Mbyllet Konsullata e Përgjithshme e Kosovës në Strugë

Ambasada e Kosovës në Maqedoninë e Veriut ka bërë të ditur se është mbyllur Konsullata e Përgjithshme e Kosovës në Strugë.

Ambasada, përmes një njoftimi në rrjetin social Facebook informon vendimi është marrë në bazë të Dekretit Nr. 150/2025 të Presidentes së Republikës së Kosovës dhe në zbatim të Vendimit Nr. Ref. 261/2026 të Ministrisë së Punëve të Jashtme dhe Diasporës.

Këtë vendim, Ambasada e arsyeton me vlerësimin e dinamikës së misionit konsullor në Strugë dhe synon optimizimin e resurseve, në përputhje me qëllimet dhe nevojat institucionale.

Pas mbylljes së Konsullatës, shërbimet konsullore për shtetasit e Kosovës në Maqedoninë e Veriut do të ofrohen nga Ambasada e Kosovës në Shkup, e cila do të mbulojë të gjithë territorin e vendit.

Ndërsa, prania e Kosovës në Strugë do të vijojë përmes zyrës së Konsullit të Nderit të Republikës së Kosovës, i cili do të vazhdojë të jetë i ngarkuar me rrethin konsullor të këtij qyteti.

Ambasada në Shkup, përveç funksioneve diplomatike, do të vazhdojë të ofrojë shërbime konsullore për qytetarët e Kosovës në të gjithë territorin e Maqedonisë së Veriut.