Mbahu Putin!
nga Agim Popoci
Në vend të një hapje ceremoniale të tetë kapitujve të parë të negociatave për anëtarësim në Bashkimin Evropian nga Kryeministri i Shqipërisë, shqiptarët dëgjuan nga Edi Rama broçkulla të ngjashme me ato që u thotë malokëve të Vunoit për malokun Sali, duke mos e gjetur padrejtësinë e BE në vonesat e integrimit evropian të Shqipërisë së drejtuar nga Rama, dhe, as lidhjen me hapjen e vonuar të grupkapitujve themelorë!
Madje, shqiptarët e njohin Evropën e fjetur që nga viti 1912, por, nuk e bënë dot lidhjen si kryeministri i tyre, se si dhe kur u zgjua BE nga Vladimir Putin, dhe, në këtë moment të veçantë pse duhet falënderuar ky kriminel i cili i paska mundësuar evropianëve skeptik të shohin realitetin në Ballkanin Perëndimor!
Shqiptarët ishin dëshmitarë se si u liberalizuan vizat nga BE në kohën e Qeverisë Berisha, dhe, janë të qartë se asgjë nuk ka lidhje me Putinin dhe luftërat e tij! Ashtu si dhe anëtarësimi në Aleancën më të fuqishme politiko-ushtarake në botë, NATO!
A duhet falënderuar dikush për këto dy arritjet më të mëdha pas pavarësisë?! Natyrisht se po, dhe, ajo është Amerika, merita që deri me sot ishin të gjithëpranuara duke filluar nga Kryeministri i kohës Sali Berisha!
Por, cili do të jetë fati i Shqipërisë me këtë grup të kapitujve dhe anëtarësimin në BE, kur komunisti Edi Rama ka marrë kot në mandatin e tij të tretë dhe po luan rolin e sovranistit, duke fajësuar BE-në dhe falënderuar Putinin!
Kur shohim Kapitujt Themelorë të këtyre negociatave dhe përvojën e Slovenisë, Kroacisë, Malit Zi dhe Serbisë, si dhe situatën aktuale politike shqiptare, nuk është e qartë se çfarë do të thonë negociatorët shqiptarë për kapitullin e parë “Funksionimi i institucioneve demokratike” që ishte i kalueshëm me shumë vështirësi edhe për Sloveninë!
Në kokën e Edit kur i flet Belinda, institucionet demokratike në Shqipëri edhe mund të funksionojnë, por, kur shohim liderin e opozitës të arrestuar në shtëpi, një deputet në burg politik, grupin parlamentar të opozitës me fletëhyrje të grisur nga Mamica, dhe Skënderbeun e saj që i ka kyç gojën Gjykatës Kushtetuese, Këshilli i Integrimit me një përfaqësuese të opozitës në krye, si, Jorida Tabaku, nuk e mbyll dot këtë kapitull, sikur luftën e Putinit t’a drejtoj vetë lartëmadhnia e investitores strategjike Olta Xhaçka.
Nëse, jo Edi Rama por një negociator shqiptar është duke e lodhur kokën se mund të kalohet kapitulli “Reforma në administratën publike”, ai duhet t’i dhuroi vetes më shumë relax sepse janë vetëm dy mënyra: “McGonigal”, ku usta Rama do të blejë gjithë ekipin negociatorë të Brukselit, ose ti shpëtoi një sulmi të Putinit, dhe nga bunkeri të shpall kalimin e këtij kapitulli; Ndryshe, me strukturën e kësaj administrate, ky kapitull nuk kalon dot as te Meti i Universitetit Kristal!
“Gjyqësori dhe të drejtat themelore”, sot një histori turpi me të cilën skuqen edhe ata që e hartuan Reformën në Drejtësi, nuk ka prift as hoxhë që mund ti ndihmoj Edi Ramës sikur negociatat ti bëjë me PS e jo BE-në! Pas Reformës e cila nisi me një Gjykatë Apeli që turpëronte çdo shqiptar në këtë rruzull tokësor, dhe, përfundoi me Reformën e cila prodhoi një Gjyqësor që turpëron çdo shqipfolës, Shqipëria mund të zhvilloj negociata për anëtarësim në BE, por jo me këtë Gjyqësor; Pavarësisht se Edi Rama mburret me faktin se Lali Eri zhvilloi dhjetëra seanca në javë me Armando Dukën, dhe mbyllë sytë për dhjetëra mijëra çështje që vazhdojnë e stazhonohen në po këto gjykata!
