Nafta bie drejt 111 $, shpresat për marrëveshje me Iranin lehtësojnë tregjet

Sot çmimet e naftës ranë, ndërsa rifillimi i përpjekjeve diplomatike për t’i dhënë fund konfliktit me Iranin zbuti shqetësimet për furnizimin global, pas rritjes së fortë të javës së kaluar.

Nafta Brent, referenca për tregjet ndërkombëtare, ra me 1.4 për qind, në 111.84 dollarë për fuçi, ndërsa nafta amerikane West Texas Intermediate, WTI, humbi 1.5 për qind, duke zbritur në 102.56 dollarë për fuçi, raporton Agjencia e lajmeve Reuters.

Rënia erdhi ndërsa përfaqësuesit e Iranit dhe Katarit vijuan për të tretën ditë radhazi bisedimet për një marrëveshje që mund t’i japë fund konfliktit me Shtetet e Bashkuara dhe Izraelin. Perspektiva e përparimit diplomatik uli shqetësimet e menjëhershme për ndërprerje të mëtejshme të furnizimit me naftë nga Lindja e Mesme.

Nafta Brent e mbylli tetorin në nivelin më të lartë të gjashtë muajve të fundit, mes shqetësimeve se konflikti mund të përshkallëzohej sërish pas zgjedhjeve të mesmandatit në SHBA, më 3 nëntor.

Tim Waterer, analist kryesor i tregjeve në KCM Trade, e cilësoi rënien si një korrigjim teknik pas rritjes së fortë të çmimeve gjatë javës së mëparshme. Sipas tij, pritshmëritë për përparim në bisedime dhe mungesa e një përshkallëzimi të rëndësishëm ushtarak gjatë fundjavës ndikuan në uljen e çmimeve.

Megjithatë, Waterer paralajmëroi se ashpërsimi i retorikës ndaj Iranit pas zgjedhjeve amerikane mund ta shtyjë çmimin e naftës Brent drejt 120 dollarëve për fuçi.

Ministri i Jashtëm iranian, Abbas Araqchi, deklaroi të dielën se konsultimet me ndërmjetësit e Katarit po vijojnë dhe se Teherani mbetet i përgatitur si për diplomaci, ashtu edhe për mbrojtje.

Tregu mbetet i ndjeshëm ndaj zhvillimeve në Ngushticën e Hormuzit, një nga rrugët kryesore të transportit të naftës në botë. Sulmet ndaj cisternave që kalojnë në këtë ngushticë kanë rritur kostot e transportit detar dhe të energjisë në tregjet ndërkombëtare.

Ndërkohë, vendimi i OPEC+ për të mbajtur të pandryshuara objektivat e prodhimit për dhjetorin ka lënë në qendër të vëmendjes rreziqet për furnizimin dhe ecurinë e negociatave diplomatike./Monitor/