Në emër të Edvinit, Zahos, dhe Shpirtit Lig
nga Agim Popoci
Edvini ynë, që je edhe në qiellin e Qetit, u shenjtëroftë emri yt,
ardhtë Mbretëria jote, u bëftë vullnesa jote:
si në qiell ashtu në tokë!
– Bukën tonë të përditshme na e jep sot!
Lutja është gati, komunitetet fetare janë gati dhe kanë filluar të shpërndajnë madje edhe mirënjohje, mileti gjithnjë e më shumë në gjendje gatishmërie, e meqë Gregori nuk i duhet më se mjaft e ka përdor në politikë, Kryeministri i Shkodrës, Himarës dhe gjithë Shqipërisë, Edi Rama, nuk gjeti arsye ta lë edhe kalanë e fundit të pamposhtur në këtë tokë të mallkuar, shumë më shumë se sa që e kishte imagjinuar diktatori Enver Hoxha!
T’iu vrasësh poetët shqiptarëve vetëm pse shkruajnë poezi është pak, kështu i rezultoi Edi Ramës që në ditën kur Babai i tij i pashqetësuar vendosi të mos i fal jetën poetit Havzi Nela!
T’iu vrasësh persekutorët 50 vjeçar shqiptarëve është shumë, dhe për një kohë shumë të shkurt u qartësua Edi Rama pasi që në ditën e parë kur ra busti i diktatorit, ai me edukatën familjare për varje, e mendoi varjen e të gjithë komunistëve në shtylla!
T’iu vrasësh 10 mijë protestues shqiptarëve më 21 Janar për të ardhur në pushtet vetëm pse këtë strategji e kishte menduar Avokati maniak, rezultoi pa sens, meqë me katër viktima ra shteti!
Kështu, meqë në realitetin e krijuar nuk i duhet më njeriu as Anton Harap dhe as Mitrush Kutel, Kryeministri i Shkodrës, Himarës dhe gjithë Shqipërisë, Edi Rama vendosi të mos vras më poet, të shkarravisin pak sa, e si pa gojë kundër pushtetit që janë, i bëri të gjithë, pa dallim, servila! Ndërkohë për ti treguar miletit se nuk është vetëm ai llum, poetëve të tij iu la varur një aplikim për pension të posaçëm, aty ku shqipet do shohin se cili është ma llum se tjetri!
Duke zbehur kujtimet me torturat e Mehmet Shehut, Nevzat Haznedarit, Mehdi Bushatit e të ngjashmëve, me shoqatat, institutet, lulzim bashën dhe bedelët e tij, integroi të përndjekurit politik aq sa mund të quhet integrim punësimi i ca kokave në strukturat shtetërore komuniste; Dhe, për të konfirmuar situatën e krijuar, nxori në ekranin e tyre të preferuar, kryehetuesin Qemal Lame!
Dhe, ashtu siç ishin pritshmëritë, të gjithë u mrekulluan duke filluar nga Sandri, Fevzo e gjithë mileti që i Madhi i pranon si intelektual, me faktin se Lame na paska shpëtuar shkrimtarin e madh Ismail Kadare, nga dy arrestimet që kishte urdhëruar diktatori Enver Hoxha!
Çuditërisht, u mrekullua edhe vetë Edvini duke e dëgjuar me Fugën e tij, ndërsa nëpër mendje si në një film horror po i lëvizte shiriti, kur pa se si ai donte të varte nëpër shtylla gjithë ata komunistë! Po sikur ta varte dhe Qemal Lamen që ndihmoi Kadarenë, sot kur u bë vetë Zot i Shqipërisë, kujt do ti kërkonte t’ia fal fajin, ose kujt do ti kërkonte llogari që e la të binte në tundim dhe nuk e liroi nga i Keqi!
