fakt ishin prona të heroit legjendar të revolucionit grek, pasardhësve të Marko Boçarit. Që ky thoshte na doli Gjoni që nuk ka parë kurrë det me sy. Në fakt tani vërsuli drejt bregut çdo trafikant shqiptar, trafikantë të gjitha krahinave bashkohuni për të shqyer bregun e detit. Kjo ndodhi, ua them unë.
Dhe libri i kuq është dëshmia më autentike e dorëzimit, të themi të Shqipërisë panoramike, ta quajmë kështu në mënyrë arbitrare, në duart e trafikantëve dhe mafies shqiptare. Kjo është e vërteta.
Ky libër shtron probleme shumë, shumë madhore, kriminale.
Së pari, kush është personi që ka porositur dhe paguar projektin? Cilat janë dokumentet e pronësisë në atë zonë?
Sa janë paguar studiot për projektet dhe si janë paguar, me bankë apo me strajca?
I bëj thirrje Interpolit, Europolit dhe Eurojust për të kuptuar shtrirjen e tmerrshme të tentakulave të narkoshtetit shqiptar.
Për 523 projekte janë paguar minimumi nga 1.5 në 2 miliardë euro,” tha Kryetari i Partisë Demokratike ndërsa përshëndeti dërgimin e Librit të Kuq në SPAK nga protestuesit dhe paralajmëroi padi edhe nga PD.

“Por, përveç këtyre, libri i kuq i Edi Ramës, Dosja sekrete Shqiptare, ka edhe pronat e grabitura nga Edi Rama apo vëllai i tij dhe nëna e tij e ndjerë.
Në Librin e Kuq kanioni i Gjipesë me mbrojtje të shkallës më të lartë, njëri nga 20 kanionet më të çmuara në planet, i kanë vu samarin sipër, hotelin e Edi Ramës që kalon nga njëri breg në bregun tjetër.
Dhe që ka pasur paturpësinë të më padisë kur unë e paraqita këtu para jush 1 vit e gjysmë më parë, dhe që tregonte se arkitekti holandez Maas ishte aty.
Mbase dikush e kishte kompozuar fotografinë, por unë paraqita atë foto. Aty nuk është risia se është Maas në plazhin e Gjipesë, por se është hoteli që kalon si samar nga një breg në bregun tjetër të kanionit.
Tani që ai ka çuar në gjyq, tani del libri i kuq që fakton atë që unë kam paraqitur para publikut.
Pra, të dashur miq, ky libër përbën dosjen më kriminale në historinë e Shqipërisë të 35 viteve të fundit.
Përshëndes dërgimin e tij në SPAK nga përfaqësues të protestës. I garantoj se PD po e studion dhe do paraqesë aktpadinë tjetër po për këtë libër në SPAK. Dhe kjo edhe njëherë për ne konsiderohet dosja më kriminale,” tha Kryetari i Partisë Demokratike, Sali Berisha, duke publikuar në fund pamje se si Sulltani i kuq po vendos ngjyra haremi brenda ndërtesës së kryeministrisë.

“Dua t’u informoj se qindra mijëra euro po shpenzohen nëpër korridoret, ju lutem shihni pak këtu ç’po ndodh brenda ndërtesës së kryeministrisë. Sulltani i kuq po vendos ngjyra haremi në kryeministri. Po, këto janë tipike ngjyrat e haremeve.
Dënoj me forcën më të madhe vendosjen e këtyre ngjyrave në hollet e kryeministrisë. Urdhëroni sa kushtojnë dhe sa nuk kushtojnë. Këto ngjyra janë ose të haremeve ose të kinemave të seksit në Pigal. Atje i kam parë unë këto.”