Në takim me Kryetaren e Komunës, Albin Kurti ofron mbështetje për Preshevën

Kryeministri i Kosovës, Albin Kurti, në takim me kryetaren e sapo zgjedhur të Komunës së Preshevës, Ardita Sinani, ofroi mbështetje dhe bashkëpunim institucional në shërbim të Preshevës dhe qytetarëve të saj.

“Kryeministri Kurti i ofroi mbështetje në realizimin e programit qeverisës dhe shprehu gatishmërinë e tij dhe të qeverisë për bashkëpunim të afërt institucional në shërbim të Preshevës dhe qytetarëve atje pa dallim,” thekson Zyra e Kryeministrit përmes një komunikate për takimin ku Albin Kurti fillimisht e uroi për formimin e koalicionit qeverisës me Partinë Demokratike Shqiptare të drejtuar nga Ragmi Mustafa dhe zgjedhjen si kryetare e re e komunës.

Ndërkohë Ardita Sinani është takuar edhe me Zv/Kryeministrin e Kosovës, Besnik Bislimi.

“Ata diskutuan mbi rëndësinë e mbrojtjes dhe ruajtjes së identitetit kulturor të shqiptarëve në Serbi, i cili në vazhdimësi përballet me politika destruktive nga Beogradi zyrtar,” u tha pas takimit të Bilsimit me Sinanin.

Ndryshe, Ardita Sinani u zgjodh kryetare e Komunës së Preshevës me 24 vota në asamblenë komunale, e cila u mbajt më 30 korrik.