Apo… dhe, u çlirua për pak çaste I Pari i vendit kur u këndell me faktin se nuk është hata me këtë milet që nuk njehë njeri, milet që arsimohet në Paris, bëhet Prefekt i qytetit të një mbi një dritareve, dhe nuk e dinë se kush ishte Ministri i Drejtësisë e Ministri i Jashtëm, në Qeverinë Delvina.
Nejse, kjo bëhet paksa e ngatërruar për një shqiptar pavarësisht formimit parisien, kur në mes hynë Drejtësia; Pastaj kur i thotë vetit proamerikan, se SPAK-u është i vetmi mbi këtë tokë, dhe i del si nga qielli fjala “Hoxhë”, trembet pa e lexuar vazhdimin, Kadri Prishtina! E ku ta dinë i shkreti, siç thotë edhe vetë, se ka Hoxhë me emrin Kadri!
Këtu pastaj imagjinata e shfrenuar e Edvinit kullot jo pa arsye ndonëse e shijon një analfabet funksional nga Parisi që urren Saliun! Ja, pra, ky është mileti, e kujt i hynë në punë Hoxhë Kadri Prishtina që pasi ka mbaruar Drejtësinë në Stamboll, fitoi titullin Profesor /Persisht: Hoxhë/, shkriu jetën dhe pasurinë e tij për këtë vend! Edvinit i erdhi në shteg të gajaset edhe me këta demokratë që nuk njohin drejtuesin e Komitetit Mbrojtja Kombëtare e Kosovës, megjithëse është normale si partner të koalicionit që i ka të njohin vetëm drejtues të Komitetit të Partisë së të Madhit!
Në fund, Edvini edhe pse u shit si i zemëruar me vrasjen e 4 protestuesve me 21 Janar dhe u zotua se me ardhjen në pushtet do bëjë namin, ishin rrethanat ato që nuk e lanë këtë mostër politike ta thyente rekordin e vrasjes së deputetëve nga viti 1947; Ndryshe, nga ditë zie, shumica do ta konsideronin ditë feste, ose Grupi i Shefqet Bejës do të konsiderohej me fat kur Edvini të realizonte qëllimet e tij!
Por, me ardhjen e tij në pushtet, Kryeministri i Shkodrës, Himarës dhe gjithë Shqipërisë, Edi Rama, nuk i vrau 16 deputetë dhe një nuk vdiq nga torturat, por 25 deputetëve të opozitës sot nuk u lejohet të jenë as deputetë, ndërkohë Edvinit i është hapur porta dhe aktualisht po qëndron në paradhomën e parajsës së demokracisë, BE!
Dhe jo vetëm kaq! Lideri i opozitës është i arrestuar në shtëpi, dhe poshtë ballkonit ku rrinë mbështetësit e Sali Berishës duke protestuar, meqë nuk është i kënaqur me aq sa arriti të bëjë, Edvini shkon e darkon me Alex Sorosin në restorantin pranë protestës!
Kështu, aty ku shumica e shqiptarëve kanë frikë të hapin edhe gojën për të marrë frymë, nga shtëpia e Zotit të cilën e shembën që në vitin 1967 dhe e rindërtuan me urdhrin e dytë, me kokën ulur që nuk e ngrenë as për arsye shëndetësore se mos po shëtit vërdallë shefi, por, me zë të ngritur që ta dëgjoi ai i cili ka pushtuar tokën, ajrin dhe qiellin shqiptar dhe sot ka marrë edhe rolin e Zotit, duke u kujdesur në veçanti për të ata që i janë bashkangjitur por nuk po bëhen dot kriminel, Në emër të Edvinit, Zahos, e Shpirtit të lig, pra, nuk po mëkatojnë dot, gërthasin lutjen me urdhër partie:
Të falemi Parti, Edvini me Ty!
E bekuar je mbi të gjitha partitë,
e i bekuar fryti i barkut tënd, Edvini!
– Shenjta Parti, Nëna e PSSH,
lutu për ata që nuk mëkatojnë dot,
tash e në fill të vdekjes sonë!
