Lufta dhe Paqja e Macronit!
nga Agim Popoci
Ndoshta Presidenti i Francës, Emmanuel Macron, nuk e ka lexuar veprën e Leo Tolstoyit sa për të shuar kuriozitetin e pushtimit francez të Rusisë edhe letrarisht, derisa dërdëllit kot kundër Presidentit rus Vladimir Purin; Ndoshta Macron ka menduar t’i zë vendin Putinit në Serbi, përderisa nuk arriti me miqtë e tij euroatlantik ta kthen shtetin serb nga Perëndimi; Ndoshta edhe gjithçka u dërdëllit sa për t’i shitur Serbisë 12 avionë ushtarakë francez Rafale!
Por, gjithçka po bënë Emmanuel Macron me partnerët e tij euroatlantik në Kosovë, nuk ka lidhje as me luftën, as me paqen, as dhe më një draft që mund të botohet në një revistë ruse si “Russkiy Vestnik”, sepse Tolstoy ndryshe nga Macron ka një epilog të ndarë në dy pjesë ku tregon pasojat e pushtimit francez të Rusisë gjatë epokës së Napoleonit, ku me familje të ndryshme aristokrate ruse ilustron ndikimin e Napoleonit në shoqërinë cariste; Ndërsa Macron me veprimet e tij si në Paris, Bruksel, Beograd dhe Prishtinë, pa dashje dëshmon me asgjë fiktive, ndikimin e pushtimit të Putinit jo vetëm në Ukrainë, por, dhe në politikën evropiane që ngadalë po injektohet edhe në gjithë shoqërinë evropiane!
Kur filloi pushtimin e Ukrainës, jo në pak raste presidenti francez i dha leksione demokracie presidentit rus, por, kur u përballë me testin e demokracisë në shtetin që ai drejton, ai ra nga provimi pas zgjedhjeve parlamentare vetëm pse partia e tij humbi!
Emmanuel Macron tha se nuk pajtohet me një qeveri të drejtuar nga të majtët e aleancës së Frontit të Ri Popullor, parti e cila fitoi shumicën në zgjedhje, dhe, kërkoi stabilitet institucional duke pretenduar kot se e majta nuk mund të fitojë votëbesimin në Parlament. Më pas u zbulua dhe arsyeja magjike që as koka e Tolstoyit nuk do ta bluante: Fronti i Ri Popullor propozoi për kryeministre, nëpunësen civile “të panjohur”, Lucie Castets!
Po, është po ky Emmanuel Macron që tërhoqi zvarrë gjithë Bashkimin Evropian që të dënoi Kryeministrin e Kosovës, Albin Kurti, ndonëse ai ka shumicën me mbi 51% në parlament, dhe nuk është i panjohur në Kosovë dhe jo vetëm!
Dhe, arsyeja e këtij dënimi ishte epike: Albin Kurti kishte çuar forcat speciale në veri sepse kishte informacione mbi veprimin e forcave serbe në territorin e Kosovës, dhe nuk iu bind BE-së me gjithë Macronin që t’i largoi ato menjëherë!
Kur u konfirmua se Albin Kurti kishte të drejtë, kur forcat terroriste serbe me mbështetjen e forcave të shtetit serb nuk denjuan të vrasin dhe policë kosovarë, të gjithë heshtën, por, heqjen e masave për shtetin e Kosovës nuk e kërkoi njeri!
Nuk e kërkoi edhe pse u konfirmua dhe deklarata e Kryetares së Komisionit të Punëve të Jashtme pranë Parlamentit të Mbretërisë së Bashkuar, Alicia Kearns, dhënë para sulmit, se armët që po trafikohen nga Serbia në Kosovë përmes autoambulancave, po shkarkohen në kishat ortodokse. Banjska ndodhi, gjithçka përfundoi në një manastir, dhe Macron me shokë nuk e panë të arsyeshme të kërkojnë as falje!
Tolstoy u trondit kur zbuloi se kishte pak shënime të shkruara të jetës së brendshme ruse nga koha për të cilën shkruante dhe u përpoq t’i korrigjonte këto lëshime në draftet tjera të romanit, por, kjo nuk po ndodh me Macronin!
Pa i dhënë përgjigje vetes se pse Perëndimi po investon aq shumë në Serbi, Presidenti i së cilës, Aleksandar Vuçiç, thotë se populli serb e dashuron Rusinë dhe nuk i vendos sanksione siç kërkon BE, ndërkohë të gjithë të rinjtë serbë preferojnë metropolet dhe universitetet perëndimore për të studiuar dhe punuar, Macron vazhdon ta mbështesë dhe investon në Serbi, dhe, e shkelë me të dyja këmbët Kosovën që pa kushte është e përkushtuar për Perëndimin si dhe vendosjen e sanksioneve ndaj shtetit rus!