Pse i vajti mendja që kjo negociatë mund të kalohet me “Komisionin Xhafa” nuk është e qartë, ashtu siç nuk është e qartë se pse e shpërfilli faktin që asnjë prej shteteve fqinje nuk e krijoi një Komision të ngjashëm, ndonëse vështirë të gjendet në vitin 2024 një organizëm shtetëror që mund të krijohet dhe kryesohet nga një hetues i Sigurimit të Shtetit!
“Drejtësia, liria dhe siguria”, mund të ekziston si kapitull negociator edhe me shekuj, por në Shqipëri nuk ka as drejtësi, as liri e aq më pak siguri! Sa mund të vonohet negocimi i këtij Kapitulli nuk do ta dinte as Baba Vanga sikur të ishte gjallë, madje sikur Putini ta bënte rrafsh edhe gjithë Ukrainën dhe ti futej gjithë shteteve skandinave me ushtrinë e vdekur që ka, vetëm e vetëm për të zgjuar BE-në!
“Kriteret ekonomike” mund të jetë kapitulli i pranueshëm për të negociuar nëse BE do të pranonte në gjirin e saj një Shtet Bankë! Jo shtetin e Baba Mondit, por këtë shtet shqiptarë që, ai i cili i thotë bukës – bukë, dhe, ujit – ujë, vazhdon ta quaj Shqipëri, pavarësisht bëmave të Kryeministrit!
Nëse Edi Rama mendon se vetëm ai dhe Arben Ahmetaj shikojnë bilancet vjetore të këtij shteti dhe askush tjetër në këtë botë, atëherë nuk i ndihmon dot as Putini! Shteti në të cilin fitojnë vetëm bankat, dhe, që të gjitha këto banka janë të lidhura me pushtetin, vend nuk ka në BE sikur çdo i dytë zyrtarë evropian të jetë McGonigal!
“Prokurim publik” ishte dhe ngeli vetëm një legjendë rilindase mbi prokurimin online dhe të pakorruptueshëm, dhe sot kjo oazë e komunistëve të Edi Ramës është asfiksuar, ose, po pret të ringjallet nga Putini!
“Statistikat” nuk kanë arsye të negociohen sepse pas Censit 2023 u konfirmua se buka dhe gjella e statistikave është Zyra e Kryeministrit!
Në fund, “Kontrolli financiar” është çudia që do ta shoh jo vetëm BE por dhe të gjithë partnerët strategjik të Edi Ramës, kur në ekipin negociator të shfaqet Qet Kastrati me faturinot e tij! Për shqiptarët normalisht që është arsyeshme kur për kontrollin financiar në këtë shtet përgjigjet ai që e kontrollon tokën, ajrin dhe ujin shqiptarë!
Një Shqipëri e tillë, a mund të anëtarësohet në BE, ashtu siç u zotua Edi Rama në Luksemburg se do ta bëjë gati brenda vitit 2030, me gjithë këtë krim dhe korrupsion , Taulant Ballë, Fatmir Xhafë dhe Lali Erin nëpër këmbë!
Po, sikur mësues Lleshi i Gjergj Xhuvanit të ishte Kryeministër, dhe, deri në këtë vit të premtuar ai do ti jepte kurajo me parrulla liderit rus “Mbahu Putin” për ti thënë në fund jo këtij mileti por asaj që e frymëzon: “Putini paska fitue, oj gru!”
Pse patronazhisti i mësues Lleshit do ta lejojë parrullën “Putini do fitojë” edhe 10 vjet pasi Shqipëria e këtij lloj Kryeministri do të anëtarësohet në BE, nuk besoj se do ti prish punë këtij populli i cili tashmë u ambientua të jetoj në cirk!
