MARRËVESHJA/ Digjitalizimi i inventarëve të Arkivit Qendror Shtetëror

Drejtoria e Përgjithshme e Arkivave nënshkroi sot një marrëveshje bashkëpunimi me Universitetin jo publik “Marin Barleti” për digjitalizimin e inventarëve të Arkivit Qendror Shtetëror në kuadër të praktikave mësimore të studentëve.

“Praktika që ne kërkojmë nga studentët e Universitetit ‘Marlin Barleti’ do të jetë pikërisht kjo, të hidhen inventarët e Arkivave Vendorë në sisitemin tonë elektronik në mjediset e Universitetit nën mbikqyrjen e specialistëve të Drejtorisë të Përgjithshme të Arkivave,” tha Drejtori i Përgjithshëm i Arkivave, Ardit Bido duke shtuar se prej muajit shtator do të  ketë ndryshime me disa aplikacione të reja dhe do të arrihet të garantohet aksesi sa më i lirë dhe siguria.

“Nëpërmjet këtij aplikacioni studiuesi qoftë nga shpia qoftë në Arkiv do të paracaktojnë vizitën në sallën e studimit që është aktualisht, por do të pasurohet duke pajisur studiuesit me një kartë elektronike me kodin e tyre personal,” tha Bido.

Ndërsa Rektori i Universitetit “Marlin Barleti”, Marenglen Spiro falenderoi Arkivin e Shtetit për këtë bahkëpunim duke shtuar”

“Arkivi Shtetit është një institucion qendror shumë i rëndësishëm me një pasuri mjaft të vlefshme për formimin universitar mbi kërkimin shkencor. Ky bashkëpunim do të jetë me shumë interes për studentët gjatë përgatitjes së tyre si specialist në shumë fusha” tha  Spiro.

Sipas marrëveshjes bashkëpunimi do të shtrihet edhe në botime dhe mbajtjen e konferencave shkencore.

Ndryshe, Arkivi i Shtetit nga viti 2017 ka kaluar në fazën e digjitalizimit në nivele të ngjashme me Arkivat e Europës. Prej vitit të kaluar janë hedhur online inventarët prej 2.000.000 tituj dosjesh me një bashkëpunime si ky i sotmi.