Dhe, jo vetëm kaq! Macron vazhdon dhe heshtë edhe kur një kriminel si Milorad Dodik kërcënon se do të shkel Marrëveshjen e Daytonit nëse është nevoja edhe me luftë, marrëveshje ku dhe Franca është garant i zbatimit; Por, reagon ashpër dhe e quan cenim të sigurisë së serbëve e madje edhe rajonale, kur Kryeministri i Kosovës, Albin Kurti, paralajmëron hapjen e Urës mbi lumin Ibër në Mitrovicë edhe për makina!
Duke injoruar ecurinë e hapjes së Urës në Mostar vetëm pas 9 viteve të përfundimit të luftës më të përgjakshme pas Luftës së II-të Botërore, ku boshnjakët dhe kroatët po përballeshin si në Mitrovicë me rojet serbe të urës, Emmanuel Macron e quan të nxituar hapjen e Urës mbi lumin Ibër pas 25 viteve të përfundimit të luftës në Kosovë, vetëm pse Aleksandar Vuçiç kështu e kërkon, pa dhënë sqarime pse nuk cenohen serbët me lëvizjen e qytetarëve, por, vetëm të makinave!
Serbia e Vuçiçit mburret dhe Franca e Macronit e madhëronë nobelistin serb, Ivo Andriç, dhe kjo nuk i hynë në punë askujt kur që të tre e duan Kosovën por pa shqiptarë, aq më pak me Kryeministër Albin Kurtin, por, ja çfarë shkruan Andriç në veprën e tij që i siguroi Çmimin Nobel, “Na Drini ćuprija”/lexo shqip: Në Drina urë/.
“Gjithçka në botë është urë, dhe një buzëqeshje, dhe një psherëtimë dhe një shikim. Çdo gjë në botë dëshiron të kapërcehet, të gjejë një breg tjetër, kjo është aspirata që njerëzit të dëgjojnë dhe shohin, ndjejnë dhe njohin, thërrasin dhe thirren nga bregu në breg!”
Por, Macron nuk do t’ia dijë se për çfarë shërben Ura, ky predikues i paqes nën pushtimin e politikës së Putinit ndërsa i flet Albin Kurtit, dhe shfaqet në gjirin e Aleksandar Vuçiçit duke firmos një marrëveshje luftarake, shitjen e 12 avionëve Rafale, shtetit të Serbisë!
Pra, në kohën kur Presidenti i Serbisë, Slobodan Milosheviç, bombardonte Kosovën dhe masakronte popullin e saj, nuk kishte avionë të sofistikuar si Rafale! Fjalën e fundit në ajr, Milosheviç e kishte me ca avion rus MIG që në ajr shfaqeshin vetëm në kohën e drekës së pilotëve të NATO-s, dhe asnjë minut më shumë! E Macron, po kësaj Serbie së cilës i cenohet siguria nga hapja e Urës mbi lumin Ibër në Mitrovicë nga Albin Kurti, ndonëse është e armatosur me gjithë arsenalin e armatimit rus që po pushton Ukrainën deri tek sistemi antiraketor S-400 dhe ai antidron Repelent, i del në krah duke e furnizuar me avionin luftarak “Rafale”!
Kjo mund të jetë Lufta dhe Paqja e Macronit, pjesë e saj dhe pretendimi si i Presidentit të Serbisë ashtu dhe Francës, me Kosovën pa Albin Kurtin, por, këta analfabet politik sikur ta kishin lexuar Leo Tolstoyin do ta kishin të qartë se edhe kur u pushtua Moska, personazhi i tij Pierre vendosi ta vras Napoleonin, por kur iu ofrua ashtu i veshur me rroba robi e njohu Natasha, dhe befas e kuptoi se sa shumë e do; Dhe plani i tij dështoi!
Askush nuk po pretendon se me këtë dështim, siç përfundoi Pierre rob lufte i Napoleonit, dikush në këtë luftë dhe paqe të stisur të epokës së Macronit, do të përfundoj rob lufte i Albin Kurtit, të cilin, nëse askush tjetër, do ta shpëtoi respekti që ka populli shqiptar në Kosovë!
Ndërsa Presidenti i Francës, Emmanuel Macron, i cili po tërheqë gjithë Perëndimin zvarrë vetëm për Serbinë kriminale, për ta kuptuar se kush dhe çfarë është ky popull, le ti besoj përkufizimit që i ka bërë pikërisht shkrimtari serb, Ivo Andriç, në veprën e tij që konsiderohet madhore nga francezët, se si duhet të mbijetoi Serbia:
“Në këtë tokë nuk mund të ketë mirësi pa urrejtje, madhështi pa zili, ashtu siç nuk ka asnjë objekt më të vogël pa hije.”
