Në Ditën e Europës, Ruçi flet për Tahirin/ Rasti i parë që një deputet le mandatin…

Dorëzimin e mandatit të deputetit nga ish-ministri i Brendshëm, Saimir Tahiri, e ka vlerësuar edhe kreu i Kuvendit, Gramoz Ruçi.

Ai theksuar se është rasti i parë në 27 vjet që një deputet merr një vendim të tillë. Por njëkohësisht është hera e parë që një ish-ministër i Brendshëm akuzohet për lidhjet me grupe kriminale nga Prokuroria, gjë që nuk përmendet nga drejtuesit e PS-së. Po kështu mandate është dorëzuar më parë edhe nga Arben Ndoka, deputeti i PS-së në Lezhë, pak përpara se të hynte në fuqi ligji për dekriminalizimin.

“Në 27 vjet që unë kam në parlament ka pasur shumë akuza për shumë deputetë majtas dhe djathtas, nga 1991 deri sot duke filluar nga mua. Asnjë nuk e ka lënë mandatin. Është rasti i parë që duhet të jetë i mirëpritur dhe i vlerësuar në rastin konkret.

Këtu do të përmendja Çurçill, i cili thoshte se politika nuk ka moral, por brenda imoralitetit ka një moral dhe në rastin konkret dorëheqja e Tahirit tregon që vazhdon të ngelet ky moral brenda imoralitetit në politikë. Rasti në fjalë është për tu përshëndetur, është i mirëpritur, të tjerat pastaj, sa i përket akuzës ajo ngelet ta vërtetojnë organet e hetimit për ish-deputetin Tahiri apo ish-deputeti Tahiri  për pafajësinë e tij para organeve të drejtësisë.”, tha Ruçi.

Saimir Tahiri pak ditë më parë hoqi dorë nga mandati i deputeti, duke theksuar se është i gatshëm të hetohet për çdo gjë nga Prokuroria.

Ish-ministri i Brendshëm është nën akuza nga Prokuroria e Krimeve të Rënda lidhur me trafikun e drogës për rastin e Habilajve.